Ermənistanda növbədənkənar parlament seçkiləri öncəsi siyasi gərginlik getdikcə artır. Bu hal, xüsusən də özünü baş nazir vəzifəsini yerinə yetirən Nikol Paşinyanla “Qarabağ klanı”nın təmsilçilərindən olan Robert Köçəryan arasında qabarıq büruzə verir.
Yaranmış vəziyyətdə Robert Köçəryan iyunun 20-də Ermənistanda keçiriləcək növbədənkənar parlament seçkilərində mütləq qalib gələcəyini iddia edir. Bu fonda Serj Sarkisyan komandasında təmsil olunmuş sabiq baş nazir Karen Karapetyan da Robert Köçəryanı dəstəklədiyini açıqlayıb. Hazırda Köçəryan Paşinyana qarşı getdikcə daha sərt ittihamlar səsləndirir. Məsələn, eks-prezident Nikol Paşinyanın vaxtilə Şuşa ilə bağlı atdığı addımların, o cümlədən, separatçıların başçısı Arayik Arutyunyanın “andiçmə mərasimi”nin burada keçirilməsinin yanlış olduğunu bildirib: “Andiçmə mərasimini Şuşada keçirməyə ehtiyac yox idi. Çünki Şuşanın çox həssas bir məsələ olduğunu bilirdilər. Aşkar edilməməsi lazım olan şeylər var ki, bunu edəndə danışıqlar yolu ilə nəyəsə nail olmaq üçün heç bir ümid yeri buraxmırsınız”. Köçəryan “RİA Novosti”yə müsahibəsində ölkədə qarşıdurma gözlədiyini də bildirib: “Ermənistanda keçiriləcək növbədənkənar parlament seçkilərindən sonra qarşıdurmanın olacağı istisna edilmir". Onun sözlərinə görə, iyunun 20-də seçkilərdən sonra insanların küçəyə çıxması və qarşıdurmanın yaranması qaçılmaz ola bilər: “Əlbəttə, bu arzuedilən variant deyil. Ancaq onu da tamamilə istisna etmək olmaz”. Köçəryanın fikrincə, bütün bunlar seçkilərin nəticəsindən asılı olacaq: “Mərkəzi Seçki Komissiyası yerlərdə öz işini dəqiq və qanun çərçivəsində görsə, elə ciddi ağır nəticələrin olacağına inanmıram”. Mütəxəssislər hesab edir ki, Köçəryan bu açıqlaması ilə mövcud hökuməti hədələyib. O demək istəyir ki, başçılıq etdiyi blok bu siyasi kampaniyanın qalibi olmasa, iğtişaş törədəcək. Nikol Paşinyanın da buna cavabı gecikməyib, o, Köçəryan və digər rəqiblərini güc yolu ilə hədələyib. Sisian şəhərində tərəfdarları ilə görüşdə o bildirib: "Camaat, siz hər gün hiss etməlisiniz ki, mən və yüz minlərlə insan hər gün sizin arxanızda dayanmışıq. Birdən kimsə bizi təhdid etməyə, yaxşı olacağına işarələr etməyə çalışmasın. Hər bir bənzər cəhd üçün hamınıza və hər birinizə yerindəcə bunlara, bu yalançıların hamısına polad mandat vermək səlahiyyəti verirəm". Nikol Paşinyan hər dəfə polad mandat haqqında danışarkən hədiyyə aldığı çəkici havada silkələyir. Bu xüsusda o yenidən bildirib ki, iyunun 20-də xalq əsgər çörəyini uzun illər oğurlamış generalların cavabını verməlidir: "İyunun 20-də erməni xalqı əsgər çörəyini Monte Karlo kazinolarında israf etmiş fırıldaqçının cavabını verməlidir". O bildirib ki, seçkilərdə dağıdıcı məğlubiyyətə uğrayacağını artıq dərk edən məğlub olmuş qüvvə sonrakı seçkilərin legitimliyinə kölgə salmaq üçün polisin "dubinka"larının altına düşmək istəyir: "Biz bunu nəzərə alaraq onlara bu imkanı verməyəcəyik". Paşinyan sabiq baş nazir Karen Karapetyanı isə “əl uşağı” adlandırıb. Seçki təbliğatı çərçivəsində Qafanda seçiciləri qarşısında çıxış edən Paşinyan Köçəryana işarə ilə deyib: “İndi o iş yerlərini paylayır, deyir ki, Karen Karapetyana vəzifə təklif edib. Karapetyan lətifə qəhrəmanına dönüb. Sifariş yerinə yetirən uşaq olub: top meydançadan kənara çıxır, ona deyirlər, qaç topu gətir”. Paşinyan Köçəryanı gənc pensioner də adlandırıb: “Sonra Serj Sarkisyanı və Artur Vanetsyanı da işə götürəcək? Yox, daha onun Ermənistanda kiməsə iş verməyə imkanı olmayacaq”.
Serj Sarkisyan bu açıqlamalar fonunda Nikol Paşinyanı ölkəni vətəndaş müharibəsinə sürükləməkdə ittiham edib: “Nikol Paşinyan açıq şəkildə deyir ki, 60 faiz səs toplamasam, problem yaranacaq. O nə istəyir, onu da edir. Siz görürsünüz, onun əlində çəkic var”. Sarkisyanın sözlərinə görə, bu çəkicin kim üçün olduğunu müəyyən etmək lazımdır: “Hər şeyi gördük – müharibədə məğlubiyyəti, minlərlə gəncin ölümünü. Nə qaldı? Yalnız vətəndaş müharibəsi. Qoy bunu da göstərsin”. Siyasi qüvvələr arasında yaşanan ziddiyyət fonunda “Joxovurd” qəzeti yazır ki, Paşinyan həqiqətən də seçkidən sonra rəqiblərini əzməyi düşünür: “15 əsirin ABŞ və Gürcüstanın köməyi ilə qaytarılmasından belə güman etmək olar ki, Rusiya dövlətinin səyləri nəticə vermir, amerikalılar isə güclü və təsirlidirlər. Bizim güc strukturlarındakı mənbələrimiz təsdiqləyir ki, kənardan görünməsə də, Rusiya tərəfi də Əliyev administrasiyası ilə iş aparıb. Bizi əmin etdilər ki, ruslar qısqanclıq nümayiş etdirsəydi, razılaşma yəqin ki, baş tutmayacaqdı. Belə çıxır ki, erməni əsirlərin qayıtması Paşinyanın reytinqinin artırılması üçün edilibsə, bunu həm Rusiya, həm də Qərbin istədiyini demək məntiqli olardı. Rusmeyilli qüvvələrin Köçəryanın ətrafında birləşdiyi və Kremlin də “Ermənistan” blokuna dəstək verdiyi haqda rəy yaranmışdı. Amma reallıq bunun əksini göstərir. Rusiya hələ də Paşinyanı iqtidarda görmək istəyir”.
Tahir TAĞIYEV
