Bahadur Bilalov: "Ölkəmizin ərazisində ilin 4 fəslində turistləri cəlb edəcək gözəlliklər və potensial mövcuddur"
Artıq ölkədə qış turizmi mövsümünə start verilib. Manatın devalvasiyasından sonra Azərbaycanda ciddi iqtisadi böhranın baş verməsinə baxmayaraq, turizm müəssisələri qiymətləri daha da artırıb.
Bu səbəbdən də ölkə əhalisinin əksəriyyəti yerli istirahət komplekslərindən yararlana bilmir, orta gəlir səviyyəli ailələr qonşu ölkələrdə istirahətə üstünlük verir. Bu səbəbdən də Azərbaycan Turizm Assosiasiyası (AzTA) ölkədəki turizm şirkətlərinə qış turizm mövsümü üçün qiymət siyasətinə yenidən baxmağı tövsiyə edib. Bunu Assosiasiya sədrinin müşaviri Müzəffər Ağakərimov media nümayəndələrinə açıqlamasında deyib. Onun sözlərinə görə, AzTA şirkətlərə azərbaycanlıların daha çox səfər etdiyi Gürcüstandan daha aşağı qiymətlər təklif etməyi tövsiyə edib: "Onlar elə qiymətlər müəyyənləşdirməlidir ki, ucuz olsun, insanlar da Gürcüstana üz tutmasın və öz pullarını Azərbaycanda xərcləsin".
M.Ağakərimov bildirib ki, şirkətlər qiymət siyasətinə yenidən baxmaqla yanaşı, xidmət səviyyəsinin və çeşidinin artırılmasına da çalışmalıdır.
M.Ağakərimov qeyd edib ki, münasib qiymət və yüksək səviyyəli xidmət şirkətlərin ən böyük reklamıdır.
Assosiasiya rəsmisinin fikrincə, turizm şirkətləri qiymətləri qaldırmaqla tez gəlir əldə etmək istəyinin doğru olmadığını başa düşməli, keyfiyyətli və müxtəlif xidmət göstərməklə müştəri qazanmağa çalışmalıdır: "Biz qış turizmi mövsümü ərzində turist qəbul edəcək otellərə daha çox xidmətlər göstərməyi tövsiyə edirik. Şirkətlər daha çox əyləncəli proqramlar, xidmətlər təqdim etməlidir ki, turistlər istirahət dövründə darıxmasın. Eyni zamanda, tövsiyə etmişik ki, şirkətlər xidmətlərini təqdim edərkən onun keyfiyyətinə diqqət yetirsin. Keyfiyyətsiz xidmət göstərildikdə insanlar 2-ci dəfə oraya gəlməyə bilər. Ona görə də təcrübəli turizm şirkətləri, otellər buna diqqət yetirsə, daha yaxşı olar"
Turizm sahəsi üzrə ekspert Bahadur Bilalov bizimlə söhbətində bildirdi ki, bir çox yerli turistlər üçün qiymətlər və gözəl istirahət əlçatmaz arzu olaraq qalmaqdadır: "Bu məsələnin həlli üçün yeni dövrdə 4-5 ulduzlu yox, daha aşağı ulduzlu otellərin və ya hostellərin, qonaq evlərinin yaradılması və onların sayının artırılması daha gözəl olardı. Digər məsələ istirahət bölgələrimizdə məşğuliyyət və fəaliyyətlərin məhdudluğudur. İnsanlar istirahət zamanı "yemək-yatmaq"dan əlavə maraqlı məşğuliyyətlərə diqqət ayırmaq istəyir. Məsələn, atçılıq, dağçılıq, motogəzintilər və digər məşğuliyyətlərlə vaxt keçirmək istəyir".
Həmsöhbətimizin sözlərinə görə, Azərbaycan istər coğrafi, istər geosiyasi, istərsə də strateji baxımdan çox əhəmiyyətli bölgədə yerləşir: "Xüsusilə də iqlim rəngarəngliyini nəzərə alsaq, ölkəmizin ərazisində ilin 4 fəslində turistləri cəlb edəcək gözəlliklər və potensial mövcuddur. Bütün bölgələrimizdə olmasa da, əsas turizm potensiallı rayonlarımızda son illər ciddi infrastruktur formalaşıb. İstər mehmanxanalar, istər restoranlar, istərsə də əyləncə məkanları turistləri razı sala biləcək səviyyədədir. Əvvəllər turistlər üçün əsasən yay turizmi və sağlamlıq turizmi ön sırada gəlirdisə, bu gün bu nisbətdə qış turizminin də payı artmaqdadır. Qurulan mükəmməl infrastruktur bu sahədə də ölkəmizi regionun pionerlərindən birinə çevirməkdədir. Kənd turizmində isə hələ görüləcək işlər çoxdur. Xüsusilə də qastronomik turizmə və tarixi turizmə diqqət artırılmalıdır".
Günel CƏLİLOVA
