Ermənistan Bakı-Tiflis-Qars (BTQ) dəmir yolunun tikintisi üçün kredit cəlb edilməsinə mane olmağa çalışırdı. “Trend”in məlumatına görə, bunu Azərbaycanın maliyyə naziri Samir Şərifov Milli Məclis komitələrinin birgə iclasında 2018-ci il dövlət büdcəsi və icmal büdcə layihələrinin müzakirəsi zamanı deyib.
Nazir bildirib ki, bu, beynəlxalq maliyyə təşkilatlarının hansı səbəbdən BTQ layihəsinə kredit ayırmadığını izah edir: "Bunun səbəbi heç də beynəlxalq maliyyə təşkilatlarının Bakı-Tbilisi-Qarsı səmərəsiz layihə hesab etməsi deyil, bizim bədnam qonşumuzun layihənin reallaşmasına mane olmaq cəhdi idi".
S.Şərifov əlavə edib ki, dövlət başçısı layihənin ölkə vəsaiti hesabına maliyyətləşdirilməsi barədə qərar qəbul etmişdi.
“Azərbaycan hökuməti “Azərişıq” ASC və “Azərsu” ASC-nin maliyyə vəziyyətlərinin yaxşılaşdırılması məqsədilə elektrik enerjisi və su tariflərini artırmayacaq”. Bunu da S.Şərifov deyib. Onun sözlərinə görə, bu addım əhalinin narazılığına səbəb olar və onların maliyyə vəziyyətini pisləşdirə bilər. Məhz buna görə hökumət gələn il “Azərişıq” ASC və “Azərsu” ASC üçün 55 milyon manat həcmində büdcə subsidiyaları ayıracaq.
“Biz güzəştə getməliyik”- deyən nazir bildirib ki, 2017-ci ildə Azərbaycan makroiqtisadi sabitliyin təmin edilməsi və əhalinin milli valyutaya inamının bərpası prosesinin ilk mərhələsinin yekunu üzrə məqsədlərə çatıb. Nazir qeyd edib ki, bu, dövlət başçısının rəhbərliyi ilə həyata keçirilən siyasi və iqtisadi tədbirlər sayəsində mümkün olub.
S.Şərifov bildirib ki, dövlət və icmal büdcələri layihələri qlobal və milli iqtisadiyyatda gözləntilər nəzərə alınmaqla hazırlanıb: "Azərbaycanın 2018-ci il dövlət büdcəsinin gəlirləri 20,127 milyard, xərcləri isə 20,905 milyard manat səviyyəsində proqnozlaşdırılır. Neftin qiyməti dövlət büdcəsində 45 dollar/barel qeyd edilib".
O əlavə edib ki, gələn il Vergilər Nazirliyinin xətti ilə daxilolmaların 7,907 milyard manat, Dövlət Gömrük Komitəsi - 2,43 milyard, Dövlət Neft Fondunun xətti ilə isə 9,216 milyard manat səviyyəsində olacağı gözlənilir.
S.Şərifov Azərbaycan Beynəlxalq Bankının heç bir əmanətçisinin bankın sağlamlaşdırılması proseduru nəticəsində zərər görmədiyini də deyib. O qeyd edib: “Elə təəssürat yaranır ki, sanki dövlətin bütün pulları Beynəlxalq Bankın xarici kreditorlar qarşısında borclarının ödənişinə gedir. Bu belə deyil. ABB kreditorlar qarşısında öhdəliklərini yerinə yetirməli idi, əks halda defolt elan olunacaqdı. Bankın öhdəliklərini üzərinə götürməklə dövlət yeganə düzgün yolu seçdi. Bu, xarici borcun 2,4 milyard dollar artmasına gətirib çıxarsa da, həyata keçirilən tədbirlər sayəsində bankın vəziyyəti yaxşılaşıb və hazırda bank normal rejimdə fəaliyyətini davam etdirə bilər”.
S.Şərifov həmçinin əlavə edib ki, son 12 il ərzində Azərbaycanın bank sektoru ilk dəfə böhranla üzləşib: “Qonşularımızda da bu gün eyni problemlər yaşanır. Qazaxıstan 2008-ci ildə başlamış bank böhranının öhdəsindən hələ də gələ bilmir, Rusiyada isə ölkənin dördüncü ən iri bankı bağlandı. Demək olmaz ki, biz bu sektorun bütün problemlərini həll etmişik, amma biz bunun üzərində işləyirik”.
