Ağ Evin rəhbəri, prezident Co Baydenin imzaladığı memorandumda deyilir ki, ABŞ xarici siyasətdə milli təhlükəsizlik sahəsində özünün əsas vəzifəsi olaraq korrupsiya ilə mübarizəni görür:
“Bundan başqa, Birləşmiş Ştatlar rəqəmsallığa və kibertəhlükəsizliyin təmininə xüsusi diqqət ayıracaq. Bundan sonra federal agentliklər korrupsiya, daha doğrusu, maliyyə cinayətlərinə daha çox köklənəcək. Bu yöndə antikorrupsiya qanunvericiliyinin modernləşdirilməsi nəzərdə tutulur. Bunların içində kriptovalyutalardan və digər texnologiyalardan istifadə edən cinayətkarlara qarşı sərt tədbirlər planı da var”.
ABŞ rəsmi dairələrindən bildiriblər ki, onlar kriptovalyutanı maliyyə maxinasiyalarının bir üsulu kimi gözdən keçirir, lakin bununla bərabər, yeni texnologiyaları məhdudlaşdırmağı nəzərdə tutmurlar. Xəbərdə xarici siyasətdə antikorrupsiya istiqamətinin Baydenin əsas prioritetlərindən biri olduğu, onun bu məsələdə qlobal səviyyədə hərəkət edəcəyi vurğulanıb.
ABŞ-ın elan etdiyi bu yeni strategiya nəyi deməyə əsas verir? Belə çıxır ki, həmin ölkə başqa dövlətlərdəki korrupsiya ilə də mübarizə aparacaq?
Milli Qeyri Hökumət Təşkilatları Forumunun rəhbəri Rauf Zeyni qəzetimizə bildirdi ki, ABŞ-ın bu bəla ilə qlobal mübarizəyə səsləməsi yaxşı haldır: “Ancaq bəzən görürük ki, hansısa superdövlət müəyyən bir ideologiyanı əlində rəhbər tutaraq digər ölkələrə təzyiq yolunu seçir. ABŞ uzun müddət demokratiya məfhumundan bu istiqamətdə istifadə etdi. Ölkələrin daxili işlərinə demokratiyanın olmaması bəhanəsilə qarışdı. Sonra gördük ki, demokratiya sahəsində ABŞ-ın özündə çox ciddi problemlər var. Yəqin ki, Bayden indi də korrupsiyaya qarşı mübarizə mexanizimini ortaya atmaqla bu yolu tutmaq istəyir. Ancaq özünə hörmət edən, qanunun aliliyini əsas götürən ölkələrin özləri bu bəla ilə daxili qanunvericiliyi çərçivəsində mübarizə aparır. Bizim ölkədə korrupsiyaya qarşı mübarizə gücləndirilir. Son vaxtlar həyata keçirilən tədbirlər, o cümlədən kadr islahatları bunun bariz nümunəsidir. Həyata keçirilən dərin islahatlar kursu ölkənin sosial, iqtisadi, siyasi, ictimai, mədəni həyatını əhatə edir, şəffaf və ədalətli idarəçilik sisteminin daha da gücləndirilməsini, vətəndaş məmnunluğunun təmin edilməsini başlıca vəzifələrdən biri kimi qarşıya qoyur.
Azərbaycanın korrupsiyaya qarşı mübarizə təcrübəsi sistemli, hərtərəfli və innovativ xarakter daşıyır. Korrupsiya ilə mübarizə sahəsində müvafiq proqramlar, qanunvericilik aktları qəbul edilir. Görülən bütün bu işlər isə öz bəhrəsini verir. Bunu müxtəlif vaxtlarda imzalanan sərəncamlar, fərmanlar və digər sənədlər də təsdiqləyir.
Həmçinin, korrupsiyaya qarşı mübarizə dövlət komissiyasınn yaradılması, bu istiqamətdə xüsusi dövlət proqramının hazırlanması, ASAN xidmət kimi ölkənin brendinə çevrilən ciddi bir layihənin irəli sürülməsi məhz rüşvətxorluğa, bürokratiyaya qarşı mübarizə məqsədlidir.
Prezident, demək olar, bütün çıxışlarında şəffaflığın təmin olunması, ictimai nəzarətin yaradılması, məmurların vətəndaşlara layiqli xidmət göstərmələri barədə çıxışlar edir. Dünya dövlətləri də Azərbaycanda həyata keçirilən işləri görür və təqdir edirlər. Hesab edirəm ki, bizdən nümunə götürmək lazımdır”.
Məhəmmədəli QƏRİBLİ
