Pərviz Heydərov: "Yaxşı olardı ki, özəl sektor da bu işə cəlb olunsun, yəni ayrı-ayrı iş adamları, holdinqlər və şirkətlər də bu sahəyə pul qoysun"
Məlum olduğu kimi, Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında dövlət başçısı tərəfindən verilmiş tapşırıqların icrası ilə bağlı İqtisadiyyat Nazirliyinin struktur bölmələrinin və tabeliyindəki qurumların rəhbərlərinin iştirakı ilə geniş kollegiya iclası keçirilib.
İclasda iqtisadiyyat naziri, kollegiyanın sədri Şahin Mustafayev vurğulayıb ki, Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında bir sıra məsələlərə toxunulub. O cümlədən, qabaqcıl texnologiyalara əsaslanan istehsal və emal sahələrinin qurulması, infrastrukturun təkmilləşdirilməsi, eyni zamanda, yeni aqroparkların yaradılması istiqamətində işlərin davam etdirildiyi qeyd olunub: "Xaçmaz rayonunda Yalama aqroparkında 1-ci mərhələ üzrə işlər başa çatdırılıb və Şəmkir aqroparkında 1-ci mərhələ üzrə işlər davam etdirilir.
Bundan əlavə, Samux, Goranboy, Ağcabədi, Şabran, Salyan, Şamaxı, Füzuli, Cəlilabad və İsmayıllı rayonlarında da aqroparklar yaradılır. İqtisadiyyat Nazirliyinin Sahibkarlığa Kömək Milli Fondu tərəfindən ümumi dəyəri 207 milyon manat olan bu aqroparkların yaradılmasına 76,1 milyon manat güzəştli kredit verilib. Hazırda 157,6 min hektar ərazidə 38 aqroparkın, o cümlədən 12 rayonda 37,3 min hektar ərazidə 14 müasir cins heyvandarlıq kompleksinin (yem bazası ilə birlikdə) və 17 rayonda 120,3 min hektar ərazidə 24 iri taxılçılıq təsərrüfatının yaradılması təşviq olunur. Bu tədbirlər regionlarda ixracyönümlü və rəqabətədavamlı məhsul istehsalının artmasına, sahibkarlığın inkişafına, əhalinin məşğulluq səviyyəsinin yüksəlməsinə səbəb olacaq".
Aqroparkların yaradılması barədə fikir bildirən İqtisadiyyat Nazirliyinin İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, hazırda iqtisadiyyatımızda qeyri-neft məhsullarının istehsalı və ixracının təşkili və onun artırılması məsələsi prioritetdir. Bu elə məsələdir ki, bazis nöqtəsindən sonadək bütün proseslərin əlaqəli və qarşılıqlı fayda əsasında təşkil olunmasını tələb edir: "Ümumiyyətlə, söhbət ölkənin ixrac qabiliyyətinin artırılmasından və yaxud genişləndirilməsindən gedirsə, fərdiçiliklə buna nail olmaq olmaz. Odur ki, sənaye və o cümlədən, aqropark kimi həm istehsalı, həm emalı, həm də satışı nəzərdə tutan komplekslərin yaradılması zəruridir. Bu, əslində, dövrün tələbidir.
Aqropark dedikdə kənd təsərrüfatı istehsalının qeyri-kənd təsərrüfatı fəaliyyətləri ilə bir yerdə, yəni vahid istehsal məkanında təmərküzləşməsi və yaxud kombinasiyası nəzərdə tutulur. Belə ki, burada kənd təsərrüfatı məhsullarının istehsalı ilə emal prosesləri, aqrotexniki və logistika, sanitar, marketinq və digər xidmətlər vahid məkanda, yəni eyni istehsal ərazisində baş tutur və kombinasiyalaşır ki, bu zaman xammal istehsalı ilə emal prosesləri daha rentabelli olur, torpaq və su resurslarından istifadə səmərəli təmin olunur, əkinçilikdən tutmuş, heyvandarlığın, həmçinin, bunların emalı sənayesi düzgün və məqsədəuyğun əsasda inkişaf tapır.
Odur ki, aqroparkların yaranması mühüm əhəmiyyət kəsb edir. Bunun üçün vəsait xərcləmək gələcəkdə böyük gəlirlər vəd edir. Qeyd edim ki, aqroparkın yaradılması asan iş deyil və müəyyən vəsait tələb edir. Bu, düşünülmüş, ölçülüb-biçilmiş yanaşma və müvafiq konsepsiya tələb edir. Söhbət ümumən dəyəri 200 milyon manatdan çox olan parkların yaradılması işindən gedir. Dövlətin buna 76,1 milyon manat güzəştli kredit verməsi heç də çox vəsait deyil. Lakin yaxşı olardı ki, özəl sektor da bu işə cəlb olunsun, yəni ayrı-ayrı iş adamları, holdinqlər və şirkətlər də buna pul qoysun. Bu daha effektli xarakter daşıyar".
Həmsöhbətimizin sözlərinə görə, "Aqropark" inkişaf konsepsiyasının əsas məğzi ölkənin ixrac potensialının artırılması və coğrafiyasını genişləndirmək, milli brendlər yaratmaq, kiçik və orta fermerlərin innovativ qabiliyyətini artırmaq, intensiv metodları geniş tətbiq etmək, kənd təsərrüfatı sahəsində əlaqələndirilmiş vahid sistem, eləcə də istehsalçı, emalçı və istehlakçı arasında inteqrasiya münasibətləri formalaşdırmaq, yüksək məhsuldarlıq əldə etmək, eləcə də aqrar sahədə ixtisaslı kadrlar hazırlamaq və yeni iş yerləri açmaq olduğundan, yaxın perspektivdə bunun səmərəsini əyani görəcəyik.
Günel CƏLİLOVA
