Ermənistanın baş naziri vəzifəsini müvəqqəti icra edən Nikol Paşinyan bildirib ki, onlar Azərbaycana minaladıqları ərazinin yalnız kiçik bir hissəsinin xəritəsini verib: “Minalanmış ərazilərin təhvil verilən xəritəsi xəritələrin kiçik hissəsidir.
Qeyd etmək istəyirəm ki, dekabr ayında xəritələr mübadiləsini etdik və bunlar bizim mövqelərimizdəki minalanmış sahələrin xəritələri deyil, Azərbaycanın minalanmış ərazilərinin xəritələridir".
Xatırladaq ki, əldə edilmiş razılığa əsasən, 2021-ci il iyunun 12-də Ermənistanın Ağdam rayonu üzrə 97 min tank və piyada əleyhinə minanı özündə əks etdirən xəritələri Azərbaycan tərəfinə təqdim etməsi müqabilində, saxlanılan 15 nəfər erməni Azərbaycan-Gürcüstan sərhədində Gürcüstan nümayəndələrinin iştirakı ilə Ermənistana təhvil verilib.
Paşinyan bu açıqlaması ilə, sanki dişi şirəyə batmış adam kimi danışır. Bütün dünyanın gözü qarşısında başqa ölkənin ərazisində basdırdıqları minlarla alver mövzusu açır. Deməyindən belə çıxır ki, gələcəkdə də əlində olan xəritələrlə alverə hazırdır. Belə terrorçu mahiyyətli hədəyə dünya birliyi və nüfuzlu beynəlxalq təşkilatlar niyə göz yumur?
Hərbi-siyasi ekspert Ramil Məmmədli “Bakı-Xəbər”ə bildirdi ki, əslində Ağdamdakı minalanmış sahələrin xəritəsinin bizə təhvil verilməsi ilə bağlı məsələ ermənilərin tam mahiyyətini dünyaya nümayiş etdirmiş oldu: “Onlar bu öhdəliyi boyunlarına götürsələr də, yayınırdılar. Deyirdilər ki, onlarda güya belə xəritə yoxdur. İndi biz gördük ki, onlar bu məsələni əsl alver predmetinə çeviriblər. 15 diversantın qarşılığında bir rayonun xəritəsini verməyə hazır oldular. Buna da Azərbaycan öz təzyiqləri nəticəsində nail ola bildi. Ölkə başçısı bütün rəsmi və qeyri-rəsmi görüşlərdə məsələni önə çəkmiş və Ermənistanın bu məsələdə məcbur edilməsinə çağırışlar etmişdi. Bu, eyni zamanda, diplomatiyamızın qələbəsidir. Siyasətçilərimiz və diplomatlarımız bütün səfərlərdə və mətbuatdakı çıxışlarında Ermənistanın minalanmış ərazilərin xəritələrini bizə verməməklə hərbi cinayətlərini münaqişəsiz dövrdə də davam etdirdiyini beynəlxalq ictimaiyyətin diqqətinə çatdırıb. Təkcə Ağdam rayonunda 97 min mina basdırılıb. Bu, tarixdə görünməmiş dəhşətdir. Bəlli olur ki, ermənilər torpaqlarımızı işğal etdiyi dövrdə ancaq dağıtmaq və mina basdırmaqla məşğul olublar. Ağdam rayonunu elə minalayıblar ki, Azərbaycan ordusu birbaşa hücum edib hərəkətə keçə bilməsin, böyük itkilərə məruz qalsın. Amma Ali Baş Komandanımız ermənilərin hiyləsini başa düşərək, onlar üçün sürpriz hücum taktikasını hazırlayaraq ortaya qoyub və Ağdam bir güllə atmadan bizə qaytarıldı. Atəşkəs əldə olunandan sonra150-yə yaxın mülkü və hərbi şəxsimiz ermənilərin basdırdığı minalara düşərək həlak olub və ya sağlamlığını itirib. İşğaldan azad olunmuş ərazilərimizə ermənilər o qədər mina basdırıb ki, bu ərazilərin hər kvadratmetrini təhlükə mənbəyi kimi qəbul etməliyik. Ancaq biz görürük ki, Paşinyan yeni anons verir. Deyir ki, əlində daha çox xəritə var. Yəni yeni sövdələşməyə razı olduğunu bəyan edir. Bu, faktiki olaraq, başqa ölkəni terrorla hədələmək anlamına gəlir. Maraqlıdır ki, dünya birliyi, nüfuzlu ölkələr buna seyrçi qalır. Onların borcudur ki, Paşinyandan xəritələri heç bir şərt irəli sürmədən tələb etsin. Bu öhdəliyi Paşinyan da öz üzərinə imzaladığı bəyantla götürüb. Azərbaycan tərəfi Paşinyanın bu hədəsini ictimailəşdirməli və təkidlə digər rayonlardakı xəritələri tələb etməlidir. Paşinyanın imtina etməyə əsası olmayacaq. Çünki əlində daha çox xəritənin olduğunu özü etiraf edib. Onların bütün xəritələri verməkdən başqa çarələri qalmır. Azərbaycanın əlində onlara təzyiq etmək üçün kifayət qədər hərbi, siyasi alətlər var. Boyun qaçırsalar, onları işə sala bilərik”.
Məhəmmədəli QƏRİBLİ
