Azərbaycanda təhsil alan bir qrup əcnəbi tələbə işğaldan azad olunmuş Füzuli və Cəbrayıl rayonlarına səfər edib. Səfər “Azərbaycan gəncliyi 2017-2021-ci illərdə” Dövlət Proqramının gənclərin beynəlxalq əməkdaşlığı və mübadiləsinin genişləndirilməsi bəndinin icrası ilə əlaqədar icra olunub.
Səfərdə 40-dək tələbə iştirak edib. Tədbirin icraçıları Bakı Şəhər Gənclər və İdman Baş İdarəsi, Təhsil və Müdafiə nazirlikləridir.
Əcnəbi tələbələrin işğaldan azad edilmiş ərazilərimizə səfər etmələri erməni cinayətlərinin dünyada tanıdılmasında əhəmiyyətli rol oynaya bilər.
“Əcnəbi tələbələrə ermənilərin kəndlərimizi, şəhərlərimizi, tarixi abidələrimizi dağıtmalarını və burada daşı daş üstə qoymadıqlarını göstərmək...”
Gənc Alim, Aspirant və Magistrlər Cəmiyyətinin sədri, fizika-riyaziyyat üzrə fəlsəfə doktoru İlqar Orucov bildirdi ki, Azərbaycanda təhsil alan əcnəbi tələbələrin işğaldan azad olunmuş Füzuli və Cəbrayıla səfərlərinin nəticəsi bizim xeyrimizə olacaq: “Erməni vandalizmini əcnəbi tələbələrin öz gözləri ilə görmələri o nəticəyə gəlməyə imkan verir ki, onların hər biri ölkələrinə qayıtdıqdan sonra öz təəssüratlarını paylaşacaqlar. Onlar görəcəklər ki, Azərbaycan xalqı necə qorxulu və vəhşi bir düşmənlə üz-üzə qalıb, Füzuli və Cəbrayılda gördükləri də bu vəhşiliyin göstəricisidir. Düşünürəm ki, bu istiqamətdə işlərimizi daha da genişləndirməli və davam etdirməliyik. Xatırlayıram ki, biz Azərbaycanda beynəlxalq tədbirlər keçirərkən hər zaman tədbirlərin bir-ikisini rayonlara salırdıq. Məqsəd də o idi ki, xaricdən gələn qonaqlar Azərbaycanın inkişafını görsünlər. Bu isə bir qədər fərqli formatdır, düşmən 30 il müddətində Azərbaycan ərazilərində vəhşiliklər törədib, maddi mədəniyyət abidələrimizi, məscidlərimizi, evlərimizi və sair dağıdıb, məhv edib. Əcnəbi tələbələr erməni vandalizminin şahidi olurlar və onların daşı daş üstə qoymadıqlarını açıq müşahidə edirlər. Cənab Prezidentin dediyi kimi, bu ərazilərimizdə düşmən daşı daş üstündə qoymayıb. Əcnəbi tələbələrə ermənilərin kəndlərimizi, şəhərlərimizi, tarixi abidələrimizi və sair dağıtmalarını və burada daşı daş üstə qoymadıqlarını göstərmək effektiv nəticə verəcək. Əcnəbi tələbələr öz ölkələrində ermənilərin əsl simasını göstərəcəklər və onları ifşa edəcəklər”.
İ.Orucov qeyd etdi ki, müharibənin əvvəllərində təşkilat olaraq beynəlxalq elm, təhsil işçilərinə, bu sahə ilə məşğul olan qurumlara müraciətlər edilib və ermənilərin sivil, dinc əhalini atəşə tutduqları barədə məlumatlar göndərilib. “Düşmən o qədər qəddardır ki, müharibənin gedişində şagirdlərimizi də hədəfə alıb, onları qətlə yetirib, məktəbləri, kitabxanaları dağıdıb, humanitar fəlakətə səbəb olub. Erməni vandalizmi təkcə Azərbaycanın problemi deyil, bu, bütün bəşəriyyətin üzləşdiyi problemdir” - deyə İ.Orucov vurğuladı.
İradə SARIYEVA
