Elman Babayev: "Sosial təminat sisteminin əsas istiqamətlərindən biri də sosial cəhətdən həssas əhali qruplarının ehtiyac duyduqları sosial xidmətlərlə təmin olunmasıdır"
Məlum olduğu kimi, Əmək və Əhalinin Sosial Müdafiəsi Nazirliyinin sosial xidmət müəssisələrində hazırda daimi dövlət təminatında yaşayanların sayı 1087 nəfər təşkil edir.
Azərbaycan Prezidenti İlham Əliyevin sosial sahəyə diqqət və qayğısının daha bir əyani təzahürü kimi, son illərdə sosial xidmət müəssisələrində müasir tələblərə uyğun şəraitin yaradılması üçün əsaslı təmir və yenidənqurma işləri aparılıb.
Sosial xidmət müəssisələri haqqında "Bakı-Xəbər"ə geniş məlumat verən Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsinin rəisi Elman Babayev qeyd etdi ki, Azərbaycanda sosial təminat sisteminin təkmilləşdirilməsi tədbirləri sosial xidmətlər sahəsini də əhatə edir: "Azərbaycan Respublikasının sosial təminat sisteminin əsas istiqamətlərindən biri də sosial cəhətdən həssas əhali qruplarının ehtiyac duyduqları sosial xidmətlərlə təmin olunmasıdır. Bu sahədə fəaliyyət "Sosial xidmət haqqında" Azərbaycan Respublikası Qanununa və digər normativ-hüquqi aktlara əsasən həyata keçirilir.
Hazırda Azərbaycan Respublikasının Əmək və Əhalinin Sosial Müdafiəsi Nazirliyi tərəfindən "Sosial xidmət haqqında" Qanuna uyğun olaraq, tənha ahıl və əlil şəxslərə evlərində səyyar formada və sosial xidmət müəssisələrində stasionar şəraitdə sosial xidmətlər göstərilir. Eyni zamanda, Əmək və Əhalinin Sosial Müdafiəsi Nazirliyinin müəyyən etdiyi prioritet istiqamətlər və nazirliyin sifarişləri əsasında ixtisaslaşmış QHT-lər tərəfindən də müvafiq kateqoriyalardan olan şəxslərə sosial xidmətlərin göstərilməsi təmin edilir.
Evdə (səyyar) sosial xidmətin təşkili Azərbaycan Respublikası Nazirlər Kabinetinin 2014-cü il 22 aprel tarixli, 108 saylı Qərarı ilə təsdiq edilmiş "Evdə (səyyar) sosial xidmətin göstərilməsi Qaydası"na əsasən, Əmək və Əhalinin Sosial Müdafiəsi Nazirliyi yanında Dövlət Sosial Müdafiəsi Fondunun yerli orqanları tərəfindən əmək qabiliyyətli qohumları və ya qanuni nümayəndələri ilə eyni yaşayış məntəqəsində yaşamayan və sosial xidmətə ehtiyacı olan tənha ahıllara, ahıl ər-arvadlara, əlillər və sağlamlıq imkanları məhdud uşaqlara, xəstəliyin terminal (son) mərhələsində olan şəxslərə evdə (səyyar) sosial xidmət göstərilir. Cari ilin 01 yanvar tarixinə 11590 nəfər şəxsə evdə sosial-məişət xidməti göstərilib. Sosial işçilər həftədə ən azı iki dəfə tənha ahıl və əlil şəxslərin evlərində olaraq onlara təmizlik işlərinin aparılmasında, zəruri ərzaq, sənaye və məişət əşyalarının alınması və s. işlərdə xidmət göstərir".
E.Babayevin sözlərinə görə, Əmək və Əhalinin Sosial Müdafiəsi Nazirliyinin sosial xidmət müəssisələrində hazırda daimi dövlət təminatında yaşayanların sayı 1087 nəfər təşkil edir: "Həmin insanlardan 321 nəfəri sağlamlıq imkanları məhdud uşaqlar olmaqla, nazirliyin 1 və 2 saylı sağlamlıq imkanları məhdud uşaqlar üçün sosial xidmət müəssisələrində hərtərəfli dövlət qayğısı ilə əhatə olunub. Sosial xidmət müəssisələrində yaşayan şəxslərdən 526 nəfəri isə ruhi-əsəb əlili olmaqla, nazirliyin psixonevroloji sosial xidmət müəssisələrində stasionar şəraitdə sosial xidmətlərlə təmin olunur. Qalan şəxslər isə nazirliyin müharibə və əmək əlilləri üçün pansionatında yaşayır.
