İlham Şaban: "Bu, qazın ikiqat baha satılması anlamına gəlir"
"Yunanıstan hökuməti indi də SOCAR-ı etibarlı tərəfdaş kimi görür". Bunu Yunanıstanın Azərbaycandakı səfiri Dimitrios Tsounqas bildirib. "Hansısa məsələ ortaya çıxanda bu barədə danışıqlar aparılır. Hər bir tərəf öz nəzər-nöqtəsini, fikirlərini, təkliflərini ortaya qoyur.
Bu danışıqlar uzun müddət sürür. Hər danışıq müsbət, nisbətən bir az müsbət, yaxud ümumiyyətlə mənfi yekunlaşa bilər. Bizim məsələyə gəldikdə, tərəflər dostsayağı, yaxşı mühitdə danışıqlar aparıb. Ötən il noyabrın 13-də danışıqlar təəssüf ki, müsbət yekunlaşmadı. DESFA ilə bağlı yeni tender elan ediləcək və bildiyimə görə, SOCAR yeni tenderdə iştirak etmək üçün öz marağını nümayiş etdirib. Hər iki tərəf arasında dostsayağı mühit var və heç bir problem yoxdur. Tender rəsmi olaraq elan edilməyib, amma artıq 5-6 şirkət rəsmi şəkildə tenderə maraq göstərdiyini açıqlayıb", - deyə diplomat qeyd edib.
Xatırladaq ki, ötən ilin dekabr ayının 1-də SOCAR, Yunanıstanın Özəlləşdirmə Fondu və "Hellenic Petroleum S.A." şirkəti Yunanıstanın qazpaylayıcı operatoru olan DESFA-nın özəlləşdirilməsi layihəsinə xitam verilməsi ilə bağlı birgə bəyanat yayıblar. Bəyanatda deyilir: "SOCAR, Yunanıstanın Özəlləşdirmə Fondu və "Hellenic Petroleum S.A." şirkəti DESFA-nın 66 %-nin özəlləşdirilməsi müddətini uzatmamağı qərara alıblar. 2013-cü il iyunun 21-də Yunanıstanın Özəlləşdirmə Fondu SOCAR-ı DESFA-nın özəlləşdirilməsi üzrə keçirilən tenderin qalibi elan edib. Son iki ildə SOCAR Yunanıstan və Avropa Birliyi tənzimləyici orqanlarından özəlləşdirmənin təsdiqi, müvafiq tələblərin yerinə yetirilməsi, o cümlədən DESFA-da iştirak etmək üçün potensial alıcıların dəvət olunması istiqamətində işlər aparıb".
Məlumatda, həmçinin, deyilir ki, SOCAR, "Snam" və satıcılar DESFA-nın maliyyə vəziyyətinə və bazar dəyərinə təsir edən Yunanıstanın qanunvericiliyinə son dəyişikliklər fonunda qarşılıqlı məqbul olan həllin tapılması ilə bağlı son bir neçə ayda intensiv danışıqlar aparıb: "Danışıqlar dostluq şəraitində keçib, Yunanıstan hökuməti və satıcılar hər zaman razılaşmaya münasibətdə dəstəkləyici və əməkdaşlıq mövqeyi tutub. Lakin tərəflər investorların və satıcıların maraqlarına cavab verən qarşılıqlı məqbul kommersiya mexanizmi üzrə razılığa gələ bilməyib. Nəticədə 2016-cı il noyabrın 30-da razılaşmaya xitam verilib".
SOCAR razılaşmanın dayandırılmasının Yunanıstanda və regionda gələcək investisiyalarına təsir etməyəcəyi qənaətindədir.
SOCAR-ın həmin layihədə yenidən iştirakı lazımdırmı?
Neft məsələləri üzrə ekspert İlham Şaban qəzetimizə açıqlamasında bildirdi ki, Azərbaycanın yeni bazarlar əldə etməsi normaldır: "SOCAR 2012-ci ildən başlayaraq bu siyasəti uğurla həyata keçirir. Təbiidir ki, bu məsələdə ən başlıcası iqtisadi maraqdır. DESFA ilə bağlı anlaşılmazlığın aradan qalxması bizə xeyirdir. Çünki istənilən ölkə yalnız qaz ixracatçısı olmaqda maraqlı deyil. Eyni zamanda onun pərakəndə satışında da payı olmasını istəyir. Bu baxımdan DESFA yaxşı layihədir. Azərbaycan 2020-ci ildə qaz ixrac edən böyük oyunçu kimi bazara daxil olmaq istəyirsə, pərakəndə satış şəbəkələrində az da olsa paya sahib olmalıdır. Bu, qazın ikiqat baha satılması anlamına gəlir. SOCAR-ın iştirakı lazımdır".
Məhəmmədəli QƏRİBLİ
