Günel Fərhadqızı: “Bu nəqliyyat dəhlizi geniş geoiqtisadi məkanda, o cümlədən Mərkəzi və Cənubi Asiyada, Xəzər, Qara dəniz, Aralıq dənizi hövzələrində əməkdaşlığın möhkəmlənməsinə kömək edəcək”
Bir neçə gün əvvəl Bakıda keçirilmiş Qoşulmama Hərəkatının nazirlər konfransının iştirakçıları Əfqanıstan-Türkmənistan-Azərbaycan-Gürcüstan-Türkiyə marşrutu üzrə “Lapis-Lazuli” nəqliyyat-tranzit layihəsinin reallaşdırılmasında əldə olunan nailiyyətləri alqışlayıblar.
Qeyd olunur ki, Bakıda nəqliyyat və enerji sahələrində irimiqyaslı regional infrastruktur layihələrin reallaşdırılması ilə bağlı təşəbbüslərin əks olunduğu yekun deklarasiya qəbul edilib. Bakı deklarasiyasında, həmçinin, Türkmənistan-Əfqanıstan-Pakistan-Hindistan (TAPI) qaz kəməri və Türkmənistan-Əfqanıstan dəmir yolu hissəsinin tikintisi layihələrinin reallaşdırılması üzrə səylər vurğulanıb.
Qeyd edək ki, “Lapis-Lazuli” layihəsi vasitəsilə dəmir yolları və avtomobil yolları vasitəsilə Əfqanıstanın şimalındakı Turqundi şəhəri Aşqabadla, daha sonra Türkmənbaşı ilə birləşdiriləcək. Marşrut Xəzər dənizi vasitəsilə Bakıya, oradan isə Tiflisə uzanacaq. Gürcüstan paytaxtından marşrut Poti və Batumiyə ayrılmaqla Ankaraya çatdırılacaq. “Lapis-Lazuli” Ankaradan İstanbuladək davam edəcək. Layihənin dəyəri 2 milyard dollar həcmində qiymətləndirilir.
Göründüyü kimi, bununla Azərbaycan daha bir mühüm layihədə yer alır və onun aparıcı həlqəsinə çevrilir. Ölkəmizin yeni mərkəzdə təmsil olunmasını necə dəyərləndirə bilərik?
İqtisadçı Günel Fərhadqızı qəzetimizə açıqlamasında bildirdi ki, bu, ölkəmizin logistik imkanlarını daha da genişləndirəcək və əhəmiyyətini daha da artırmış olacaq: “Bilirsiniz ki, Azərbaycan qitələri birləşdirəcək bir çox layihədə iştirak edir, hətta deyərdim ki, onların ərsəyə gəlməsində mühüm rola imza atan ölkədir. Bu xüsusda "Lapis-Lazuli" layihəsi üzrə sazişin imzalanmasını da qeyd edə bilərik. Azərbaycan təşəbbüskarı olduğu və davam etməkdə olan regional bağlılıq layihələri, o cümlədən bu yaxınlarda açılışı olmuş Bakı-Tiflis-Qars dəmir yolu, yeni Bakı Beynəlxalq Dəniz Ticarəti Limanı, Azərbaycanla İran arasında dəmir yolu şəbəkələrini əlaqələndirən Xəzər dənizi sahilindəki logistik mərkəz kimi strateji təməl komponentləri, Şərq-Qərb və Şimal-Cənub istiqamətləri üzrə çoxtərəfli imkanlara malik transregional infrastrukturun inkişafında keyfiyyətcə yeni nailiyyətləri nümayiş etdirir. Azərbaycan, Əfqanıstan, Gürcüstan, Türkiyə və Türkmənistan tərəfindən bu yaxınlarda imzalanmış "Lapis-Lazuli" razılaşması, Əfqanıstanı birbaşa Avropa ilə əlaqələndirəcək başlıca beynəlxalq, ticarət və nəqliyyat dəhlizi razılaşması bu baxımdan olduqca əhəmiyyətlidir. Bilirsiniz ki, Azərbaycan İslam Əməkdaşlıq Təşkilatının tərkibində çox fəal iştirak edir və islam əməkdaşlığına öz töhfəsini verir. Avropa ilə Asiyanı birləşdirən Bakı-Tiflis-Qars layihəsinin açılışından sonra Əfqanıstan, Türkmənistan, Azərbaycan, Gürcüstan və Türkiyə arasında "Tranzit Ticarət və Nəqliyyat üzrə Əməkdaşlıq haqqında Saziş" (Lapis-Lazuli marşrutu) imzalandı. Bu layihə Əfqanıstandan başlayaraq, Azərbaycandan da keçməklə yenə Asiyanın Avropaya qovuşmasında körpüyə çevriləcək. Bu layihə beynəlxalq nəqliyyat dəhlizlərinin iqtisadi effektivliyi baxımından olduqca böyük əhəmiyyətə malikdir. Şübhəsiz ki, Azərbaycanın regional nəqliyyat dəhlizlərinin inkişafında oynadığ rol əhəmiyyətli və müqayisəolunmazdır. “Lapis-Lazuli” marşrutu Əfqanıstanı təkcə Avropa və digər dost dövlətlərlə əlaqələndirməyəcək, həm də ölkələrimizi bir-birinə yaxınlaşdıracaq, ticarət, tranzit və investisiyaların gələcək yüksəlişi üçün imkan yaradacaq.
Hesab edirəm ki, bu layihənin reallaşdırılması regionun iqtisadi inteqrasiyasını yüksəltməyə və ticarət həcmini xeyli dərəcədə genişləndirməyə yönəlib. “Lapis-Lazuli” beynəlxalq nəqliyyat dəhlizi Əfqanıstan-Türkmənistan-Azərbaycan-Gürcüstan-Türkiyə marşrutu üzrə yükdaşımaların həcmini artırmaq üçün yeni imkanlar yaradır. Eyni zamanda, bu nəqliyyat dəhlizi geniş geoiqtisadi məkanda, o cümlədən Mərkəzi və Cənubi Asiyada, Xəzər, Qara dəniz, Aralıq dənizi hövzələrində əməkdaşlığın möhkəmlənməsinə kömək edəcək”.
Məhəmmədəli QƏRİBLİ
