Azərbaycan Prezidenti İlham Əliyev ilə Çin Xalq Respublikasının Sədri Si Cinpin arasında telefon söhbəti olub. İki ölkə rəhbərləri bir sıra məsələləri müzakirə ediblər.
Qeyd olunub ki, Azərbaycan və Çin siyasi, iqtisadi və nəqliyyat-logistika sahələrində uğurla əməkdaşlıq edirlər. Dövlət başçısı Azərbaycanın Çinlə əlaqələri daha da möhkəmləndirməyə hazır olduğunu qeyd edib və Çin şirkətlərinin Azərbaycanda fəaliyyətinin daha da genişləndirilməsini alqışlayıb.
Si Cinpin Çin-Azərbaycan münasibətlərinin yeni tarixi mərhələnin astanasında olduğunu vurğulayıb və bildirib ki, hər iki ölkə ənənəvi dostluğu inkişaf etdirir, əməkdaşlığı dərinləşdirir və qarşılıqlı dəstəyi artırır. ÇXR Sədri Azərbaycanın “Bir kəmər bir yol” təşəbbüsünün reallaşdırılması istiqamətində vacib tərəfdaş olduğunu və Çinin Azərbaycan xalqının seçdiyi inkişaf yolunu dəstəklədiyini vurğulayıb. İki ölkənin nəqliyyat və logistika sahəsində əməkdaşlığı dərinləşdirməsinin, Mərkəzi Asiya və Avropada nəqliyyat dəhlizlərinin yaradılmasını təşviq etməsinin zəruriliyi qeyd olunub. Si Cinpin Çin şirkətlərinin Azərbaycana investisiya qoyuluşunu daha da təşviq etməyə, infrastruktur layihələri çərçivəsində əməkdaşlığı inkişaf etdirməyə hazır olduqlarını bildirib. Eyni zamanda, o, Çinin Azərbaycandan yüksək keyfiyyətli xüsusi məhsulları idxal etmək niyyətində olduğunu vurğulayıb.
Bütün bu deyilənlərin fonunda, Çin-Azərbaycan münasibətlərinin yeni tarixi mərhələnin astanasında olması nə deməkdir?
“Çinin azad olunan ərazilərin bərpasında iştirakı, bu məqsədlə sərmayə qoyuluşlarını artıracağı gözlənir”
Məsələyə münasibət bildirən ekspert Rəsul Cahangirlinin sözlərinə görə, bu o deməkdir ki, iki ölkə arasında əlaqələr bundan sonra daha da genişlənəcək: “Söhbət 44 günlük Vətən müharibəsindən sonra regionda yaranan yeni imkanlardan gedir. Azərbaycan Asiya ilə Avropanı birləşdirən körpü olduğuna görə Çinin bu imkanlardan tranzit məqsədilə daha çox istifadə edəcəyi gözlənir. Azərbaycan və Çin arasında iqtisadi-ticarət əlaqələrinin daha da artacağı gözlənir. Çinin Cənubi Qafqaz ölkələri ilə ticarətində Azərbaycanın payı 45% təşkil edir. Azərbaycan-Çin ikitərəfli ticarət dövriyyəsi son illər xeyli yüksəlib. Son 5 ildə idxal-ixrac dinamikası xeyli artıb. Belə ki, 2015-ci ildə ticarət dövriyyəsi 561 milyon dollar, 2016-cı ildə 975 milyon dollar, 2017-ci ildə 1 milyard 300 milyon dollar, 2018-ci ildə 1 milyard 310 milyon dollar, 2019 və 2020-ci illərdə 2,2 milyard dollar olub. Çin şirkətləri Azərbaycana 900 milyon dollardan çox investisiya yatırıblar. Azərbaycanda 120-yə yaxın Çin sərmayəli şirkət fəaliyyət göstərir. 2015-ci ildən etibarən Çindən ilk konteyner qatarı Xəzər dənizindən keçməklə Azərbaycana gəlib və 2018-ci ildə Bakı-Tiflis-Qars dəmir yolu vasitəsilə yükdaşıma həyata keçirilir. Bütün bunlarla yanaşı, Çinin azad olunan ərazilərin bərpasında iştirakı, bu məqsədlə sərmayə qoyuluşlarını artıracağı gözlənir. Yeni tarixi mərhələ həm də bu deməkdir”.
Bir sözlə, ekspert hesab edir ki, Çin Azərbaycanla əlaqələrə xüsusi önəm verir.
Vidadi ORDAHALLI
