Ruslan Atakişiyev: “Dollarlaşma prosesinin azalmasına təsir edən amillərdən biri də ölkədə nağdsız hesablaşmalar haqqında qanunun qəbul olunması və bu əməliyyat növünə üstünlük verilməsidir”
Açıqlanan statistik rəqəmlərə əsasən, əmanətlərin dollarlaşma göstəricisi azalıb. 2017-ci ilin əvvəlləri ilə müqayisədə əmanətlərin dollarlaşma göstəricisi 80 faizdən 66 faizə enib.
Maliyyə Bazarlarına Nəzarət Palatasının icraçı direktoru İbrahim Alışov media nümayəndələrinə açıqlamasında qeyd edib ki, əhalinin əmanətlərinin artımı müsbət hal olmaqla yanaşı, həm də, öz növbəsində, bank sektoruna etibarın göstəricisidir: “Belə ki, əhalinin əmanətlərinin göstəricisi 2017-ci il ərzində 1,5 faiz (110 milyon manat) artaraq, 7,5 milyard manatı keçib. Son il ərzində milli valyutanın sabit kursu əmanətlərin dedollarlaşma prosesinin sürətlənməsinə səbəb olub (2017-ci ilin əvvəlləri ilə müqayisədə əmanətlərin dollarlaşma göstəricisi 80 faizdən 66 faizə enib)”.
Əmanətlərin dollarlaşma səviyyəsinin 80 faizdən 66 faizə düşməsini şərh edən iqtisadçı-ekspert Ruslan Atakişiyev “Bakı-Xəbər”ə açıqlamasında bildirdi ki, son zamanlar Azərbaycanda əmanətlərin dollarlaşma prosesi zəifləyib: “Dollarlaşma prosesinin azalmasına təsir edən amillərdən biri də ölkədə nağdsız hesablaşmalar haqqında qanunun qəbul olunması və bu əməliyyat növünə üstünlük verilməsidir”.
Həmsöhbətimizin sözlərinə görə, son zamanlar yatırılan əmanətlərdə xarici valyutaya deyil, manata daha çox etibar olunur. Bunun da səbəbi milli valyutanın məzənnəsinin stabil olmasıdır: “Uzun müddətdir manatın məzənnəsi xarici valyutaya nisbətən stabil olaraq qalır. Bu vəziyyət, təbii ki, əmanətlərə təsir edir”.
İqtisadçı onu da əlavə etdi ki, ölkə daxilində alış-verişin milli valyuta ilə aparılması manatın nüfuzuna təsir edir. Təbii ki, bu hal manatla qoyulan əmanətlərin artmasına səbəb olur: “Onu da deyim ki, manatla yerləşdirilən sığorta olunan əmanətlərin faiz dərəcəsi xarici valyuta ilə qoyulan depozitə nisbətən yüksəkdir. Əmanətçilər faiz dərəcəsi yüksək olan manatla depozit qoymağa daha çox üstünlük verirlər. Eyni zamanda, kreditləşmə prosesində də manata daha çox üstünlük verilir. Bu kimi hallar manata inamı artıq geri qaytarır”.
Günel CƏLİLOVA
