"Tikinti şirkətlərinin vətəndaşları aldatmaması üçün kompleks addımlar atılmalıdır"
"2016-cı ildə Prezident Administrasiyasına daxil olmuş müraciətlərin bir qismində vətəndaşlar inşa edilmiş çoxmərtəbəli yaşayış binalarının müvafiq norma və qaydalara uyğun tikilməməsindən, müqavilə şərtlərinin kobud surətdə pozulmasından, bəzi şirkətlərin mənzilin pulunu aldıqdan sonra yoxa çıxmasından, mənzillərin dövlət komissiyası tərəfindən istismara qəbul edilməməsindən, vətəndaşların bu binalarda aldıqları mənzilə mülkiyyət hüququnu təsdiq etdirə bilməməsindən, yol verilən süründürməçilikdən, qazın və suyun vaxtında verilməməsindən, bunun üçün sakinlərdən dəfələrlə əlavə pul yığılmasından şikayətlənirlər".
Bu barədə Prezident Administrasiyasının Sənədlərlə və vətəndaşların müraciətləri ilə iş şöbəsinin müdiri Süleyman İsmayılovun AzərTAc-da dərc olunan təhlil yazısında bildirilib. Yazıda qeyd olunub ki, 100-dən çox mənzil-tikinti kooperativi və şirkət barəsində daxil olan şikayətlər vətəndaşların haqlı olduğunu bir daha təsdiq edir: "Bunlardan "Kristal Abşeron", "Kristal-L", "Fortis-Bayıl", "İlin dörd fəsli" və digərlərini qeyd etməliyik. Son illər vətəndaşlar üçün ciddi problemlər yaradan belə MTK, MMC və şirkətlərin bir çoxu barəsində cinayət işi başlanıb, vətəndaşlara dəymiş ziyan tam və ya qismən ödənilib.
Azərbaycan Prezidentinin 2017-ci il yanvarın 10-da Nazirlər Kabinetinin iclasında qeyd etdiyi kimi, bu il mənzil tikintisi sahəsində böyük canlanma baş verəcək, sosial evlərin tikintisinə başlanacaq və köhnə yaşayış sahələrinin yerində tikilən binalarda həmin ərazidə yaşayan sakinlərin mənzillə təminatının yeni qaydaları tətbiq olunacaq".
Məsələ ilə bağlı fikir bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, vətəndaşların tikinti şirkətlərindən narazılığı dəfələrlə səsləndirilib: "Bu məsələ ilə bağlı biz də araşdırma aparmışıq. Vətəndaşların əsas şikayəti bir evin bir neçə nəfərə satılmasıdır. Bu məsələ ilə bağlı müəyyən işlər görülüb. Məhkəmələr keçirilib, vətəndaşların hüquqları bərpa olunub. Bir evin bir neçə nəfərə satılması ilə bağlı problemlərin aradan qaldırılması nail olmaq istiqamətində müəyyən addımlar atılıb. Tikinti şirkətlərinin vətəndaşları aldatmaması üçün kompleks addımlar atılmalıdır. Amma şikayətlərin strukturu göstərir ki, hökumət tərəfindən addımların atılması və prosesin davam etdirilməsinə ehtiyac var. Vətəndaşların inşaat sektorunda hüquqlarını qorumaq üçün bu sahədə diqqətli olmaq lazımdır".
Günel CƏLİLOVA
