Aydın Hüseynov: “Ölkədə aparılan maliyyə, pul-kredit siyasəti çox düzgün şəkildə müəyyənləşdirilib”
Əhalinin sosial müdafiəsində iş yerlərinin açılması mühüm rol oynayır. Elə ölkədə həyata keçirilən iqtisadi siyasətin əsas məqsədlərindən biri də yeni iş yerləri yaratmaqla əhalinin sosial müdafiəsini təmin etməkdir. Bu məqsədlə həm də özəl sektora və sahibkarlığa da böyük dəstək göstərilir - vergi yükü azaldılır, onlara güzəştli şərtlərlə kreditlər verilir.
İqtisadi inkişafda sosialyönümlülük prinsipini əsas götürən dövlətin qarşısında duran başlıca vəzifələrdən biri bu istiqamətdə düşünülmüş, qabaqcıl dünya təcrübəsinə cavab verən siyasət yeritməkdir. Eyni zamanda, ölkə və cəmiyyət reallıqlarını nəzərə alan siyasətin həyata keçirilməsidir. Bazar iqtisadiyyatı şəraitində yüksək səmərəli sosial siyasətin aparılması sosial ədalət, əhalinin bütün təbəqələri üçün bərabər sosial təminat siyasətinin yaradılması kimi mühüm prinsipləri özündə ehtiva edir.
Azərbaycanda bu sahədə həyata keçirilən siyasət sayəsində uğurlu nailiyyətlər qazanılıb. Təkcə cari ildə dövlət başçısı tərəfindən pensiya və müavinətlərin artırılması, müvafiq kateqoriyadan olan vətəndaşların sosial müdafiəsinin yaxşılaşdırılması üçün 13 fərman və sərəncam imzalanıb. İmzalanan bu sənədlər ümumilikdə 1 milyon 856 min nəfərin sosial rifahının yaxşılaşmasına xidmət edir. Sosial müdafiə sisteminin mühüm komponentlərindən olan pensiya təminatı bu gün əhalinin 1 milyon 318,4 min nəfərini əhatə edir.
Əhalinin sosial müdafiəsini yaxşılaşdırmaq məqsədilə fəaliyyət göstərən müavinət sistemi geniş kontingenti əhatə edir. Bu kateqoriyadan olan şəxslərin də sosial məsələlərinin həlli dövlətin diqqət mərkəzindədir. Bununla bağlı üç sərəncam imzalanıb. İmzalanan bu sərəncamlar sayəsində ümumilikdə 560 minə yaxın vətəndaşın müavinətləri artırılacaq. Bununla yanaşı, dövlət büdcəsindən maliyyələşən təşkilatlarda çalışan işçilərin maaşları martın 1-dən 10 faiz artırılıb. Bura müəllimlər, həkimlər, sosial işçilər və digər dövlət qurumlarında çalışan şəxslər daxildir.
Bütün bu deyilənlərin fonunda, maraqlıdır, ölkədə pensiya və maaşların artırılması inflyasiyaya hansısa formada təsir göstərə bilərmi?
Məsələyə münasibət bildirən millət vəkili Aydın Hüseynovun sözlərinə görə, bununla bağlı heç bir narahatlığa əsas yoxdur. O bunu bir sıra iqtisadi arqumentlərlə əsaslandırdı: “Məsələ ondadır ki, ölkədə aparılan maliyyə, pul-kredit siyasəti çox düzgün şəkildə müəyyənləşdirilib. Reallıq ondan ibarətdir ki, inflyasiyaya təsir edən bütün amillər əvvəlcədən hesablanıb və ona uyğun olaraq da iqtisadi siyasət qurulub. Ona görə də maaşların və təqaüdlərin artırılması heç bir halda ölkədəki inflyasiyaya təsir göstərməyəcək. Çünki qeyd etdiyim kimi, bu amillər əvvəlcədən nəzərə alınıb. O baxımdan çox müsbət haldır ki, əməkhaqlarının artırılması ölkədə inflyasiyaya gətirib çıxarmayacaq. Əslində, hər bir kəsin əməkhaqqı, ümumi şəkildə desək, onun cibində qalacaq. Yəni artımlar inflyasiyanın qurbanı olmayacaq. Başqa bir tərəfdən, büdcə təşkilatlarında çalışan vətəndaşların maaşlarının artması ümumi iqtisadiyyatda bir dinamizmə səbəb olur. Ona görə də düşünürəm ki, bununla bağlı narahatlığa heç bir əsas yoxdur. Ən nəhayət, bir faktoru nəzərə almaq lazımdır ki, Azərbaycan iqtisadiyyatı sürətlə inkişaf edir. Bu inkişaf iqtisadiyyatın bütün sektorlarında, xüsusən də qeyri-neft sektorunda özünü daha çox göstərir. Bu da, nəticə etibarilə ölkə iqtisadiyyatının idxaldan asılılığının minimum səviyyəyə enməsinə xidmət edir. İdxaldan asılılıq azaldıqca, ölkədə inflyasiya risqləri də aşağı həddə enir. Nəzərə alsaq ki, Azərbaycan iqtisadiyyatı dinamik və dayanıqlı şəkildə inkişaf edir, o zaman maaş və pensiyaların artırılması ümumiyyətlə inflyasiya risqi yaratmır. Bütün bunlar həm də ölkədə iqtisadi tarazlığın qorunmasına xidmət edən faktorlardır”.
Vidadi ORDAHALLI
