Murtuzəli Hacıyev: “Biçindən sonra əkin sahələrinin yandırılması məhsuldarlığın 20-30 faiz azalmasına səbəb olur” Qadir Bayramlı: “Bəzi hallarda əkin sahələri yandırılan zaman yanğın ətraf ərazidə olan meşəyə də sıçrayır və ya qonşuluqda olan əkin sahələrinə də keçə bilir”
Əkin sahələrinin yandırılmasına görə cəzalar müəyyənləşdiriləcək. Bununla bağlı dövlət başçısı tərəfindən Milli Məclisə qanun layihəsi təqdim olunub. Məsələ Milli Məclisin gündəliyinə daxil edilən layihədə buna görə yüksək miqdarda cərimə nəzərdə tutulur. Layihəyə görə, İnzibati Xətalar Məcəlləsinə 244-1 (Əkin yerlərinin yandırılması) maddəsi əlavə edilir. Maddədə qeyd olunur ki, əkin yerlərinin yandırılmasına görə fiziki şəxslər 400 manatdan 600 manata qədər, vəzifəli şəxslər 1500 manatdan 2000 manata qədər, hüquqi şəxslər isə 5000 manatdan 6000 manata qədər cərimələnəcəklər.
Qeyd edək ki, layihə qəbul olunduğu təqdirdə 2018-ci il fevralın 1-dən qüvvəyə minəcək. Qanun layihəsi Milli Məclisin Aqrar siyasət komitəsinin iclasında müzakirəyə çıxarılacaq.
Kənd Təsərrüfatı Nazirliyinin rəsmisi Murtuzəli Hacıyevin sözlərinə görə, əkin sahələrin yandırılması aqronomik qaydalara ziddir. Biçindən sonra əkin sahələrinin yandırılması məhsuldarlığın 20-30 faiz azalmasına səbəb olur: “Bununla bağlı fermerlər arasında maarifləndirmə işləri aparılıb və ciddi xəbərdarlıqlar da edilib. Amma bu, belə halların qarşısının tam alınmasına gətirib çıxarmayıb.
Qanunun tələbləri fermerleri bu əməldən çəkindirəcək qədər sərtdir. Əkin yerlərinin yandırılmasına görə fiziki şəxslər 400 manatdan 600 manata qədər, vəzifəli şəxslər 1500 manatdan 2000 manata qədər, hüquqi şəxslər isə 5000 manatdan 6000 manata qədər cərimələnəcəklər.
Kənd Təsərrüfatı Nazirliyi sahələrdən samanı yandırmadan çıxarmağı və yaxud xırdalayaraq mulça halında əkin sahələrinə verib şum və digər torpaq becərmə əməliyyatı aparmağı tövsiyə edir”.
Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, əkin sahələrinin yandırılması yolverilməzdir: “Kənd təsərrüfatı sahəsində çalışan bəzi şəxslər elə hesab edirlər ki, biçindən sonra əkin sahəsini yandırmaq olar. Onların fikrincə, sahə yanan zaman orada olan zərərli həşaratlar, bitki toxumları məhv olur və növbəti il üçün bütün problemlər həll olunur. Heç bir halda əkin sahələrini yandırmaq olmaz. Torpaqda müəyyən ziyanverici həşərat və ya otlar məhv olsa da, çox böyük miqdarda faydalı mikroorqanizmlər tələf olur. Bu, torpağın münbitliyinə təsir göstərir. Təəssüf ki, bu hal geniş yayılıb. Rayonların bir çoxunda biçindən sonra əkin sahəsi yandırılır. Torpağın yandırılması doğru deyil. Bu hal yetərli məlumatın olmamasına görə baş verir. Əkin sahələrini yandıran fermerlərə bunun yanlış düşüncə olduğu haqqında məlumat vermək lazımdır”.
Həmsöhbətimizün sözlərinə görə, torpağın münbitliyinin artırılması üçün üzvi və mineral gübrələr istifadə oluna bilər: “Kənd təsərrüfatı sahəsində çalışanlar lazımi gübrələrlə təmin olunarsa, onların əkin sahəsini yandırmaq fikri olmaz. Bu problem maarifləndirmə yolu ilə həll olunmalıdır”.
Q.Bayramlı onu da bildirdi ki, əkin sahələrinin yandırılması bir sıra problemlərin yaranmasına səbəb ola bilər: “Bəzi hallarda əkin sahələri yandırılan zaman yanğın ətraf ərazidə olan meşəyə də sıçrayır və ya qonşuluqda olan əkin sahələrinə də keçə bilir. Bu cür hallarda böyük fəsadlar baş verir. Faciələrin yaşanmaması üçün əkin sahələrini yandıranlara qarşı cəzaların sərtləşdirilməsi düzgün addımdır”.
Günel CƏLİLOVA
