Erməni mediası yazır ki, “Qallap”ın (Gallup) Ermənistanda keçirdiyi sorğuda Qarabağın statusu məsələsinin ermənilər üçün artıq prioritet olmadığı məlum olub.
Məsələ ondadır ki, sorğuya görə, Əliyev Qarabağın statusu məsələsini erməni xalqının da gündəmindən çıxarıb. Sorğuda “Ermənistanın üzləşdiyi ən kəskin problem nədir” sualına respondentlərin cəmi 0,7 faizi “Dağlıq Qarabağın statusu” cavabını verib. Bu isə “Qarabağ müstəqil olmayacaq” həqiqətinin erməni cəmiyyəti tərəfindən qəbul edildiyi deməkdir.
Görünən odur ki, Ermənistan rəsmiləri, yeri gəldi-gəlmədi, Qarabağın statusunu qabartsalar da, bu, erməni cəmiyyəti üçün maraqlı deyil. Məsələn, Ermənistan Prezidenti Armen Sarkisyan Qazaxıstandakı erməni icmasının üzvləri ilə görüşündə statusdan dəm vurub: “Qarabağda müharibə bitməyib, sadəcə, atəşkəs imzalanıb. Müharibə bitməyib, sülh razlaşması yoxdur. Məlum deyil, “Artsax”ın statusu necə olacaq”.
Ermənistanda yaşayan əhalini onların acınacaqlı durumu, bəlli olmayan gələcəkləri düşündürür. Qarabağ hər zaman Ermənistana yük, ölkənin inkişafına maneə yaradan sədd olub. Bunu erməni cəmiyyəti yaxşı bilir. 44 günlük müharibənin nəticələri isə bir daha statusun geri qayıtmayacağını ortaya qoydu. Məlum müharibədən sonra erməni cəmiyyəti status barədə danışmağın əhəmiyyətsiz olduğunun fərqindədir.
Maraqlıdır, bəs ekspertlər bunu necə dəyərləndirirlər?
“...statusla bağlı düşüncələrə qapılmaq intihara bərabər bir addımdır”
Məsələyə münasibət bildirən millət vəkili, politoloq Elman Nəsirov erməni cəmiyyətinin Qarabağın status məsələsinə biganə yanaşmasını bir sıra amillərlə əlaqələndirdi: “İyunun 20-də ölkədə keçiriləcək parlament seçkiləri ilə əlaqədar siyasi hərarət çox yüksəkdir. Seçkilərlə əlaqədar tərəflər bir-birini vətənə xəyanətdən tutmuş, hər şeydə ittiham edirlər. Belə bir reallıqda “Qallap”ın keçirdiyi sorğunun nəticələri olduqca maraqlıdır. Artıq Dağlıq Qarabağ erməniləri narahat edən əsas məsələ deyil. Ermənilərin bununla bağlı gözləntilərinin puç olması təsadüfi deyil. 1988-ci ildə yaranan eyforiyadan sonra Azərbaycan ərazilərini işğal edən Ermənistan cəmiyyəti hesab edirdi ki, onlar cənnətə düşəcəklər. Qarabağı işğal etməklə onların iqtisadi durumu yüksək səviyyədə olacaq, yağ-bal içində yaşayacaqlar. Bu cür illüziyalarla yaşayırdılar. Ancaq reallıq tamam fərqli oldu. Gördülər ki, işğaldan ancaq kiçik bir qrup varlanmaq üçün istifadə etdi. Cəmiyyət səfalət, məhrumiyyətlər içində yaşadı. Qarabağın nemətləri isə Ermənistanda kriminal oliqarxların əlində cəmləşdi. Ermənistan cəmiyyəti Qarabağa görə aldandığını dərk etdi. Lənətlənmiş ölkəni tərk etməkdən başqa çarələrinin olmadığını deyərək Ermənistanı tərk etməyə başladılar. Ermənistanın boşalması 90-cı illərin ortalarından başladı. Bu onlara bədbəxtlik gətirdi. Çünki başqasının bədbəxtliyi üzərində xoşbəxtlik qurmaq mümkün deyil.
2018-ci ildə Ermənistanda məlum inqilab baş verdi və ondan sonra ölkədə gedən proseslər bəllidir. Belə olan halda, erməni cəmiyyyəti anlayır ki, onların nicatı Qarabağla bağlı deyil. Çünki Qarabağ erməni torpağı deyil və bu səbəbdən də bu barədə düşünmək istəmirlər. Növbəti 30 ili də Qarabağla bağlı illüziya qurmaq istəmirlər. Çünki Qarabağın statusu ilə bağlı düşüncələrə qapılmaq intihara bərabər bir addımdır. Bu istiqamətdə Prezident İlham Əliyevin apardığı siyasətə daxilən həsəd aparırlar. Prezidentin qətiyyəti sayəsində işğala son qoyuldu. Prezident qeyd etdi ki, hansısa statusdan söhbət gedə bilməz”.
Millət vəkili onu da qeyd etdi ki, status məsələsini ermənilər birdəfəlik unutmalıdırlar.
Vidadi ORDAHALLI
