Bu gün ölkə hökumətinin xüsusi diqqət mərkəzində yer alan məqamlardan biri də qeyri-neft sektoru üzrə həm istehsal həcmini artırmaq, həm də bu xətt üzrə daha çox məhsul ixracına nail olmaqdır. Son statistik məlumağların təhlili qeyd olunan səpkidə artıq mühüm irəliləyişlərin olduğunu təsdiq edir.
Təkcə bir faktı qeyd etmək lazımdır ki, cari ilin ilk 10 ayının yekunlarına əsasən, qeyri-neft sahəsi üzrə ixrac həcmi 1,1 milyard dolları keçib. Amma atılan addımlar sayəsində qarşıdakı müddət ərzində qeyd olunan istiqamətdə daha böyük nailiyyətlərin əldə olunması gözlənir. Məsələn, artıq məlumdur ki, Azərbaycanın qeyri-neft sənayesi 2018-2021-ci illər ərzində hər il 7,3 faiz artacaq.
İqtisadiyyat nazirinin müavini Sevinc Həsənova qeyd olunan xüsusda bildirir: “2018-ci ildə aqrar sektorun artımı 6,2 faiz olacaq. Bu rəqəm yaxın 3 il ərzində ildə 6 faiz təşkil edəcək. Azərbaycanın turizm sektorunun 6,6 faiz, sonrakı 3 ildə isə 6 faizdən çox artacağı proqnozlaşdırılır”. Nazir müavini bildirib ki, müasir infrastrukturların yaradılması qeyri-neft sektorunun inkişafına yeni təkan verəcək. Azərbaycan üçün burada mühüm cəhətlərdən biri qeyri-neft məhsullarının sərfəli ixracı üçün çoxsaylı nəqliyyat infrastrukturların yaradılmasıdır. Məsələn, Bakı-Tiflis-Qars dəmir yolu xətti ölkəmizdən dünya bazarlarına qeyri-neft məhsullarının daha sərfəli qiymətlərlə çıxışına imkan verir. Qara Dəniz İqtisadi Əməkdaşlıq Təşkilatının baş katibi Maykl Kristides də bu faktı xüsusi olaraq vurğulayır. Bakı-Tiflis-Qarsı Avropa ilə Asiyanı bir-birinə qovuşduran ən uğurlu layihə adlandiran Maykl Kristides bildirib ki, nəqliyyat və yol infrastruktur layihələrinin həyata keçirilməsi Qara Dəniz İqtisadi Əməkdaşlıq Təşkilatının qarşısında duran əsas prioritetlərindəndir: “Bu baxımdan Bakı-Tiflis-Qars dəmir yolu layihəsinin reallaşdırılmasını Qara dəniz hövzəsi ölkələri arasında iqtisadi əlaqələrin yeni müstəvidə qurulması üçün səmərəli fürsət kimi dəyərləndirirəm. Həqiqətən də Azərbaycan bu qlobal layihənin əsas təkanverici ölkəsi olaraq Avropa və Asiya qitələri arasında ən etibarlı nəqliyyat dəhlizinə çevrildi Əminəm ki, bu yoldan Azərbaycan, eləcə də bütün Qara dəniz ölkələri də yetərincə bəhrələnəcək”.
Tezliklə istifadəyə veriləcək “Şimal-Cənub”, “Şərq-Qərb” kimi layihələr də ölkəmizə qeyd olunan istiqamətdə əlavə dividendlər qazandıracaq. Bundan başqa, Bakı Limanı da indidən dünyanın diqqətini özünə cəlb etməyə başlayıb. Məsələn, Fransanın böyük limanları olan “Marsel”, “Port of Le Havre” və “Dyunkerk” limanları artıq Bakı Limanı ilə əməkdaşlığa xüsusi maraq göstərir. Fransanın Azərbaycandakı səfiri xanım Orelia Buşez bu bu faktı təsdiq edir: “Ölkəmin böyük limanları olan “Marsel”, “Port of Le Havre” və “Dyunkerk” limanları Bakı Limanı ilə əməkdaşlıq etməkdə maraqlıdır“. Onun sözlərinə görə, qeyd olunan liman Azərbaycan hökumətinin siyasətində ölkənin nəqliyyat qovşağına çevrilməsi üçün mühüm yer tutur və Fransa həm iqtisadi, həm də siyasi cəhətdən qeyd olunan layihəni dəstəkləyir. "Bakı Beynəlxalq Dəniz Ticarət Limanı" QSC-nin baş direktoru Taleh Ziyadov isə qeyd edir ki, Bakı Limanı dünya limanlarını Bakıda qarşılamağa hazırdır. O bildirib ki, 2018-ci ilin may ayında dünya limanlarının nümayəndələri Bakıda keçiriləcək Beynəlxalq Limanlar Assosiasiyasının illik konfransında iştirak etmək üçün ölkəmizə gələcək. Bununla bağlı bir sıra tədbirlər görülüb: “Gələn qonaqlara Azərbaycanın həm mədəni irsini, həm də ölkəmizin sosial iqtisadi tərəflərini göstərmək üçün hərtərəfli işlər görülüb. Dünya limanlarını Bakıda qarşılamağa artıq hazırıq”. Taleh Ziyadov bildirib ki, Azərbaycan beynəlxalq dəhliz və marşrutlar üçün çox vacib rol oynayır. Bununla yanaşı o qeyd edir ki, yeni yaradılan "Lyapis Lazuli" marşrutu daha çox Türkmənistan və Əfqanıstan istiqamətində olan yüklərin Azərbaycandan keçməklə Avropaya daşınması üçün atılan addımlardan biridir. Xatırladaq ki, bu günlərdə Aşqabadda keçirilmiş konfrans çərçivəsində Əfqanıstan, Türkmənistan, Azərbaycan, Gürcüstan və Türkiyə arasında tranzit və nəqliyyat haqqında Saziş (“Lyapis Lazuli” marşrutu üzrə Saziş) imzalanıb. Bu sənədin reallaşdırılması regionun iqtisadi inteqrasiyasını yüksəltməyə və ticarət həcmini xeyli dərəcədə genişləndirməyə yönəlib. “Lyapis Lazuli” beynəlxalq nəqliyyat dəhlizi Əfqanıstan-Türkmənistan-Azərbaycan-Gürcüstan-Türkiyə marşrutu üzrə yükdaşımaların həcmini artırmaq üçün yeni imkanlar yaradır. Eyni zamanda, bu nəqliyyat dəhlizi geniş geoiqtisadi məkanda, o cümlədən Mərkəzi və Cənubi Asiyada, Xəzər, Qara dəniz, Aralıq dənizi hövzələrində əməkdaşlığın möhkəmlənməsinə kömək edəcək. Bütün bunlar Azərbaycan üçün tranzit yükdaşımalardan böyük gəlirlər əldə etmək deməkdir. Eyni zamanda, atılan addımlar ölkəmizdə istehsal edilən qeyri-neft məhsullarının sərfəli şərtlərlə dünya bazarlarına çıxmasına əlavə imkanlar yaradır.
Tahir TAĞIYEV
