Rusiya Prezidenti Vladimir Putinin ailə həyatı ilə bağlı yeni təfərrüatlar üzə çıxıb. Araşdırmaçı jurnalistlərin əldə etdiyi rəsmi doğum qeydiyyatı sənədlərinə əsasən, Putinin qızı Katerina Tixonovanın 2025-ci ildə dünyaya gələn övladına atasının – məşhur balet artisti İqor Zelenskinin soyadı deyil, anasının soyadı verilib.
Rusiyanın araşdırmaçı jurnalistika qurumu “Agentstvo”nun yaydığı məlumata görə, Putinin 40 yaşlı qızı Katerina Tixonova Moskvada daha bir uşaq dünyaya gətirib. Uşağın atasının Tixonova ilə uzun müddətdir münasibətdə olduğu bildirilən 57 yaşlı balet artisti İqor Zelenski olduğu qeyd olunur.
Rəsmi qeydiyyatda uşağın adı Adrian İqoreviç Tixonov kimi göstərilib. Beləliklə, körpəyə atasının Zelenski soyadı əvəzinə anasının Tixonova soyadı verilib.
Qeyd edək ki, balet artisti İqor Zelenskinin soyadı Ukrayna Prezidenti Volodimir Zelenskinin soyadı ilə eyni olsa da, onların arasında heç bir qohumluq əlaqəsi yoxdur.
“Agentstvo”nun məlumatına görə, Adrian 15 avqust 2025-ci ildə dünyaya gəlib. Onun doğumu ilə bağlı ilkin tibbi sənəd Rusiya Prezidentinin İşlər İdarəsinə tabe olan nüfuzlu Mərkəzi Klinik Xəstəxana tərəfindən hazırlanıb. Lakin doğum haqqında rəsmi şəhadətnamə yalnız 10 iyul 2026-cı ildə Moskvanın Çertanovo qeydiyyat şöbəsi tərəfindən verilib. Beləliklə, sənədin rəsmiləşdirilməsi doğumdan təxminən 11 ay sonra baş tutub.
Məlumata görə, Katerina Tixonova və İqor Zelenskinin 2017-ci ildə Elsa adlı qız övladları da dünyaya gəlib. Rus mediasında yayılan məlumatlara əsasən, həmin uşağın əvvəlcə Zelenskaya olan soyadı sonradan Tixonova ilə əvəzlənib.
“Agentstvo”nun araşdırmasına görə, Adrian Putinin ictimaiyyətə məlum olan dördüncü nəvəsidir.
Putinin böyük qızı Mariya Vorontsovanın isə iki övladının olduğu bildirilir. Onlardan birinin atası niderlandlı iş adamı Jorrit Faassen, digərinin atası isə Rusiyanın “Novatek” enerji şirkətinin rəhbər şəxslərindən Yevgeni Naqornıdır.
Qeyd edək ki, Vladimir Putin övladları və nəvələri ilə bağlı məlumatları ictimaiyyətə açıqlamaqdan çəkinir. Onun kiçik qızı Katerina Tixonova 2013-cü ildə rusiyalı iş adamı Kirill Şamalovla ailə həyatı qurub. Cütlük 2018-ci ildə boşanıb. Bundan sonra Tixonovanın Almaniyanın Bavariya Dövlət Baletinin bədii rəhbəri vəzifəsində çalışmış İqor Zelenski ilə münasibət qurduğu barədə məlumatlar yayılıb.
Tahir TAĞIYEV
