“Azərbaycan Hökuməti İnsan Hüquqları üzrə Avropa Məhkəməsinin (İHAM) Ermənistanın hazırda Azərbaycanda saxlanılan 11 vətəndaşının dərhal sərbəst buraxılması tələbini rədd edən qərarını alqışlayır”.
Bunu Xarici İşlər Nazirliyinin Mətbuat xidməti idarəsinin rəisi Leyla Abdullayeva İnsan Hüquqları üzrə Avropa Məhkəməsinin Azərbaycanda saxlanılan 11 Ermənistan vətəndaşının dərhal sərbəst buraxılması tələbini rədd edən qərarı ilə bağlı KİV-in sualını cavablandırarkən deyib.
O bildirib ki, Ermənistan tərəfindən Məhkəmə Reqlamentinin 39-cu Qaydasına istinad edilərək saxlanılan şəxslərin sərbəst buraxılması üçün iki dəfə cəhd göstərilib, lakin hər ikisi rədd edilib:
“Ermənistanın müraciəti Azərbaycanın beynəlxalq qanunlarla təsbit olunmuş, ölkənin daxili qanunvericiliyini və beynəlxalq hüququ pozan, habelə ağır hərbi cinayətlər törətməkdə şübhəli bilinən şəxslərin cinayət təqibinə dair hüquq və öhdəliklərini gözardına alır. İHAM qərarı məhz bu hüququ vurğulayır. Ermənistanın saxlanılan şəxslərin dərhal sərbəst buraxılması ilə bağlı müraciəti Azərbaycan Hökumətinin qanunun aliliyinə hörmətsizlik çağırışına bərabərdir. Biz sözügedən prinsiplərə sadiq qalırıq və İHAM-in da qəbul etdiyi kimi, cinayət təqibi başa çatana qədər bu şəxslər həbsdə saxlanılacaq".
XİN rəsmisi əlavə edib ki, Ermənistanın dərhal sərbəst buraxılmasını tələb etdiyi şəxslərdən ikisi - Lüdviq Mkrtçyan və Alyoşa Xosrovyan Azərbaycan vətəndaşlarına işgəncə verməkdə təqsirləndirilərək hazırda məhkəmə istintaqına cəlb olunublar:
"Azərbaycan öz hüquq və öhdəliklərinə uyğun olaraq, beynəlxalq və daxili hüququn müəyyən olunmuş prinsiplərinə riayət etməyə və bu təqibi başa çatdırmağa sadiqdir.
Onu da qeyd etmək istərdik ki, Azərbaycan bu şəxslərin vəziyyəti ilə bağlı bütün tələbləri yerinə yetirib. Beynəlxalq Qırmızı Xaç Komitəsi, habelə İnsan Haqları üzrə Müvəkkilin (Ombudsman) həbs olunmuş şəxslərlə görüşləri təşkil edilib və 27 mayda Azərbaycan hərbçiləri tərəfindən saxlanılan 6 hərbçi də daxil olmaqla, sözügedən həbsdə olan şəxslərin səhhəti barədə tibbi sənədlər təqdim edilib”.
Erməniləri məyus edən Avropa Məhkəməsindən başqa qərar gözləmək olardımı?
“Təqsirləndirilənlər bütün yuxarı instansiyalara müraciət hüququnu bitirəndən sonra onların hüququ var ki, Avropa Məhkəməsinə müraciət etsinlər”
Hüquqşunas, Azərbaycan Vəkillər Kollegiyasının üzvü Mehman Muradlı “Bakı-Xəbər”ə bildirdi ki, Avropa Məhkəməsinin Ermənistanın iddiasını rədd etməsi tam obyektiv qərardır: “Həm Ermənistan, həm də Azərbaycan Avropa Şurasının üzvüdür. Həmin təşkilata üzv olanda ölkələr üzərlərinə öhdəliklər götürür. Onlardan biri də Avropa Məhkəməsilə yaxından əməkdaşlıqdır. Bu öhdəlik ondan ibarətdir ki, vətəndaşlar ölkə qanunvericiliyinə uyğun olaraq məhkəmə instansiyalarının hamısını keçəndən sonra Avropa Məhkəməsinə müraciət etmək haqqını qazanırlar. Üçüncü instansiyanın qərarından 6 ay gec olmayaraq Avropa Məhkəməsinə müraciət hüququ tanınır. Orada qəbul edilən qərara üzv ölkələr riayət edir. Ermənistanın müraciəti tam əsassızdır. Çünki həmin adamlar Azərbaycan ərazisində terror törətməkdə şübhəli bilinərək həbs olunublar. Onlarla bağlı istintaq aparılmalı, sonra məhkəmədə barələrində qərar verilməlidir. Təqsirləndirilənlər bütün yuxarı insatnsiyalara müraciət hüququnu bitirəndən sonra onların hüququ var ki, Avropa Məhkəməsinə müraciət etsinlər. Hələ ki, bu mərhələ keçilmədiyi üçün Avropa Məhkəməsi Ermənistanın müraciətini rədd edib. Bir faktı da deyim ki, Ermənistan həmin instansiyada tərəf kimi tanınmır. Həbs edilənlərin çoxu Azərbaycan vətəndaşı olan ermənilərdi. Ölkə qanunlarını pozan vətəndaşlarının üzərində məhkəmə istintaqı aparırsa, bu tam qanunidir”.
Məhəmmədəli QƏRİBLİ
