Beynəlxalq təşkilatlar “Ermənistan sevdası”ndan əl çəkmək istəmirlər. Bunu bir təşkilatın Kəlbəcərdə Ermənistanın mina terrorunun qurbanı olan vətəndaşlarımızla bağlı yaydığı bəyanatdan açıq görmək mümkündür.
“Human Rights Watch” təşkilatının yaydığı bəyanata diqqət yetirək. Bəyanatda deyilir: “Azərbaycanda - Kəlbəcər yaxınlığında tank əleyhinə minanın üç mülki şəxsin ölümünə səbəb olduğu bildirilir. Xüsusən minanın yeni qoyulması və ya birbaşa mülki əhalini hədəf alması narahatlıq doğurur. Minalar mülki əhali üçün davamlı təhlükə yaradır və münaqişədən sonrakı bərpa işlərinə mane olur”.
“Human Rights Watch”ın bəyanatında Azərbaycan ərazilərinə mina basdıran, mülki əhalini hədəfə alan Ermənistanın adı çəkilməyib. Təşkilat “bu terroru törədən Ermənistandır” deyib bu ölkənin cinayətlərini ifşa etmir.
“...Kəlbəcərdə mina terrorunun Ermənistan tərəfindən törədildiyi barədə və bu ölkəyə qarşı sanksiyalar tətbiq edilməli olduğu tələbi ilə çıxış etmək əvəzinə, üstüörtülü danışır”
“Müasir İnkişaf” İctimai Birliyinin rəhbəri, siyasi ekspert Mübariz Göyüşlü baki-xeber.com-a bildirdi ki, “Human Rights Watch” burada da Ermənistanpərəstliyini gizlətməyib. “Çox təəssüflər olsun ki, “Human Rights Watch” başda olmaqla, beynəlxalq təşkilatların bizə qarşı qərəzli mövqelərini, dolayısı ilə Ermənistanın tərəfini tutduqlarını ilk dəfə deyil görürük, bunu əvvəllər də dəfələrlə müşahidə etmişik. Bu qurumun istər Azərbaycana, istərsə də Türkiyəyə qarşı kiçik bir məsələyə görə belə qərəzli mövqeyini hər zaman görmüşük. Bu təşkilatların bizə qarşı “stəkanda fırtına yaratmaq” fəaliyyətləri həmişə olub, təəssüf ki, bu gün də var. Amma bütün dünyanın gördüyü aqressiyanı, zorakılığı, təcavüzü, işğalı öz siyasətinə çevirən Ermənistanı qınamağa gələndə ya bunu “görmürlər”, ya “eşitmirlər”, ya da “hiss etmirlər”. Bu bəyanatda mina terrorunun baiskarı kimi Ermənistanın adının çəkilməməsi belə təəssürat yaradır ki, bu ölkə beynəlxalq təşkilatların “dəcəl uşağı”dır, ona görə ona heç nə demirlər. Hər kəs görür ki, Azərbaycan ərazisinin minalanması Ermənistanın terrorçu-təxribatçı fəaliyyətinin nəticəsidir. Bilirsiniz ki, biz müharibə bitdikdən sonra böyük humanistlik göstərərək ermənilərin Kəlbəcərdən çıxmasına 10 gün möhlət verdik, hətta bu möhləti uzatdıq da. Kəlbəcərdən çıxmaqlarına vaxt verdiyimiz müddətdə erməni terrorçuları bu ərazimizdə də minaları yerləşdirdilər. Ermənistanın basdırdığı minalar mülki əhalinin və hərbi qulluqçuların yaralanması, şəhid olması ilə nəticələnir, dünya isə, həmişə olduğu kimi, “kardır”, “kordur”. Ona görə də, hesab edirəm, Azərbaycan necə ki, ATƏT-in Minsk Qrupunun yarıtmaz fəaliyyətindən bezərək torpaqlarını özü işğaldan azad etdi, Ermənistan terrorunu bu şəkildə davam etdirərsə, Ermənistanı cəzalandırmaqdan ötrü sərt addımlar atmalıdır”.
M.Göyüşlü hesab edir ki, Ermənistan elə ölkədir, ermənilər elə toplumdur ki, qarşılarında güc, başlarında dəmir yumruq görməsələr qorxmazlar. M.Göyüşlünün sözlərinə görə, terrorçu ilə öz dilində danışmaq lazımdır ki, bu həm Ermənistana, həm də ona arxa-dayaq duran beynəlxalq təşkilatlara dərs olsun. “Kəlbəcərdə Ermənistanın terroru nəticəsində həlak olanların ikisi jurnalistdir. Bu gün dünyanın aparıcı media təşkilatlarının, beynəlxalq media institutlarının bəyanat verməsi, açıq şəkildə Ermənistanın terrorunu pisləməsi, tənqid etməsi lazımdır, amma onlar susurlar. “Human Rights Watch” Kəlbəcərdə mina terrorunun Ermənistan tərəfindən törədildiyi barədə və bu ölkəyə qarşı sanksiyalar tətbiq edilməli olduğu tələbi ilə çıxış etmək əvəzinə, üstüörtülü danışır. Konkret olaraq mina terrorunu Ermənistanın törətdiyi göstərilməlidir ki, Kəlbəcərə, digər Azərbaycan ərazilərinə minaları bu terrorçu ölkə yerləşdirib, basdırıb. Amma təşkilat qərəzi, natamam yanaşmanı həqiqətdən, insan həyatından üstün tutduğunu öz Ermənistanpərəstliyi ilə bir daha ortaya qoydu” - deyə M.Göyüşlü bildirdi.
Bu təşkilatın Soros Fondundan və başqa ziyanlı xarici təşkilatlardan maliyyələşən, öz ölkəsini satan, qaralayan jurnalistlərə, blogerlərə, siyasilərə havadarlıq etdiyini deyən ekspert hesab edir ki, bu qurum hər zaman Azərbaycana qarşı qərəz sərgiləyib.
İradə SARIYEVA
