Sahib Məmmədov: "Özəl sektorda qeyri-formal əmək bazarının sayı çox olduğu üçün, o bazarı tərk edənlərin sayını heç kim müəyyən edə bilmir"
2016-cı ilin dekabrında ölkə iqtisadiyyatında muzdla çalışan işçilərin sayı azalıb. Dövlət Statistika Komitəsindən Fins.az-a verilən məlumata görə, dekabrın 1-dək onların ümumi sayı 1 514,4 min nəfər olub.
2017-ci il yanvarın 1-dək isə muzdla işləyənlərin sayı 1514 min nəfər olub.
Azalma daha çox özəl sektorda müşahidə edilir. Belə ki, 2016-cı ilin dekabrında bu sektorda işləyənlərin sayı 624,1 min nəfər olub. Noyabrda isə bu rəqəm 624,9 min nəfər təşkil edib.
Məlumata görə, iqtisadiyyatın dövlət sektorunda işləyənlər isə artıb. Ötən ilin noyabrında onların sayı 889,5 min nəfər, dekabrda isə 889,9 min nəfər olub.
Muzdla işləyənlərin 34,1 min nəfəri neft, 1479,9 min nəfəri isə qeyri-neft sektorunda çalışıb.
Müəssisə və təşkilatlarda muzdla çalışan işçilərin
21,8 faizi məhsul istehsalı sahələrində, 6,8 faizi emal sənayesində, 5,9 faizi tikintidə, 3,1 faizi kənd təsərrüfatı, meşə təsərrüfatı və balıqçılıq sahələrində,
2,2 faizi mədənçıxarma sənayesində, 2 faizi su təchizatı, tullantıların təmizlənməsi və emalı, 1,8 faizi elektrik enerjisi, qaz və buxar istehsalı, bölüşdürülməsi və təchizatı sahələrində məşğul olub.
Xidmət sahəsində işləyənlərin 22,2 faizi təhsil, 19,3 faizi ticarət, nəqliyyat vasitələrinin təmiri, 8,8 faizi əhaliyə səhiyyə və sosial xidmətlərin göstərilməsi, 7,1 faizi dövlət idarəetməsi və müdafiə; sosial təminat, 4,6 faizi nəqliyyat və anbar təsərrüfatı, 3,8 faizi istirahət, əyləncə və incəsənət, 3,7 faizi peşə, elmi və texniki fəaliyyət,
1,7 faizi maliyyə və sığorta fəaliyyəti, 1,6 faizi informasiya və rabitə, 1,6 faizi inzibati və yardımçı xidmətlərin göstərilməsi, 1,5 faizi turistlərin yerləşdirilməsi və ictimai iaşə, 1,2 faizi daşınmaz əmlakla əlaqədar əməliyyatlar, 1,1 faizi digər istiqamətlərdə xidmətlərin göstərilməsi sahələrində çalışıblar.
Məsələ ilə bağlı fikir bildirən Əməkçilərin Hüquqlarını Müdafiə Liqasının sədri Sahib Məmmədov "Bakı-Xəbər"ə açıqlamasında qeyd etdi ki, özəl sektorda qeyri-formal əmək bazarının sayı çox olduğu üçün, o bazarı tərk edənlərin sayını heç kim müəyyən edə bilmir. Bəllidir ki, qeyri-formal əmək bazarında çalışanların əksəriyyətinin əmək müqaviləsi olmadığı üçün, dəqiq rəqəm demək çətindir: "Ümumiyyətlə, özəl sektorda çalışanların sayı azalıb. Bunun səbəbi investisiya layihələrinin azalması ilə bağlıdır. Ən çox tikinti sektoruna işçilər cəlb olunurdu. Dövlətin bir sıra investisiya layihələri var. Onlardan quraşdırma, təmir-tikinti, yol infrastrukturu və digər sahələrdə çalışanların sayında azalma qeydə alınır".
Həmsöhbətimiz dövlət sektorunda çalışanların sayının artmasına gəlincə, bildirdi ki, büdcə təşkilatları və dövlətin təsərrüfat subyektlərində təxminən 950 min işçi var: "Ümumi əmək müqaviləsinin sayı milyon yarımdan artıqdır. Dövlət sektorunda ixtisarlar olduqca azdır".
Günel CƏLİLOVA
