Mədəniyyət kitabdan, kitabxanadan başlayır deyimində böyük həqiqət var. Amma kitaba olan soyuq münasibətimiz özünü kitabxanalara münasibətdə də göstərir. Təəssüf ki, respublikamızın heç də hər yerində olan kitabxanaların inkişafına diqqət yetirilmir.
Müəyyən hallarda rayon və kənd kitabxanalarının bəzilərini çox acınacaqlı durumda görürük. Bəzi kitabxanalarda nəinki müasir texniki avadanlıqlar, elektron kitabxana sistemi, şəbəkəsi qurulmayıb, hətta XXI əsrdə təmirsiz kitabxanaya da rast gəlmək mümkündür. Məlumatlara görə, rayon və kənd kitabxalarınin əksəriyyəti indiyə qədər internet resursları ilə təmin edilməyib, bölgə kitabxanalarının elektron bazaları yaradılmayıb. Ən ucqar kənddə belə evlərdə internet tapmaq olur, amma hələ kənd, rayon kitabxanalarında elektronlasdirilma getməyib. Bu fikirlə, iddia ilə tez-tez rastlaşırıq. Halbuki, bu proses çoxdan başa çatmalı idi, amma bildirildiyinə görə, bəzi kitabxanaların elektronlaşdırılması sahəsində hələ də ciddi problemler qalmaqdadır.
Ekspertlər deyir ki, Mədəniyyət Nazirliyi həmişə əsasən mərkəzi yerlərdə, göz önündə olan kitabxanaların elektronlaşdırılmasına üstünlük verib. Nazirliyin keçmiş rəhbərliyinin dövründə kənd kitabxanalarının elektronlaşdırılması sahəsində ortaya çıxan əsas problemin internet təminatı ilə bağlı olduğu qeyd edilir, bu gün də mövcud problemin qalmasında internetin zəif olması əsas səbəblərdən biri kimi göstərilir.
Məlumatlara görə, hələ də rayon və kəndlərin bəzilərinin kitabxanalarında bu ciddi problem qalmaqdadır.
“...Bəzi kənd kitabxanalarında problem var”
Mədəniyyət Nazirliyinin Kitab Sənayesi şöbəsinin aparıcı məsləhətçisi Xəyal Məmmədov “Bakı-Xəbər”ə bildirdi ki, kənd və rayon kitabxanalarının elektronlaşdırılması istiqamətində işlər görülüb. “Məlumat üçün bildirim ki, bu gün bizim 75 mərkəzi kitabxananın hər biri internetlə təchiz olunub. Onların 45-də ALİSA quraşdırılıb. Bu, milli kitabxana İnformasiya sistemidir, burada kitabların biblioqrafiya prosesi avtomatlaşdırılıb. Bunun içində elektron kataloqlar, elektron kitab bazası var. Buradan respublikada olan kitabxanaların hamısının fondunda saxlanılan kitablarla bağlı məlumatlar əldə etmək tam mümkündür”.
X.Məmmədov qeyd etdi ki, avtomatlaşmış kitabxana sisteminə daxil olmaqla kitabxananın fondunda saxlanılan kitabların sayı, onların müəllifi, adı və sairlə bağlı məlumat almaq, eyni zamanda kitabların annotasiyası ilə tanış olmaq olar.
“Sizin açıqlamanızadan belə nəticəyə gəlmək olur ki, respublikada kitabxanaların elektronlaşdırılması, onların avtomatlaşdırılmış kitabxana sisteminə qoşulması və sair məsələlər həll edilib, bu sahədə heç bir qayğı yoxdur. Amma, xüsusən də kənd kitabxanalarından şikayətlər eşidirik ki, kitabxanalar hələ də elektronlaşdırılmayıb. Kənd kitabxanalarının bəzilərindən verilən məlumata görə, onlar hələ də adicə internetlə təmin olunmayıblar. Bu barədə nə deyə bilərsiz, bəzi kənd kitabxanalarının təmsilçiləri haqlıdırmı” sualımıza cavab olaraq X.Məmmədov bildirdi ki, bəzi kənd kitabxanalarında bu problem mövcuddur, lakin priblemin aradan qaldırılması istiqamətində addımlar atılır: “Bəli, bəzi kənd kitabxanalarında problem var. Onlarda dislayn internetdən istifadə olunur. Onların bir çoxu artıq o şəbəkəyə qoşulub. Nəzərə alın ki, bu, Mərkəzi Kitabxana Sistemində quraşdırıldığı zaman MKS-in bütün filialları da bu sistemə qoşulmuş olur”.
X.Məmmədov deyir ki, sayta daxil olmaqla bütün kənd və qəsəbələrin də kitabxanalarında olan kitabların kataloqlarda olduğunu görmək olur, istənilən adam o kitabları rezerv edib yaxınlaşıb götürə bilir.
Bu istiqamətdə işlərin genişləndirildiyini deyən müsahibimizin sözlərinə görə, hazırda Mədəniyyət Nazirliyi kitabxana və biblioqrafiya proseslərinin avtomatlaşdırılması ilə bağlı Türkiyə təcrübəsini öyrənir, bu yaxınlarda Türkiyədə bu sahə ilə məşğul olan məsul şəxslər Azərbaycanda olub və bu istiqamətdə geniş tərkibdə müzakirələr aparılıb. O qeyd etdi ki, Azərbaycanla Türkiyə arasında bu istiqamətdə əməkdaşlıq mübadiləsi davam etdirilir və Türkiyənin bu sahədə milli sistemi olan və bir çox ölkə tərəfindən qəbul edilən KOHA sistemi ilə bizim sistem bir-birinə inteqrasiya ediləcək...
İradə SARIYEVA
