Aydın Hüseynov: “Bu elə bir sahədir ki, biz gələcəkdə öz məhsullarımızı dünya bazarına çıxara bilərik”
Prezident İlham Əliyev “Azərbaycan Respublikasında baramaçılığın və ipəkçiliyin inkişafına dair 2018–2025-ci illər üçün Dövlət Proqramı”nın təsdiq edilməsi haqqında” Sərəncam imzalayıb. Nazirlər Kabinetinə isə Sərəncamdan irəli gələn məsələləri həll etmək tapşırılıb.
Məsələ ondadır ki, ölkədə baramaçılığın və ipəkçiliyin inkişafına dair 2018–2025-ci illəri əhatə edən Dövlət Proqramı bu sahəyə dövlət dəstəyinin gücləndirilməsi, ixrac potensialının artırılması və kənd yerlərində məşğulluğun təmin edilməsinə yönəlib. Proqramda qeyd olunur ki, Sovet İttifaqı dövründə Azərbaycanda ipəkçilik inkişaf edib və yaxşı ənənələr formalaşsa da, sonradan bu sahədə müşahidə olunan geriləmə ipəkçiliyin tənəzzülü ilə nəticələnib. 1970-ci ildə Azərbaycanda barama istehsalı 3.2 min ton idisə, getdikcə artaraq 1991-ci ildə 5.9 min tona çatıb. Sonradan istehsal azalıb, 2015-ci ildə cəmi 236 kiloqram yaş barama istehsal olunub. Əsas hədəf 2025-ci ildə istehsalı 6 min tona çatdırmaqdır.
İpək istehsalı və ixracını stimullaşdırmaq üçün bununla məşğul olan yerli şirkətlər barədə məlumatlar Azərbaycanda istehsal olunan malların vahid məlumat bazası üzrə portalda yerləşdiriləcək. Bu vəzifəni həyata keçirmək isə Kənd Təsərrüfatı Nazirliyi, İqtisadiyyat Nazirliyi, İqtisadi İslahatların Təhlili və Kommunikasiya Mərkəzinə tapşırılıb.
Proqram çərçivəsində 2018-2020-ci illərdə tədarük olunmuş baramanın ilkin emalı üçün barama qurutma məntəqələrinin, o cümlədən Ağcabədi, Balakən, Bərdə, Göyçay, Tovuz, Zaqatala və Zərdab rayonlarında barama qəbulu və emalı məntəqələrinin yaradılması nəzərdə tutulur.
O da məlumdur ki, son illər baramaçılıq və ipəkçiliyin inkişafı üçün bir neçə addım atılıb. Xaricdən ipəkqurdu toxumları gətirilərək kümçülərə pulsuz paylanır. Bundan başqa bölgələrdə baramaçılığın yem bazasını təşkil edən tut ağaclarının tingləri əkilir. Qax Damazlıq İpəkçilik Stansiyası dövlət vəsaiti hesabına yenidən qurulur. Kümçülərə hər kiloqram yaş barama üçün 5 manat subsidiya verilir. O baxımdan, son bir neçə ildə baramaçılığın stimullaşdırılması üçün atılan ayrı-ayrı addımlardan sonra təsdiq olunan Dövlət Proqramı kompleks tədbirlərin başlanğıcı kimi qiymətləndirilməlidir. Bu tədbirlər bir neçə istiqməti əhatə edəcək.
Maraqlıdır, bəs ekspertlər sözügedən sərəncama necə yanaşırlar?
Məsələyə münasibət bildirən millət vəkili Aydın Hüseynov buna müsbət prizmadan yanaşdı. Onun fikrincə, Dövlət Proqramının əsas məqsədi baramaçılıq sahəsini inkişaf etdirməkdir: “Baramaçılığın inkişaf etdirilməsi sənayenin bu sahəsindən daha da yüksək nəticələr əldə olunmasına gətirib çıxaracaq. Sərəncamda xüsusi assosiasiyaların və qəbul məntəqələrinin yaradılması məsələsi öz əksini tapıb. Bununla bağlı orada ayrıca maddələr var. Assosiasiyaların yaradılması ilə regionlarda qəbul məntəqələri olacaq və vətəndaşlar özləri istehsal etdikləri baramaları bu məntəqələrə təhvil verə biləcəklər. Bu məntəqələr həm də insanların rahatlığını təmin edəcək. Hazırda regionlarda yaşayan əhalinin məşğulluğunun artırılması istiqamətində işlər görülür. Sərəncamla həm də bölgələrdə yaşayan vətəndaşlar yeni iş yerləri ilə təmin olunacaqlar. Bu elə bir sahədir ki, biz gələcəkdə öz məhsullarımızı dünya bazarına da çıxara bilərik. Assosiasiyalar məhz bu məqsədə xidmət edəcək. Məhsullarımızın xaricdə tanınması və onların dünya bazarına çıxarılması ölkəyə yeni valyuta axını gətirəcək ki, bu da ümumilikdə ölkə iqtisadiyyatının inkişafına öz töhfəsini verəcək. O baxımdan bununla bağlı verilən sərəncamı müsbət qiymətləndirirəm. Hesab edirəm ki, bu, ölkədə baramaçılığın inkişafına ciddi təkan verəcək. Həqiqətən də son dövrlər bu sahədə bir sıra işlər görülür. İnanıram ki, bütün bunlar öz nəticəsini verəcək”.
Vidadi ORDAHALLI
