Qulu İsmayılov: “Artıq biz onun bəhrəsini görməyə başlamışıq”
Növbəti ilin dövlət büdcəsi Milli Məclsin plemar iclasına tövsiyə olunub. Parlamentin daha beş komitəsi layihəni müzakirə edib və müsbət rəy bildiriblər.
2018-ci ilin dövlət büdcəsində qeyri-neft sektorundan gəlirlərin payı 9 milyarddan çox olacaq ki, bu da büdcənin 44,9 %-ni təşkil edəcək. Cari illə müqayisədə bu, 2,3 % artım deməkdir. Bu rəqəmləri maliyyə nazirinin müavini Azər Bayramov növbəti ilin büdcəsi haqqında məlumat verərkən səsləndirib.
İclasda çıxış edən iqtisadiyyat nazirinin müavini Sevinc Həsənova bildirib ki, büdcə neftin qiyməti ilə bağlı olaraq pessimist, optimist və baza adlanan 3 variantda hazırlanıb. Pessimist variantda qiymət 30, optimist variantda isə 50 dollardan hesablanıb. Hazırda müzakirəsi aparılan layihədə isə neftin qiyməti 45 dollardan götürülüb.
Qeyd edək ki, bununla da 2018-ci ilin dövlət büdcəsi layihəsinin Milli Məclisin komitələrindəki müzakirəsi başa çatıb, plenar iclasa tövsiyə olunub. Plenar iclasda müzakirələrin noyabrın 21, 22 və 23-ü tarixlərində keçirilməsi planlaşdırılır. Faktiki olaraq gələn ilin dövlət büdcəsinin xərcləri 20 milyardan artıq səviyyədə götürülüb. Dünyada neftin qiyməti kəskin şəkildə aşağı düşəndə, yəni 5 il bundan əvvəl dövlət büdcəsinin xərcləri 15 milyard civarında götürüldü. İndi isə biz nefin qiymətində əhəmiyyətli sıcrayışın olmadığını görürük, ancaq buna baxmayaraq, son beş il ərzində büdcəmiz 5 milyard artıb. Bu nəyin hesabına olub?
İqtisadçı Qulu İsmayılov qəzetimizə bildirdi ki, bu inkişafı səciyyələndirən bir sıra faktorlar var: “Gələn ilin büdcəsinə nəzər yetirdikdə görürük ki, qeyri-neft sektoru əhəmiyyətli rola malik olacaq. Verilən rəsmi açıqlamalardan görünür ki, büdcəyə daxilolmaların 45 faizə yaxını qeyri- neft sektorunun payına düşəcək. Bu artıq ciddi uğur deməkdir. Sizinlə tam razıyam ki, dünyada qlobal olaraq davam edən maliyyə böhranının Azərbaycana təsiri qaçılmaz idi, lakin buna baxmayaraq, ölkəmizdə mühüm sosial-iqtisadi islahatların və bu islahatların dayanıqlı edilməsi üçün paralel olaraq həyata keçirilən hüquqi islahatlar nəticəsində iqtisadi böhranın təsiri minimum səviyəyə endirə bildi. Ölkəmizin davamlı inkişafının təmin olunmasında dövlətimizin sosial-iqtisadi siyasəti, o cümlədən bu siyasətin prioritet istiqamətlərindən olan iqtisadiyyatın şaxələndirilməsi həlledici rol oynadı. Həmçinin, nəzərdə tutulmuş proqramların, investisiya layihələrinin uğurla icrası davam etdirildi. Şübhəsiz olaraq, bütün bunlar dünyanın bir sıra nüfuzlu iqtisadi mərkəzləri tərəfindən də rəğbətlə qarşılanır və Azərbaycanın iqtisadi inkişafı yüksək qiymətləndirilir. Hətta həyata keçirilən islahatlar bir model olaraq digər ölkələrə praktiki tətbiq edilə biləcək sınaqdan keçmiş nümunə kimi göstərilir. Ümumdünya iqtisadi böhranının başlandığı 2008-ci ildən Azərbaycan hökuməti düşünülmüş siyasət həyata keçirib, zəruri vasitələrdən və təsir mexanizmlərindən istifadə edərək iqtisadi böhranın milli iqtisadiyyata mənfi təsirini minimallaşdırmağa müvəffəq oldu. Lakin dünyada neft qiymətlərinin düşməsi və dəyişən makroiqtisadi amillər iqtisadi islahatların keyfiyyətcə yeni mərhələyə yüksəlməsini vacib edib və ölkə başçısının da postneft dövrü kimi xarakterizə etdiyi bu dövrdə aparılan islahatlar daha müntəzəm və sistemli xarakter alıb. Məhz bunun nəticəsidir ki, Azərbaycanda qeyri-neft sektoru inkişaf etdirildi. Artıq biz onun bəhrəsini görməyə başlamışıq”.
Məhəmmədəli QƏRİBLİ
