“Sovet sərhədlərini tanımaqdan başqa yolumuz yoxdur” - Ermənistanda 30 ilin ən praqmatik düşüncəsi...

Fikrət Sadıqov: “Ter-Petrosyan anlayır ki, çıxış yolu sərhədləri tanımaqdan və kommunikasiya xətlərinin açılmasından keçir”

img

Ermənistanın ilk prezidenti, Erməni Milli Konqresi partiyasının lideri Levon Ter-Petrosyan seçiciləri ilə görüşündə kommunikasiyalar və sərhədlərlə bağlı bir sıra məqamlara toxunub.

Ter-Petrosyan qeyd edib ki, “nəqliyyat dəhlizi” sözünü hərə öz istədiyi kimi başa düşür: “Azərbaycan Naxçıvana çıxış əldə etmək istəyir, Ermənistan isə Rusiyaya. Burada nəyi izah edəsən? Bəyəm Ermənistan üçün Rusiya ilə etibarlı əlaqə yolunun olması mühüm deyil? Siz bilirsiniz ki, Gürcüstan yolları hansı vəziyyətdədir, Azərbaycan yolları isə bizim üçün bağlıdır. Əgər belə imkan açılsa, Ermənistan üçün bu, gözəl bağlayıcı əlaqə olacaq”.

Sabiq prezident sərhədlər məsələsinə toxunaraq xüsusi olaraq qeyd edib ki, Ermənistan və Azərbaycan arasında Sovet dövründəki sərhədlərin tanınmasına alternativ yoxdur. Onun sözlərinə görə, söhbət Ermənistanın SSRİ sərhədlərini tanıyıb-tanımamasından getmir. Beynəlxalq ictimaiyyət BMT-nin simasında keçmiş sovet respublikalarının müstəqilliyini tanıyıb: “Burada heç bir şey dəyişdirilə bilməz. Ermənistanla Azərbaycan arasındakı sərhəd sovet sərhədidir. Ona görə də sərhədlərin tanınmasının alternativi yoxdur”.

Bəlkə də Ermənistanda sərhəd məsələsinə Petrosyan qədər praqmatik yanaşan siyasilər çox olsaydı, bu dərəcədə qarşı tərəf sərhədlərlə bağlı şou yaratmazdı. Yersiz gərginliyə getməzdi. Ancaq Ermənistanda bir sıra siyasi qüvvələrin xəstə zehniyyətə malik olması onlara proseslərə real baxmağa imkan vermir.

  • “O belə çıxışlar etməklə həm də ölkədə sağlam düşüncəli seçiciləri öz tərəfinə çəkir”

Sözügedən məsələ ilə bağlı fikirlərini “Bakı-Xəbər”lə bölüşən sabiq diplomat, politoloq Fikrət Sadıqov Ter-Petrosyanın sərhədlərlə bağlı çağrışına bir neçə aspektdən yanaşdı: “Əvvəla Ermənistanda digər siyasətçilərdən fərqli olaraq Levon Ter-Petrosyan müəyyən qədər sağlam düşüncəli mövqe sərgiləyir. Bu, Ter-Petrosyanın timsalında bir neçə dəfə özünü göstərib. Ter-Petrosyan anlayır ki, Ermənistan çox mürəkkəb bir vəziyyətdədir. Bu mürəkkəb vəziyyətdən çıxış yolu Sovet dövründə müəyyən edilən sərhədləri tanımaqdan və kommunikasiya xətlərinin açılmasından keçir. Yoxsa, əvvəlki aqressor mövqedən çıxış etmək xəttini saxlamaqla nəyəsə nail olmaq mümkün olmayacaq. Əksinə, bu, Ermənistanı həlli mümkün olmayan fəlakətə aparacaq. Ter-Petrosyan kifayət qədər təcrübəli bir siyasi fiqur olduğuna görə bütün bunların fərqindədir. O üzdən, Ermənistan normal siyasi addımlar atmalıdır. Azərbaycanla sərhədlərdə müəyyən stabillik yaratmaq və delimitasiya işləri aparmaq lazımdır. Ermənistan siyasiləri nə qədər tez bu reallığı dərk etsələr, bu, bir o qədər onların xeyrinə olacaq. Ter-Petrosyan belə çıxışlar etməklə həm də ölkədə sağlam düşüncəli seçiciləri öz tərəfinə çəkir. Belə bir mövqe dolayısı ilə Paşinyanın da maraqlarına uyğundur. O mənada ki, Paşinyanın qalib gələcəyi təqdirdə təkbaşına hakimiyyət qurmaq şansı yoxdur. O, mütləq digər siyasi qüvvələrdən biri ilə koalision hökumət qurmalıdır. Hesab edirəm ki, Ter-Petrosyanın partiyası parlamentə düşsə, belə bir imkan ola bilər”.

Politoloq hesab edir ki, 20 iyunda erməni seçicilər doğru seçim etsələr, bu, ümumilikdə, Ermənistanın xeyrinə olacaq.

Vidadi ORDAHALLI

Son xəbərlər