Rəsul Cahangirli: “Orada bir sıra yüngül sənaye və tikinti üçün lazım olan məhsullar istehsal olunacaq”
Xəbər verildiyi kimi, Bakı Şəhəri Qaradağ Rayonunun İcra Hakimiyyəti ilə Çin Xalq Respublikası Şenjen Şəhər Regional İqtisadi Əməkdaşlıq Assosiasiyası arasında Ələt qəsəbəsində “Azərbaycan-Çin Azad İqtisadi Sənaye Şəhərciyi”nin yaradılması sahəsində əməkdaşlıq haqqında Saziş imzalanıb. Ələt qəsəbəsində 1000 hektar ərazidə, ümumi dəyəri ilkin olaraq 2 milyard manat olmaqla “Sənaye Şəhərciyi” yaradılacaq.
Sazişə əsasən, tərəflər Azərbaycanda yaradılmış əlverişli biznes və investisiya mühitindən, eləcə də mövcud xammal və təbii resurslardan səmərəli istifadə etməklə qeyri-neft sektorunun davamlı inkişaf etdirilməsi, müasir texnologiyaları və qabaqcıl idarəetmə təcrübəsini tətbiq etməklə ağır, yüngül sənaye, tikinti, yüksək texnologiyalar və kənd təsərrüfatı sahələrinin qurulması, logistika mərkəzlərinin və xidmət sahələrinin yaradılması, “Made in Azerbaijan” brendi ilə rəqabətqabiliyyətli, ixracyönümlü məhsulların potensialının artırılması, eyni zamanda, potensial Çin şirkətlərinin Azərbaycan bazarlarına inteqrasiya olunması və gələcəkdə “Sənaye Şəhərciyi”ndə istehsal olunacaq məhsulların xarici ölkələrin bazarlarına ixrac olunması əsas hədəflər olaraq müəyyən olunub. Nəzərdə tutulan layihənin icra müddəti 4 illik dövrü əhatə edir. Birinci il ərzində ərazidə texniki-layihələndirilmə işlərinin aparılması və infrastrukturun salınması, ikinci ildə tikinti işlərinin aparılması və bir neçə sektor üzrə istehsal sahələrinin istifadəyə verilməsi, növbəti illərdə isə layihə üzrə nəzərdə tutulmuş bütün istehsal və xidmət sahələrinin tikintisinin tam başa çatdırılması və istifadəyə verilməsi nəzərdə tutulub.
Maraqlıdır, ekspertlər sözügedən “Sənaye Şəhərciyi”nin perspektivinə necə yanaşır? Məsələyə münasibət bildirən ekspert Rəsul Cahangirli belə bir şəhərciyin yaradılmasına müsbət prizmadan yanaşdı: “Hesab edirəm ki, bu, Azərbaycan və Çin arasında iqtisadi əlaqələrin genişlənməsinə müsbət təsir göstərəcək. Bunun əsasında həm də hər iki ölkənin iqtisadi maraqlarının müxtəlif formalarda kəsişməsi faktı dayanır. Məsələ ondadır ki, son 10 ildə Çinlə Azərbaycanın ticari əlaqələri 3 dəf artıb. Lakin potensial imkanların bundan dəfələrlə artıq olduğu hər iki tərəfə tam aydındır. Nəzərə almaq lazımdır ki, Çin dünya ümumdaxili məhsulunun 13 faizindən çoxunu istehsal edir. Çinlə Azərbaycanın iqtisadi əlaqələrinin tarixi çox qədimlərə gedib çıxır. Bu əlaqələrin başlanğıcı iki min il öncə Böyük İpək Yolu vasitəsilə qoyulub. Bu gün isə tarixi bu qədər qədim olan həmin əlaqələri əsaslı şəkildə genişləndirmək şansları yaranıb. Həcmi quru yolu ilə daşınan yüklərdən 100 dəfə çox olan və uzun dəniz yolu ilə Qərbə daşınan yüklərin iqtisadi səmərəsi getdikcə azalır. Belə yüklərin daha qısa avtomobil və dəmir yolları vasitəsilə daşınması isə daşınan malların qiymətlərinin aşağı salınması hesabına onları daha çox rəqabətqabiliyyətli və daha rentabelli edə bilər. Bu səbəbdən ən qısa marşrutla Asiya ilə Avropanı birləşdirəcək həm avtomobil, həm də dəmir yollarının alternativi yoxdur. Çin bu planları coğrafi mövqeyi kifayət qədər uyğun olan Azərbaycan vasitəsilə reallaşdırmaqda olduqca maraqlıdır. Azərbaycanın Çinlə birgə “Sənaye Şəhərciyi” yaratması ölkədə qeyri-neft sektorunun inkişafına müsbət təkan verəcək. Həmçinin, yeni iş yerlərinin açılmasına təkan verəcək. Bu həm də emal sənayesinin inkişafına müsbət təsir göstərəcək. Bunun nəticəsində orada bir sıra yüngül sənaye və tikinti üçün lazım olan məhsullar istehsal olunacaq. Həmin məhsullar həm Azərbaycanın tələbatını ödəyəcək, həm də digər ölkələrə ixrac olunacaq. Bakı-Tiflis-Qars dəmir yolunun istismara verilməsi sözügedən layihənin perspektivi üçün əhəmiyyətlidir”.
Vidadi ORDAHALLI
