Ermənilər daha bir faşisti əbədiləşdirməyə başlayıb, həm də bizim torpaqlarda...

Faiq Ələkbərli: “Monte Melkonyan kimi bir caninin, faşistin, daşnakın və terrorçunun indi “yada düşməsi” bir təxribatdır”

img

Yayılan məlumatlara görə, bir qrup erməni Xankəndidə dinc azərbaycanlıları qətlə yetirən terrorçu Monte Melkonyanın “xatirəsinə” yürüş etməyi planlaşdırır.

M.Melkonyan kimi faşistin, daşnakın, caninin bizim torpaqda ermənilər tərəfindən “xatırlanmasının” planlaşdırılması böyük bir təxribatdır.

Ekspertlər deyirlər ki, bölgədəki sülhməramlılar ermənilərin bu planının baş tutmasına əngəl olmalı, əli Azərbaycan xalqının qanına batan mənfur düşmənlə bağlı hər hansı bir tədbir bizim ərazidə keçirilməməlidir.

Sülhməramlılar yenə separatçıların hərəkətlərinə göz yumacaq, yenəmi onlara meydan verəcəklər? Nə edək ki, bu planın qarşısını alaq?

  • ...Ərdoğanın Şuşaya səfərinə kölgə salmağa hesablanıb”

Azərbaycan Milli Elmlər Akademiyasının (AMEA)   Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi şərhçi Faiq Ələkbərli baki-xeber.com-a şərhində bildirdi ki, erməni separatçılarının faşist Melkonyanın adını çəkməsinə belə imkan verilməməlidir, nəinki onunla bağlı hansısa yürüşün keçirilməsinə. “Mənə elə gəlir ki, indiki mərhələdə bu kimi xəbərlərin yayılması təsadüfi deyil. Bu anlamda ki, yaxın günlərdə Türkiyə Cümhuriyyətinin prezidenti Rəcəb Tayib Ərdoğan Azərbaycana səfər edəcək və Şuşaya gedəcək. Ərdoğanın Şuşadan dünyaya çox vacib mesajlar verəcəyini qeyd etməsi də diqqəti çəkir. Məhz bu ərəfədə də Xankəndidə və ətrafında mövcud olan separatçılar fəallaşdırılır. Bu fəallaşmanın da arxasında duranlar məlum güclərdir. Xüsusən də burada daha çox Rusiyanın əlinin olması hiss olunur. Hansısa bir qrup erməni separatçısı Birinci Qarabağ müharibəsində dinc azərbaycanlıları qətlə yetirən terrorçu Monte Melkonyanı niyə indi yada salsın, onun “xatirəsi” üçün nədən yürüş həyata keçirsin? Özü də Xankəndidə. Hesab edirəm ki, bu həmin bölgədə yaşayan separatçı ermənilərin beyninin məhsulu deyil, onların arxasında duran güclərin ideyası, planıdır. Xankəndi və ətrafındakı Rusiya sülhməramlıları, əslində, istəsələr, bu məsələni kökündən həll edə bilərlər. Amma onlar burada maraqlı olduğu üçün bir az məsələ fərqlidir. Bu anlamda mənə elə gəlir, məsələnin daha çox bu tərəfini düşünmək lazımdır ki, bu təxribatın arxasında Rusiya sülhməramlıları, Rusiya dayanırsa, bu halda planlaşdırılan təxribatın qarşısını kim ala bilər? Bu məsələdə yalnız Azərbaycanla Türkiyənin işbirliyi ortaya çıxa bilər. Sadəcə, görünür ki, burada Azərbaycana hədə-qorxu gəlmək məsələsi var. Bu anlamda bir qrup separatçı ermənini ortaya atırlar. Məlum güclərin göstərişi ilə separatçıların Melkonyanın “xatirə yürüşü”nü planlaşdırması Ərdoğanın Şuşaya səfərinə kölgə salmağa hesablanıb. Çünki Ərdoğanın Azərbaycana gəlib getməsindən sonra çox ciddi mərhələyə qədəm qoyacağıq. Bu “yürüşün” də planlaşdırılması Azərbaycan-Türkiyə birliyinin güclənməsini istəməyən Rusiya və bəzi Qərb dövlətlərinin ideyasıdır. Bu cür təxribatlara əl atırlar və digər təxribatların da olacağı istisna deyil. Ona görə də Monte Melkonyan kimi bir caninin, faşistin, daşnakın və terrorçunun indi “yada düşməsi” bir təxribatdır”.

F.Ələkbərlinin sözlərinə görə, bütün bu təxribatların qarşısının alınması üçün Türkiyə və Azərbaycanın münasibətləri daha da güclənməli, hərbi sahədə əməkdaşlıqlar daha da genişlənməli və üst səviyyədə müxtəlif sazişlər imzalanmalıdır. O hesab edir ki, imzalanan sənədlərdə Azərbaycan və Türkiyənin bir-birinin təhlükəsizliyində birgə iştirakına dair müddəalar yer almalıdır, bu vacibdir.

F.Ələkbərlinin fikrincə, bölgədə erməni separatizmini “oyandıranlar” və bizim əleyhdarlarımız Azərbaycan və Türkiyənin ittifaqının daha da güclənməsindən qorxduqları üçün bu cür təxribatlara əl atırlar. Bütün təxribatlara baxmayaraq, Azərbaycanla Türkiyənin iradə nümayiş etdirdiyini deyən F.Ələkbərli hesab edir ki, ən böyük nöqtə də Şuşada qoyulacaq, heç bir qüvvə Azərbaycan və Türkiyə birliyinin qarşısını ala bilməyəcək. Bütün hallarda, Azərbaycan və Türkiyə bir-birinin zəmanətçisi rolunu oynamalıdır: “Bundan isə Rusiya, İran, Fransa, Belçika, Kanada, Yunanıstan  və digər ölkələr çox narahatdırlar”

İradə SARIYEVA

Son xəbərlər