Vüqar Bayramov: “Xalçaçılığın inkişaf etdirilməsi nəinki qeyri-neft sektorunun genişləndirilməsi, eyni zamanda ölkəyə daxil olan valyutanın həcminin artmasına gətirib çıxara bilər”
Azərbaycanın qədim sənət əsərlərindən biri də xalçaçılıqdır. Bu sahə Sovet dönəmində Azərbaycanda inkişaf etmişdi. Ölkəmizdə istehsal olunan xalçalara xarici ölkələrdə böyük tələbat var idi. Artıq bu sektor Azərbaycanda yenidən inkişaf etməyə başlayıb. Prezidentin sərəncamları ilə bəzi bölgələrdə xalçaçılıq müəssisələri açılıb.
Bu günlərdə Qubada “Azərxalça” Açıq Səhmdar Cəmiyyətinin filialının açılışı baş tutdu.
Azərbaycan Respublikasının Prezidenti İlham Əliyev və birinci xanım Mehriban Əliyeva da açılışda istirak ediblər. Dövlət başçısı xalçaçılarla görüşü zamanı bildirib ki, xalçaçılıq sənətinə çox böyük maraq var: “Ölkəmizin dünyada təbliği işində xalçaçılıq bəlkə də ən öndə gedən sənətlərdən biridir. Eyni zamanda, xalçaçılıq sənəti iqtisadi cəhətdən də ölkəmizi gücləndirir. Çünki bu, ixrac məhsuludur. Biz çalışmalıyıq və çalışırıq ki, qeyri-neft ixracını artıraq. Əlbəttə ki, ilk növbədə, sənayenin, kənd təsərrüfatının, eyni zamanda, xalçaçılığın inkişafı bizə belə bir imkanlar yaradacaq. Biz, eyni zamanda, Sumqayıtda əyirici-boyaq fabrikinin açılışına da hazırlaşırıq. Yəni elə etməliyik ki, bütün xammal daxildə istehsal olunsun. Boyalar, iplər, hətta bütün dəzgahlar, yun tədarükü olacaq. Ona görə bugünkü hadisə çox böyük məna daşıyır. Biz gərək xalçaçılığı bərabər qoruyaq”.
Xalçaçılıq sənətinin iqtisadiyyata təsiri barədə danışan iqtisadçı-ekspert Vüqar Bayramov bildirdi ki, bu sahə ölkəmiz üçün prioritet sahələrdən biridir: “Azərbaycan xalçaları uzun müddət həm regionda, həm də dünya bazarında ən çox satılan və öz mövqeyi olan xalçalardan olub. Amma təəssüf ki xalçaçılıqda Azərbaycanın mövqeyi xeyli dərəcədə zəifləmişdi. Bu zəifləmənin müxtəlif səbəbləri var. Aqrar sektorda xalçaçılıq üçün xammal xeyli dərəcədə azaldı, bazara çıxış imkanları məhdudlaşdı. Eyni zamanda, ölkəyə xaricdən saxta xalçalar ayaq açdı. Ölkə daxilində istehsal olunan xalçalar Çindən və digər Asiya ölkələrindən gətirilən saxta xalçalarla rəqabət apara bilmədi. Nəticə etibarilə xalçaçılıq sektoru tənəzzülə uğradı. Bu kontekstdə də, təəssüf ki, Azərbaycan xalçalarının bir qismi qonşu ölkələrin məhsulu adı ilə bazara çıxarıldı. Buna görə bizim xalçanın dünya bazarında mövqeyi bir az zəifləmiş oldu. Amma Azərbaycan xalçalarının dünyada həmişə mövqeyi var. Birmənalı şəkildə Azərbaycan xalçaçılığı və xalçaları dünya bazarında öz mövqelərini bərpa etmək imkanlarına malikdir. O baxımdan Azərbaycanda xalçaçılığın inkişafı prioritet sektor olaraq çox vacibdir. Ona görə də xalçaçılıq sektorunun dəstəklənməsi, bu istiqamətdə dövlət dəstəyinin genişləndirilməsinə ehtiyac var”.
İqtisadçının sözlərinə görə, xalçaçılıq sahəsinin inkişafı istiqamətində atılan addımlar təqdirəlayiqdir. V.Bayramov onu da bildirdi ki, bu sektorun inkişafı ölkəmizə valyuta gətirmək cəhətdən də vacibdir: "Azərbaycana daha qısa zamanda valyuta gətirə biləcək sektorlardan biri məhz xalçaçılıqdır. Çünki xalçaların bazarı var. Xüsusilə MDB ölkələrinə çıxış imkanları var. Deməli, daha qısa zamanda dünya bazarına çıxmaqla gəlir əldə etmək mümkündür. Xalçaçılığın inkişaf etdirilməsi nəinki qeyri-neft sektorunun genişləndirilməsi, eyni zamanda ölkəyə daxil olan valyutanın həcminin artmasına gətirib çıxara bilər”.
Günel CƏLİLOVA
