Rəsmi məlumatlara görə, Ermənistan ordusu son 1 həftədə 3 dəfə atəşkəsi pozub. Buradan da aydın görsənir ki, 10 noyabr bəyanatının şərtləri yenə Ermənistan tərəfindən pozulur, özü də məqsədli şəkildə.
Ekspertlər hesab edirlər ki, Ermənistanın yenidən bu təxribatlara əl atması daha böyük təhlükələrdən xəbər verir.
“...eyni hərəkətlərin, planın tərkib hissəsidir”
Qarabağ Azadlıq Təşkilatının (QAT) sədri Akif Nağı hesab edir ki, ermənilər atəşkəsi qəsdən pozurlar. “Ermənistanın davamlı şəkildə atəşkəsi pozması yeni bir təhlükəli situasiyadan xəbər verir. Ermənistan açıq müharibədə məğlub olub, amma özlərinin məğlub olduqlarını etiraf etmək istəmirlər. Çünki məğlub olduqlarını etiraf etsələr, 10 noyabr bəyanatından irəli gələn tələbləri yerinə yetirməli, tam təslim olmalı, kapitulyasiya etməli, reallıqla barışmalıdırlar, onlar isə hələ də reallıqla barışmaq istəmirlər. Ona görə də hesab edirəm ki, atəşkəsin pozulması və terror aktları, təxribatlar eyni xarakterlidir və eyni hərəkətlərin, planın tərkib hissəsidir. Bununla onlar göstərmək istəyirlər ki, hələ məhv olmayıblar, hələ müqavimət göstərə bilərlər və sair. Bir şey də maraqlıdır ki, ermənilər atəşkəsi pozduqlarını etiraf etmirlər. Mən erməni mətbuatını izləyirəm, onların Müdafiə Nazirliyi hər dəfə “atəşkəs biz tərəfdən pozulmayıb” bəyanatı verir. Yəni atəşkəsi pozduqlarını təkzib etmək istəyirlər. Bu da ondan xəbər verir ki, hətta etdiklərinin arxasında da dayana bilmirlər, gücsüzdürlər. Ən azından, beynəlxalq təşkilatların təzyiqindən çəkinirlər. Beynəlxalq təşkilatların Ermənistana təzyiqi getdikcə artır. Artıq dünya reallığı, həqiqəti qəbul edir, Azərbaycanın gücü ilə razılaşırlar. Bilirsiniz ki, Avropa İnsan Haqları Məhkəməsində ermənilərin əsassız iddiası rədd edildi. Yəni onlar 11 nəfər erməni terrorçusuna bəraət verilməsi üçün müraciət etmişdilər, Azərbaycanı o məsələdə ittiham edirdilər, amma dəlillərin, sübutların tam olmadığına əsaslanan Avropa İnsan Haqları Məhkəməsi ermənilərin iddiasını rədd etdi”.
A.Nağının sözlərinə görə, müharibə bitdikdən sonra müxtəlif Avropa və ABŞ təşkilatlarından müəyyən dəstək alan ermənilər indi bu dəstəyi görə bilmirlər, bu dəstək səngidi, ermənilərin əsassız olduqlarını bildilər. Azərbaycan və Türkiyə əleyhinə o bəyanatları verənlər də başa düşdülər ki, Azərbaycanın mövqeyi haqlı mövqedir. “Ermənilər atəşkəsi pozmaqla situasiyanı dəyişməyə cəhd göstərirlər, özlərinin mövcudluğunu “sübut etmək” istəyirlər. Bunun da bir neçə səbəbi ola bilər. Birincisi, onlar, ilk növbədə, Kəlbəcər istiqamətində təxribatlar törədirlər, bu da onu göstərir ki, onların Kəlbəcərə “ümidləri var”, Kəlbəcərdən ərazi saxlamaq istəyirlər. Çünki onlar o vaxt bir dəhliz də Kəlbəcərdən istəyirdilər. Hətta torpaqlarımız işğalda olanda oradan yol da çəkmişdilər. Ola bilsin ki, hansısa məntəqələri əllərində saxlamağa çalışırlar. Atəşkəsi pozmaqdan isə bir təzyiq vasitəsi kimi istifadə etmək istəyirlər. Bu ola bilər. Digər tərəfdən, seçki öncəsi hansısa qüvvələr seçki ilə bağlı gərginlik yaratmaq istəyirlər. Tutalım, seçki öncəsi Paşinyan hakimiyyəti tərəfindən bu cür addımlar atıla bilər ki, “müharibənin yenidən başlaması” ehtimalını ortaya qoyub cəmiyyəti gərginlikdə saxlasınlar. Yəni atəşkəs pozulur, bu, müharibəyə də çevrilə bilər. Xalqın da yeganə ümid yeri kimi özlərini göstərmək istəyirlər. Yəni təbliğatı bu yönə yönəldirlər ki, bu müharibədə nə mümkündür etdik, amma məğlub olduq, “torpaqları geri almaq” addımlarını ancaq biz ata bilərik. Paşinyanın təbliğatı bundan ibarətdir. Ona görə də, ola bilsin, o tezisi əsaslandırmaq üçün atəşkəsi pozsunlar. Başqa bir məsələ də ola bilər ki, hazırda Ermənistan ordusu yox səviyyədədir, paşıpozuq haldadır, hansısa bir qrup tərəfindən atəşkəsi pozmaqla həmin o qrupun maraqlarını təmin etmək istəyirlər. Bu qrup hərbi qrup, siyasi qrup ola bilər, yaxud hansısa bir hərbi dəstə öz iddiasını ortaya qoya bilər. O da mümkündür. Bu da Ermənistan ordusunun olmamasından xəbər verir, paşıpozuqdur, komandanlıq yoxdur, ona görə də kim ağlına nə gəlir, onu edir. Bu məsələyə bu istiqamətdə şərh vermək olar. Amma bu, bütün hallarda, Ermənistanın zəifliyini, gücsüzlüyünü göstərir. Azərbaycan öz mövqeyində sərt olmalıdır. Ermənistan hər dəfə atəşkəsi pozduqca Azərbaycan bu təxribatı, bu təhlükəni beynəlxalq təşkilatların diqqətinə çatdırmaqla müəyyən bir rəy formalaşdırmalıdır. Eyni zamanda da atəş nöqtələrini məhv etməli, irəliləməlidir. Biz dəfələrlə demişik, indi də deyirəm, Azərbaycanın indiki situasiyada hədəfi Xankəndi olmalıdır. Torpaqlarımız işğal altında olan dövrdə hədəfimiz Şuşa idi, Şuşanı işğaldan azad etmək istəyirdik, hətta bir şüar da irəli sürmüşdük ki, Qarabağ azad olacaq, paytaxt Şuşa olacaq. O xətt də artıq həyata keçirilib. O vaxt hədəf Şuşa idi, indi Xankəndi olmalıdır. Azərbaycan Ordusu, Azərbaycan hakimiyyəti Xankəndiyə qayıtmalıdır. Ona görə də Ermənistan hər dəfə atəşkəsi pozanda Azərbaycan bir az da irəliləməli, atəş nöqtəsini ləğv etmək üçün irəliləyərək Xankəndiyə çatmalıdır. Hesab edirəm ki, bu müharibədə Azərbaycanın tam qələbəsi Xankəndiyə girməklə və Xankəndidə hakimiyyəti bərpa etməklə yekunlaşacaq” - deyə A.Nağı vurğuladı.
İradə SARIYEVA