Azərbaycan Prezidenti cənab İlham Əliyevin sosial sahəyə diqqət və qayğısının daha bir əyani təzahürü kimi, son illərdə sosial xidmət müəssisələrində müasir tələblərə uyğun şəraitin yaradılması üçün əsaslı təmir və yenidənqurma işləri aparılıb. Eləcə də müharibə və əmək əlilləri üçün pansionat üçün yeni korpus tikilərək istifadəyə verilib. Həmçinin Heydər Əliyev Fondunun "Uşaq evləri və internat məktəblərinin inkişafı" proqramı çərçivəsində sağlamlıq imkanları məhdud uşaqlar üçün sosial xidmət müəssisələrində nümunəvi yaşayış və reabilitasiya şəraiti yaradılıb. Sosial xidmət müəssisələrində yaşayan şəxslərin doğma ailə mühitinə qayıtmaları yönündə də müvafiq tədbirlər həyata keçirilir. Bu sahədə tədbirlərin davamı olaraq, 2016-cı ildə bu müəssisələrdən 42 nəfər şəxsin doğma ailə mühitinə qayıtması təmin olunub".
Həmsöhbətimiz onu da əlavə etdi k, son illər sosial xidmətlərin əhatə dairəsi xeyli genişlənib: "Belə ki, nazirliyin sosial sifarişləri əsasında və müəyyən etdiyi prioritet istiqamətlər üzrə ixtisaslaşmış vətəndaş cəmiyyətləri tərəfindən sağlamlıq imkanları məhdud uşaqlar və sosial təhlükəli vəziyyətdə olan yetkinlik yaşına çatmayanlar da reabilitasiya yönümlü sosial xidmətlərlə təmin edilir. Bu məqsədlə müvafiq layihələr çərçivəsində Bakıda və ölkənin regionlarında günərzi qayğı və reabilitasiya mərkəzləri yaradılaraq, qeyd edilən uşaqların ehtiyac duyduqları sosial xidmətlərlə təminatı həyata keçirilir.
Nazirliyin sosial sifarişi üzrə uşaqlar arasında əlilliyin qarşısının alınması, sağlamlıq imkanları məhdud uşaqların Portec metodikası ilə sosial reabilitasiyası, belə uşaqlara psixo-sosial dəstəyin, habelə eşitmə və nitq qabiliyyəti olmayan sağlamlıq imkanları məhdud uşaqlara surdoloji xidmətlərin göstərilməsi, əlilliyi olan şəxslər və sağlamlıq imkanları məhdud uşaqlar arasında idman tədbirlərinin təşkili, onların beynəlxalq yarışlarda iştirakına şərait yaradılması və s. istiqamətlərdə də layihələr icra olunur.
Bu sahədə işlər 2016-cı ildə də davam etdirilib. Azərbaycan Respublikası Nazirlər Kabinetinin 2012-ci il 30 dekabr tarixli, 330 nömrəli Qərarı ilə təsdiq edilmiş "Sosial xidmət sahəsində dövlət sifarişlərinin bələdiyyələrə, fiziki və hüquqi şəxslərə, o cümlədən qeyri-hökumət təşkilatlarına (QHT) verilməsi Qaydası"na əsasən, sağlamlıq imkanları məhdud uşaqlara sosial xidmətlərin göstərilməsi üçün Əmək və Əhalinin Sosial Müdafiəsi Nazirliyi tərəfindən prioritet istiqamətlər müəyyən edilib. Həmin istiqamətlər üzrə xidmətlərin ixtisaslaşdırılmış QHT-lər tərəfindən icra edilməsi məqsədilə sosial sifarişlər elan edilib və 2016-cı ildə ixtisaslaşdırılmış QHT-lər tərəfindən 37 layihə üzrə sosial sifarişlər icra olunub. Bu layihələr 2046 nəfər ehtiyacı olan uşağı əhatə edib.
Ümumilikdə, ötən il 15 min nəfərdən çox şəxs səyyar və stasionar formada sosial xidmətlərlə təmin edilib".
Günel CƏLİLOVA
