Ruslan Atakişiyev: "Hazırda maliyyə alətlərinin artırılması istiqamətində işlər gedir"
2016-cı il ərzində Azərbaycanın qiymətli kağızlar bazarı artım nümayiş etdirib, pozitiv kəmiyyət göstəriciləri ilə yanaşı, önəmli keyfiyyət dəyişiklikləri qeydə alınıb.
Belə ki, 2016-cı ilin yanvar-dekabr ayları ərzində qiymətli kağızlar bazarı 2015-ci il ilə müqayisədə 33 % artaraq 14,026 milyard manat təşkil edib. Keçən il ərzində qiymətli kağızların ilkin bazarı 4,5 dəfə artaraq 8,669 milyard manata çatıb. Ümumilikdə, korporativ qiymətli kağızlar bazarı 2 dəfədən, dövlət qiymətli kağızlar bazarı isə 40 dəfədən çox artıb.
2016-cı il ərzində real sektor təmsilçilərinin və maliyyə institutlarının fond bazarı vasitəsilə öz kapitallarını artırmaq təşəbbüsləri korporativ qiymətli kağızlar bazarının səhm seqmentində əməliyyatların həcminin 39 % artaraq 913 milyon manat təşkil etməsinə səbəb olub. Xüsusilə banklar tərəfindən kapital tələblərinin təmin edilməsi məqsədilə nizamnamə kapitallarının artırılması səhm bazarının artımını şərtləndirən mühüm amil olub.
Ümumilikdə, səhmlərin ilkin bazarında bağlanan əqdlərin məbləği əvvəlki hesabat dövrü ilə müqayisədə 2 dəfədən çox artaraq 563 milyon manata çatıb. Ötən il ərzində Maliyyə Nazirliyi tərəfindən daxildən borclanma siyasətinin həyata keçirilməsi, eləcə də Mərkəzi Bank tərəfindən manata təzyiqin azaldılması məqsədilə not buraxılışlarına başlanması dövlət qiymətli kağızları bazarında əməliyyatların həcminin artım dinamikasını müəyyən edib.
Bütövlükdə, ekspertlər ölkənin qiymətli kağızlar bazarında müşahidə olunan artımı nə ilə əlaqələndirir?
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyev müşahidə olunan artımı bir sıra amillərlə əlaqələndirdi: "Məsələ ondadır ki, ötən il SOCAR istiqrazlarının dövriyyəyə buraxılması qiymətli kağızlar bazarına müsbət təsir göstərib. Digər tərəfdən, səhm bazarında iri şirkətlərin səhm buraxılışlarını həyata keçirmək istiqamətində aparılan işlər nəticəsində qiymətli kağızlar bazarında artım müşahidə edilib. Ümumiyyətlə, qiymətli kağızlar bazarının, xüsusən də maliyyə sektorunun inkişafı ilə bağlı ölkədə qəbul olunmuş "yol xəritəsi" var. Burada da qiymətli kağızlar bazarının inkişaf etdirilməsi əsas prioritetlərdən biri hesab olunur. Bütün bunlar, nəticə etibarilə, qiymətli kağızlar bazarında artımın yaranmasına gətirib çıxarıb. Artımın davamlı olacağına gəldikdə isə, bu, islahatlardan asılıdır. Görünən odur ki, bu istiqamətdə islahatlar davam edir. Ölkədə hazırda maliyyə alətlərinin artırılması istiqamətində işlər gedir. Bütün bunlar artımın davamlı olacağına öz təsirini göstərəcək".
Vidadi ORDAHALLI
