Ermənistan və Azərbaycan uğurlu şəkildə əraziləri minalardan təmizləmək üçün məlumat mübadiləsi ilə bağlı öhdəliyi üzərinə götürməlidir.
Cənubi Qafqazla əlaqələr üzrə Avropa Parlamenti heyətindən verilən məlumata görə, bu barədə nümayəndə heyətinin rəhbəri, Avropa Parlamentinin deputatı Marina Kalyurand, Ermənistan üzrə daimi məruzəçi, Avropa Parlamentinin üzvü Andrey Kovaçev və Azərbaycan üzrə məruzəçi, Avropa Parlamentinin üzvü Jelyana Zovkonun birgə bəyanatında deyilir. Bəyanatda bildirilib: "İyunun 4-də Kəlbəcər rayonunda mina partlaması nəticəsində, iki jurnalist də daxil olmaqla, Azərbaycanın üç mülki şəxsinin ölümü bizi kədərləndirdi. Təəssüf ki, bunlar Ermənistan-Azərbaycan münaqişəsi kontekstində piyada əleyhinə minaların sadəcə son qurbanlarıdır. Həlak olanların ailələrinə dərin hüznlə başsağlığı verir və yaralıların tam sağalmasına ümid edirik".
Qeyd olunub ki, hər iki tərəf əraziləri minalardan səmərəli şəkildə təmizləməyə başlamaq və gələcək faciələrin qarşısını almaq üçün əməkdaşlıq və mövcud məlumat mübadiləsi üçün səy göstərməlidir:
"Piyada əleyhinə minalar, mahiyyət etibarilə, mülki və hərbi hədəfləri ayırd edə bilməyən ayrıseçkiliksiz silahlardır".
Avropa missiyasının bəyanatında yenə də qərəzli məqam var. Bir tərəfdən konkret hadisəni pisləyirlər, digər tərəfdən isə məsuliyyəti bərabərləşdirirlər və hər iki tərəfə eyni məzmunlu çağırış edirlər. Çox maraqlıdır, Azərbaycan indiyə kimi hansı ərazini minalayıb ki, bizim məsuliyyətimizi Ermənistanla eyniləşdirirlər?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə bildirdi ki, Ermənistan 44 günlük müharibədə məğlubiyyətinə baxmayaraq mənfur xislətindən əl çəkmir və hərbi cinayətlərini davam etdirir: “Statistika göstərir ki, 10 noyabr razılaşmasından sonra 100-ə yaxın günahsız vətəndaşımız işğal dövründə ermənilərin ərazilərimizə basdırdığı minalara düşüb və çox təəssüf ki, onların bir coxu həyatını itirib. Torpaqlarımız işğaldan azad edildikdən sonra həmin ərazilərdə çoxlu sayda minanın zərərsizləşdirilməsinə baxmayaraq, mülki şəxslər arasında minaya düşənlərin sayı günü-gündən artır və bunun səbəbi erməni vəhşiliyidir. Dünya birliyi, beynəlxalq təşkilatlar təcavüzkar Ermənistana layiq olduğu sərt reaksiyanı vermir. Ermənistan işğaldan azad edilmiş ərazilərin mina xəritələrini heç bir şərtsiz Azərbaycan tərəfinə təhvil verməlidir. Hətta erməni zabiti özü belə etiraf edir ki, Laçını və Kəlbəcəri tərk edərkən bu ərazilərə 17 maşın mina yerləşdiriblər. Beynəlxalq təşkilatlar bu reallığı görməlidir və işğaldan azad edilmiş ərazilərin mina xəritələrini Azərbaycana təhvil verməsi üçün Ermənistana təzyiqləri artırmalıdır. Ancaq təəssüflə qeyd edim ki, biz fərqli reaksiyanı görürük. Avropanın əksər qurumları tərəflərin hər ikisini minalarla bağlı obyektiv mövqe tutmağa çağırır. Son bəyanatda da biz məsuliyyətin eyniləşdirilməsinin şahidi olduq. Azərbaycan öz ərazilərini işğaldan azad edib, Ermənistanın bir qarış torpağını da işğal etməyib ki, ora mina basdırsın. Bu baxımdan da minalarla bağlı tənqid səslənəndə, ünvan birmənalı olaraq Ermənistan göstərilməli və bütün müraciətlər ona olunmalıdır”.
Ekspertin sözlərinə görə, bu, Ermənistanın beynəlxalq hüququ pozması deməkdir: “Minanın əsas məqsədi kimisə öldürməkdir. Minaları gizlətməklə Ermənistan Azərbaycanın mülki əhalisini öldürmək misssiyasını davam etdirir. Biz bütün beynəlxalq platformalardan istifadə edərək təşkilatlara da müraciət etmişik. Azərbaycanın mülki əhalisi minalara görə öz evlərinə qayıda bilmir. Yaxşı olar ki, Avropa qurumları Ermənistanı bu mövzuda konstruktiv olmağa cəlb etsin”.
Məhəmmədəli QƏRİBLİ
