ABŞ Prezidenti Donald Tramp İran və onun dəstəklədiyi Yəmən husiləri tərəfindən yeni təxribatlara yol verilməyəcəyi təqdirdə Tehrana qarşı hərbi hücumları bərpa etməmək ehtimalını nəzərdən keçirir.
“Reuters” agentliyi müzakirələrdən məlumatlı üç mənbəyə istinadən xəbər verir ki, son həftələrdə Tramp hərbi əməliyyatların genişləndirilməsi ilə bağlı təhdidlərlə münaqişənin dayandırılmasının mümkünlüyü barədə bəyanatları arasında mövqeyini bir neçə dəfə dəyişib. Hazırkı və keçmiş ABŞ rəsmiləri bildirirlər ki, prezident fevral ayında İsraillə birlikdə başladılan və ABŞ ictimaiyyəti arasında populyarlıq qazanmayan münaqişənin necə başa çatdırılacağı ilə bağlı hələ yekun qərara gəlməyib.
Mənbələrin sözlərinə görə, Tramp milli təhlükəsizlik üzrə müşavirləri ilə görüşlərdə və kəşfiyyat brifinqlərindən sonra İrana qarşı yeni hücumlardan çəkinmək variantını müzakirə edib.
ABŞ prezidenti, həmçinin Yaxın Şərqdəki müttəfiqlərinin genişmiqyaslı müharibənin yenidən başlamamasına dair çağırışlarını anlayışla qarşıladığını bildirib.
“Reuters”in yazdığına görə, Tramp cümə axşamı teleaparıcısı Stiven A. Smitə müsahibəsində deyib: “Mən bunu dərhal başa çatdıra bilərdim. Lakin qorumağa çalışdığım ölkələrin xahişi ilə bir qədər daha uzun və daha sivil yol seçirik”.
Bu qapalı müzakirələr prezidentin genişmiqyaslı hərbi əməliyyatların yenidən başlanması ehtimalını aşağı qiymətləndirən ictimai bəyanatları ilə də üst-üstə düşür.
Bununla belə, Ağ Evin nümayəndəsi yekun qərarın Trampdan asılı olduğunu vurğulayıb. Onun sözlərinə görə, ABŞ Hörmüz boğazına nəzarət və İran iqtisadiyyatının vəziyyətinin pisləşməsi fonunda əlverişli mövqedədir.
Son iki həftə ərzində Tramp Səudiyyə Ərəbistanının vəliəhdi Məhəmməd bin Salman və Türkiyə Prezidenti Rəcəb Tayyib Ərdoğanla da telefon danışıqları aparıb. ABŞ rəsmisi və daha bir mənbənin bildirdiyinə görə, hər iki lider prezidentə İrana qarşı hücumları bərpa etməməyi tövsiyə edib. Lakin Tramp onlara bu barədə konkret vəd verməyib.
Danışıqlardan məlumatlı daha iki mənbənin sözlərinə görə, Tramp oktyabrın 31-də Məhəmməd bin Salmana seçkilərdən sonra İrana zərbə endirməyi planlaşdırdığını bildirib. Səudiyyə Ərəbistanının vəliəhdi isə Tehrana qarşı iqtisadi sanksiyaların artıq nəticə verdiyini əsas gətirərək ABŞ prezidentindən bu addımdan çəkinməyi xahiş edib.
Beləliklə, Vaşinqton hərbi müdaxilə variantını tamamilə istisna etməsə də, İrana təzyiqi əsasən iqtisadi vasitələrlə davam etdirmək imkanını da nəzərdən keçirir.
Tahir TAĞIYEV
