Günel Fərhadqızı: “Bu sahədə atılan addımlar və görülmüş islahatlar belə beynəlxalq qiymətləndirmənin ortaya çıxmasına əsas verir”
Azərbaycan ərzaq təhlükəsizliyinin təmin edilməsinə və aclığın aradan qaldırılmasına ehtiyacı olan ölkələrə dəstək üçün böyük potensiala malikdir. Bunu müsahibəsində BMT-nin Ərzaq və Kənd Təsərrüfatı Təşkilatının (FAO) baş direktorunun müavini və Avropa və Mərkəzi Asiya üzrə regional direktoru Vladimir Rəhmanin bildirib.
Onun sözlərinə görə, Azərbaycan və FAO regionun başqa ölkələrində və regiondan kənar bu istiqamətdə əməkdaşlıqlarını genişləndirə bilərlər: “Üstəlik, mən ürəkdən inanıram ki, gələcəkdə Azərbaycan da ərzaq təhlükəsizliyi idarəsinin və kənd təsərrüfatı istehsalı sahəsində öz təcrübə və nou-hau-su ilə digər ölkələrlə bölüşə bilər”.
FAO və Azərbaycanın münasibətləri haqda danışaraq V.Rəhmanin vurğulayıb ki, təşkilatın yerli nümayəndəliyi müxtəlif dövlət qurumları ilə sıx əməkdaşlıq edir: “Biz təşkilatın fəaliyyəti, məqsədi və siyasəti barədə ictimaiyyəti məlumatlandırmağa göstərdiyi dəstəyə görə, eləcə də genetik resursların mühafizəsi və Ətraf Mühitin Mühafizəsi naminə Beynəlxalq Dialoq çərçivəsində (IDEA) Azərbaycanın kənd rayonlarının inkişafı sahəsində liderliyinə görə FAO-nun xoşməramlı səfiri Leyla Əliyevaya minnətdarıq”.
Regional direktor əlavə edib ki, IDEA və BMT Azərbaycanda davamlı inkişaf məqsədlərinin təbliği sahəsində əməkdaşlıq imkanlarını müzakirə edirlər.
V.Rəhmanin bildirib ki, Azərbaycan hökuməti tərəfindən uğurla həyata keçirilən inkişaf strategiyası əhalinin gəlirlərinin artmasına və ölkədə ərzaq təhlükəsizliyinin təmin edilməsinə gətirib çıxarıb: “Bununla belə, qida məhsullarının tələbatı monitorinqi və artımın gecikməsi və qanazlığı problemlərinin həlli üçün insanların rasionunu artırmaq vacibdir”.
Göründüyü kimi, BMT nümayəndəsi bildirib ki, gələcəkdə Azərbaycan da ərzaq təhlükəsizliyi idarəsinin və kənd təsərrüfatı istehsalı sahəsində öz təcrübəsi ilə digər ölkələrlə bölüşə bilər.
Azərbaycana bu sahədə verilən yüksək qiymət nə ilə bağlıdır?
İqtisadçı Günel Fərhadqızının sözlərinə görə, bunu Azərbaycanın həyata keçirdiyi düzgün iqtisadi siyasət kursu ilə əlaqələndirə bilərik: “Rəqabətədavamlılığın təmin edilməsi və yerli istehsalçılarının iqtisadi maraqlarının müdafiəsi məqsədilə ötən il “Antidempinq, kompensasiya və mühafizə tədbirləri haqqında” Qanun qəbul edilib. Bu qanun ölkəmizin iqtisadi marağının üstünlüyü çərçivəsində çox böyük önəmə malikdir. Cari ilin yanvar ayında Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasında da Prezidentimiz sənayeləşmə, qeyri-neft sektorunun, sahibkarlığın inkişafı nəticəsində böhranlı ildə qeyri-neft sənayemizin 5 faiz artdığını qeyd edib.
Ümumiyyətlə, hər bir ölkənin əsas inkişaf dinamikasını şərtləndirən, istiqamət verən sənaye və kənd təsərrüfatıdır. Əhalisinin təqribən yarısı bölgələrdə yaşayan ölkəmizdə ərzaq təhlükəsizliyinin təmin olunması, vətəndaşlarımızın ərzağa olan daxili tələbatını başlıca olaraq öz potensialımız hesabına qarşılaya bilməmiz üçün regionlarda infrastruktur sahələrinin yaradılması və kənd təsərrüfatının inkişaf etdirilməsi məqsədilə bu gün mühüm islahatlar həyata keçirilir və bu istiqamətdə işlər davam etməkdədir. Bildiyiniz kimi, cənab Prezidentin imzaladığı sərəncamla 2015-ci il ölkəmizdə “Kənd təsərrüfatı ili” elan edilmiş və eyni zamanda öz çıxışlarında Azərbaycan üçün hər ilin “Kənd təsərrüfatı ili” kimi qəbul edilməsinin vacibliyini qeyd edib. Ölkəmizdə aqrar sahəyə qoyulan investisiyaların həcmi hər il mütəmadi olaraq artmaqdadır. Dövlət tərəfindən kənd təsərrüfatı ilə məşğul olan sahibkarlara xüsusi kreditlər, subsidiyalar verilməkdə, eyni zamanda əkinçilər güzəştli şərtlərlə texnika və gübrə ilə təmin edilməkdədirlər. Hətta artıq ölkəmizdə kənd təsərrüfatı avadanlıqlarına olan ehtiyacın qarşılanması məqsədilə bu avadanlıqları istehsal edən yerli müəssisələrimiz də fəaliyyətə başlayıb. 2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair, 2012-2020-ci illərdə Azərbaycan Respublikasında üzümçülüyün inkişafına dair dövlət proqramları qəbul edilib və uğurla həyata keçirilməkdədir. Kəndçinin, əkinçiliklə məşğul olmaq istəyən vətəndaşlarımızın torpaqla təmin edilməsi və vergilərdən azad olunması islahatlarını xüsusi qeyd etməliyik. Gördüyünüz kimi, bu sahədə atılan addımlar və görülmüş islahatlar belə beynəlxalq qiymətləndirmənin ortaya çıxmasına əsas verir. Qeyri-neft sektorunun inkişafında əldə olunan nailiyyətlər eyni zamanda ərzaq təhlükəsizliyimizi də şərtləndirir. Doğrudan da bu təcrübədən yararlanmağa ehtiyac var”.
Məhəmmədəli QƏRİBLİ
