Zakir Əhmədov: "İstiqrazlara önəm verilməsi hesab edirəm ki, məqbul variantdır"
Bu il yanvarın 1-nə Dövlət Neft Fondunun investisiya portfelinin müxtəlif aktivlər üzrə bölgüsündə 80 %-i istiqrazlar və pul bazarı alətləri, 12,2 %-i səhmlər təşkil edib. Bu barədə Neft Fondunun 2016-cı il üzrə investisiya fəaliyyətinin yekunlarına həsr edilən hesabatında deyilir.
Hesabata görə, investisiya portfelinin aktivlər üzrə bölgüsündə 4,4 %-i daşınmaz əmlak və 3,4 %-i qızılın payına düşüb.
Digər tərəfdən, bu il yanvarın 1-nə fondun aktivləri 2016-cı ilin əvvəlinə 33 milyard 574,1 milyon ABŞ dollarına nisbətən 1,27 faiz azalaraq 33 milyard 147 milyon ABŞ dollarına bərabər olub. ARDNF-in cəmi aktivlərinin 33 milyard 30 milyon (99,6 faiz) ABŞ dollarına bərabər hissəsi investisiya portfelinin payına düşür. Manat vəsaitlərinin valyuta ifadəsində həcmi isə 117 milyon (0,4 faiz) ABŞ dollarına bərabərdir.
ARDNF-in investisiya portfelində 16 milyard 240,2 milyon (49,2 faiz) ABŞ dolları (+ MSCI indeksi üzrə), 10 milyard 753,4 milyon (34,3 faiz) avro, 1 milyard 283,5 milyon (4,8 faiz) funt-sterlinq, 288,4 milyon (0,6 faiz) Avstraliya dolları, 1 milyard 248,6 milyon (1,1 faiz) Türkiyə lirəsi, təxminən 33 milyard (1,6 faiz) Rusiya rublu, 496 milyard 350 milyon (1,2 faiz) Koreya vonu, 3 milyard 160,4 milyon (1,4 faiz) Çin yuanı, 44 milyard 331,1 milyon (1,1 faiz) Yaponiya yeni, 424,5 milyon (1,3 faiz) digər valyutalar, 1 milyard 111,7 milyon (3,4 faiz) qızıl (970,146 troya unsiya, 30,17 ton) təşkil edir.
Bütövlükdə, ekspertlər Neft Fondunun investisiya portfelinin tərkibini necə dəyərləndirir?
Sözügedən məsələni dəyərləndirən ekspert Zakir Əhmədovun fikrincə, indiki dövrdə investisiya portfelinin müxtəlif aktivlər üzrə bölgüsündə istiqrazlar və pul bazarı alətlərinin üstünlük təşkil etməsi doğru yanaşmadır: "Ona görə doğru yanaşmadır ki, bu, vəsaitlərin daha düzgün idarə olunmasına xidmət edir. Eyni zamanda, risqləri azaldır. Bu baxımdan istiqrazlara önəm verilməsi hesab edirəm ki, məqbul variantdır. Bu həm də ehtiyatların daha etibarlı qorunmasına xidmət edir. Digər tərəfdən, aktivlər üzrə bölgüdə daşınmaz əmlaka və qızıla da yer verilib. Burada faiz nisbətinin aşağı olması ehtiyatlı yanaşmadan irəli gəlir. Çünki daşınmaz əmlakın, xüsusən də qızılın qiyməti dünya bazarında dəyişir. Hər halda, görünən odur ki, Neft Fondu investisiya portfelini maksimum səmərəli idarə edir. Fikrimcə, bu, uğurlu idarəetmədən irəli gəlir". Vidadi ORDAHALLI
