Natiq Cəfərli: "İran bankı investisiya üçün iş adamlarını qane edəcək səviyyədə kredit verəcəksə, bunun ölkə iqtisadiyyatına müsbət təsiri olar"
Xəbər verildiyi kimi, Azərbaycanda yeni bank yaradılacaq. Azərbaycanda 100 faizli İran kapitalı ilə bankın yaradılması planlaşdırılır. Bunu "Trend"ə Bakıda eksklüziv müsahibəsində İran Mərkəzi Bankının rəhbəri Vəliulla Seyf deyib.
O qeyd edib ki, bu proses 1993-cü ildən bəri Azərbaycanda fəaliyyət göstərən "Bank Melli İran" bankının filialının Azərbaycan bankına çevrilməsi yolu ilə nəzərdə tutulur: "Bankın kapitalı tamamilə İran kapitalı hesabına yaradılacaq. Səhmdar qismində "Bank Melli İran" iştirak edəcək".
İran Mərkəzi Bankının rəhbəri bildirib ki, bu məsələ gələn həftə Azərbaycan nümayəndə heyətinin Tehrana səfəri zamanı müzakirə olunacaq.
Qeyd edək ki, daha əvvəl filialları həm Azərbaycanda, həm də İranda fəaliyyət göstərəcək birgə bankın yaradılması ilə bağlı planlar mövcud olub.
İran kapitalı ilə Azərbaycanda adıçəkilən ölkənin bankının açılması barədə fikir bildirən iqtisadçı-ekspert Natiq Cəfərli "Bakı-Xəbər"ə açıqlamasında bunları qeyd etdi: "Əslində, Azərbaycanın bank sektoruna başqa ölkənin kommersiya bankının buraxılması çıxış yolu deyil. Azərbaycanda elə bir mühit olmalıdır ki, istənilən ölkənin böyük kommersiya bankları ölkəmizdə öz filiallarını və ya banklarını yaratmaqda maraqlı olsun. Təəssüf ki, bu günə kimi iri banklar Azərbaycana gəlməyib. O nöqteyi-nəzərdən gələcəkdə Azərbaycanda açılması planlaşdırılan bankın nə qədər həcmdə əməliyyat aparacağını indidən demək düzgün deyil".
Həmsöhbətimizin sözlərinə görə, İran bankı investisiya üçün iş adamlarını qane edəcək səviyyədə kredit verəcəksə, bunun ölkə iqtisadiyyatına müsbət təsiri olar: "Həmçinin, bazarda rəqabətə davamlı olacaqsa, bunun yalnız müsbət təsiri ola bilər".
Ancaq bununla yanaşı, ekspert onu da əlavə etdi ki, İran İslam Respublikasında bankların işləmə qabiliyyəti fərqlidir: "Bəllidir ki, həmin ölkədə faizlə bağlı müəyyən problemlər var. Onlar müxtəlif növ yatırım formasından istifadə edir. İran bankının Azərbaycanda hansı qayda ilə işləyəcəyi sual doğurur. Onu da unutmaq lazım deyil ki, İran bankı yaxın müddət ərzində açılmayacaq".
İqtisadçı hesab edir ki, Amerika, Avropanın, o cümlədən Yaponiya, Cənubi Koreyanın banklarının Azərbaycanla maraqlanması daha məqsədəuyğun olardı: "Adlarını sadaladığım ölkələrin banklarının milyardlarla dövriyyəsi var. O bankların ölkəmizdə bölməsi açılarsa, Azərbaycanda rəqabətli mühit yaradılar, həmçinin, kredit faizləri aşağı düşər. Nəticədə vətəndaşlara keyfiyyətli xidmət göstərilər".
Günel CƏLİLOVA
