Sahib Məmmədov: “Əksər şirkətlər ali məktəbi bitirib nəzəri biliyə malik olan, lakin təcrübəsi olmayan gəncləri işə qəbul etmək istəmirlər”
Azərbaycanda həyata keçirilən dövlət siyasətinin əsas istiqamətlərindən biri də işsizliyin aradan qaldırılmasıdır. Bu istiqamətdə lazımi işlər görülür. Məlumat üçün bildirək ki, ölkə başçısının sərəncamı ilə "2015-2025-ci illərdə Azərbaycan gənclərinin İnkişaf Strategiyası" qəbul olunub və Dövlət Proqramının icrası da həmin Strategiyadan irəli gəlir.
Strategiyanın məqsədlərində, eyni zamanda hədəflərində, gözlənən nəticələrdə məhz gənclər arasında məşğulluğun artırılması, işsizliyin aradan qaldırılması, gənc mütəxəssislərə dəstək verilməsi, karyera qurmaq istiqamətində gənclər üçün müxtəlif layihələrin həyata keçirilməsi kimi məsələlər öz əksini tapıb. Qeyd etdiyimiz kimi, işsizliyin aradan qaldırılması üçün Azərbaycan dövləti müxtəlif layihələr həyata keçirir.
Bir neçə gün öncə keçirilən "Əmək bazarı: islahatlar və perspektivlər" mövzusunda konfransda əmək və əhalinin sosial müdafiəsi naziri Səlim Müslümov çıxış edərək bildirib ki, əmək bazarının əsas problemlərindən biri işsizlər arasında qadın və gənclərin payının yüksək olmasıdır. O bildirib ki, 2005-2016-cı illər ərzində Azərbaycanda məşğul əhalinin sayı 17.2 faiz artıb: “Bu göstərici tikinti, turistlərin yerləşdirilməsi, ictimai iaşə, informasiya və rabitə, maliyyə və sığorta fəaliyyəti sahələrində daha sürətlə artıb, mədənçıxarma sənayesi, elektrik enerjisi, qaz və buxar istehsalı, bölüşdürülməsi və təchizatı, səhiyyə və sosial xidmətlərin göstərilməsi sahələrində isə nisbətən azalma ilə müşahidə edilib”.
S.Müslümov qeyd edib ki, 2016-cı ildə Azərbaycanda adambaşına düşən ÜDM 3926 ABŞ dolları təşkil edib və Azərbaycan dünyada yüksək orta gəlirli ölkə qrupunda qərarlaşıb: “2003-2017-ci illərdə ölkədə 74 faizi və ya 1.4 milyonu daimi olan 1.9 milyon yeni iş yeri açılıb”.
Məsələ ilə bağlı fikir bildirən Əmək Hüquqlarını Müdafiə Liqasının sədri Sahib Məmmədov “Bakı-Xəbər”ə açıqlamasında qeyd etdi ki, gənclər arasında işsizliyin göstəricisi hər zaman yüksək olub. Orta yaşlı nəslin nümayəndələri hər zaman özlərinə iş tapa biliblər. Ancaq gənclər iş həyatına yeni daxil olduqları üçün iş tapmaqda çətinlik çəkirlər: “Orta məktəbi bitirib ali təhsil almayan oğlanlar hərbi xidmətə yollanırlar. Ali təhsil alanların isə universiteti bitirib hərbi xidməti başa vurduqdan sonra əmək bazarına daxil olmaq yaşı gecikir”.
Həmsöhbətimiz onu da vurğuladı ki, əksər iş yerləri ali məktəbi bitirən gəncləri işə qəbul etmək istəmirlər. Çünki o gənclərin nəzəri biliyi olsa da, təcrübəsi olmur. Şirkətlər daha çox təcrübəli işçilərə üstünlük verirlər: “Etiraf edək ki, dövlət qulluğunda bu qayda ləğv olunub”.
S.Məmmədovun sözlərinə görə, 18 yaşına çatmayan gənclər əhalinin 40 faizini təşkil edir. Bu olduqca yüksək göstəricidir. Hər il əmək bazarına nə qədər potensial işçi qüvvəsi daxil olur. Bunların hamısını işlə təmin etmək çətindir.
Liqa sədrinin sözlərinə görə, qadınların iş tapmaqda çətinlik çəkməsi demoqrafik göstərici ilə bağlıdır.
Günel CƏLİLOVA
