Qadir Bayramlı: “Həm məhsuldar çəltik sortlarının əldə olunmasında, həm də çəltik yetişdirilməsində bir çox yeni texnologiyaların…”
Azərbaycan çəltikçiliyin inkişafı ilə bağlı bir sıra institusional tədbirlərin görülməsi nəzərdə tutulub. Bu barədə Prezident İlham Əliyevin təsdiqlədiyi “Çəltikçiliyin inkişafına dair 2018-2025-ci illər üçün Dövlət Proqramı”nın həyata keçirilməsi üzrə Tədbirlər Planında bildirilir.
Tədbirlər Planına əsasən, çəltikçilik sahəsində normative-hüquqi bazanın təkmilləşdirilməsi ilə bağlı təkliflərin hazırlanması, çəltik bitkisinin əkildiyi rayonlar (zonalar) üzrə məlumat bankının yaradılması, çəltik məhsullarının istehsalı sahəsində mütərəqqi təcrübəyə malik xarici şirkətlərlə əlaqələrin genişləndirilməsi, çəltik istehsalı sahəsində sığorta mexanizminin təkmilləşdirilməsi, çəltik istehsalı üçün əkinəyararlı torpaqların müəyyən olunması və təsərrüfat subyektlərinə verilməsinin təmin olunması nəzərdə tutulub.
Çəltikçiliyin inkişafı ilə bağlı adıçəkilən məhsulların istehsalı sahəsində mütərəqqi təcrübəyə malik xarici şirkətlərlə əlaqələrin genişləndirilməsi bu sahənin inkişafına necə təsir edəcək? Ümumiyyətlə, Azərbaycan çəltik məhsullarının istehsalı ilə bağlı hansı xarici ölkə ilə əməkdaşlıq edə bilər?
Azərbaycan Dövlət İqtisad Universitetinin (UNEC) dosenti Qadir Bayramlı “Bakı-Xəbər”ə açıqlamasında qeyd etdi ki, Azərbaycanda çəltikçiliyin inkişaf etdirilməsi məsələsinə kompleks yanaşılmalıdır: “Nəzərə almaq lazımdır ki, çəltikçilik Azərbaycanın kənd təsərrüfatında ənənəvi sahələrdən biridir. Bir zamanlar ölkəmizdə onlarla çəltik sortları olub. Ancaq sonradan bu sahəyə maraq azalıb. Azərbaycanda çəltikçiliklə bağlı təcrübə var. Ancaq bununla məşğul olmuş nəsil, demək olar ki, yaşlanıb. Gənclərin arasında çəltikçiliyi necə inkişaf etdirməyi bilən çox deyil. Bu sahəni inkişaf etdirmək üçün ilk növbədə su təminatı həll olunmalıdır. Çünki bu bitkinin kökü bəzi fasilələr olmaqla əksərən suda olmalıdır”.
Həmsöhbətimiz onu da vurğuladı ki, qida təhlükəsizliyində düyü önəmli rol oynayır. İnsan sağlığı üçün ən önəmli qida məhsullarından biri düyu sayılır. Uzunömürlülər ölkəsi kimi tanınan Yaponiyada balıqla bərabər ən çox istifadə olunan qida məhz düyüdür.
Q.Bayramlının sözlərinə görə, bu gün bəzi market və dükanlarda satılan düyülərin mənşəyi məlum deyil: “Yerli istehsalı artırsaq, xoşagəlməz halları aradan qaldırmaq mümkün olar. Xarici ölkələrlə əməkdaşlığa gələndə hesab edirəm ki, əsasən Türkiyə, Orta Asiya, Çin, Hindistan, Vyetnam kimi ölkələrlə iş birliyi qurmaq olar. Qeyd etdiyim ölkələrlə əməkdaşlıq bizə faydalı olar. Həm məhsuldar çəltik sortlarının əldə olunmasında, həm də çəltik yetişdirilməsində bir çox yeni texnologiyaların istifadə qaydasını öyrənmək mümkündür. Hesab edirəm ki, çəltikçiliyin inkişafı ilə bağlı bu ölkələrlə əməkdaşlıq bizə faydalı olar. Dövlətin bu sahəyə ayırdığı diqqət sayəsində çəltikçilik inkişaf etmiş sahələrdən birinə çevrilə bilər”.
Günel CƏLİLOVA
