Vüqar Bayramov: "Bu yöndə təkmilləşdirmə işləri davam etdirilməlidir"
Dünya Bankı biznesin qeydiyyatdan keçirilməsinin sadə olmasını, kreditlərin əlverişliliyini və digər bir sıra amilləri nəzərə alaraq sahibkarlıq üçün planetin ən yaxşı və pis ölkələrinin reytinq siyahısını tərtib edib. Bu barədə "Business İnsider"in məlumatında bildirilir. Belə ki, "Business İnsider" portalı biznesə başlamaq və onu inkişaf etdirməyin çox asan olduğu 17 ölkədən ibarət siyahını dərc edib. Sorğuda 139 ölkədən 130 min şirkət iştirak edib.
Məlumatda bildirilir ki, "0"dan başlayaraq biznes qurmaq həmişə çətin olub, lakin dünyada elə yerlər və ölkələr var ki, orada şirkət yaratmaq digərləri ilə müqayisədə asandır:
"Azərbaycanda şirkətin qurulması zamanı sizin, çox güman ki, onu kommunal şəbəkələrə qoşmaqla bağlı probleminiz yaranmayacaq".
Siyahıya, həmçinin, Belçika, Böyük Britaniya, İsveç, Estoniya, Kosovo, Yamayka, Cənubi Koreya, İrlandiya, Ermənistan, Gürcüstan, Avstraliya, Sinqapur, Makedoniya, Honkonq (Çin), Kanada və Yeni Zelandiya daxildir.
Bundan əvvəl də digər bənzər qurumlar Azərbaycanda biznes qurmağın asan olduğunu, bununla bağlı tələb olunan prosedurların azlığını dəfələrlə bəyan edib. DB-nin son açıqlaması isə bu sahədə inkişafın davamlı olmasından xəbər verir.
Maraqlıdır, bəs ekspertlər bunu necə şərh edir? Məsələyə münasibət bildirən iqtisadçı-ekspert Vüqar Bayramovun sözlərinə görə, Azərbaycan bununla bağlı bir sıra istiqamətlər üzrə irəliləyib: "Burada əsas meyar biznesin qeydiyyatıdır. Azərbaycan biznesin qeydiyyatına görə tələb olunan günlərin, eləcə də prosedurların sayına görə region ölkələri ilə müqayisədə daha yaxşı vəziyyətdədir. Çünki qeydiyyatla bağlı günlərin sayı əvvəlkinə baxanda azalıb. Biznes subyektləri daha qısa zamanda qeydiyyatdan keçir. O cümlədən əmlakın qeydiyyata alınması məsələsində də Azərbaycanın yerinin yaxşılaşması müşahidə olunur. Bu da sözügedən istiqamətdə elektron xidmətlərin tətbiq edilməsi ilə bağlıdır. Digər istiqamət gömrük və elektrik enerjisinin verilməsi ilə bağlıdır. Bu yöndə prosedurların sayının azaldılması, nəticə etibarilə, Azərbaycanın yerinə və mövqeyinə təsir göstərir. Təbii ki, Azərbaycanın yerinin daha da yaxşılaşması üçün ixrac və idxal üçün tələb olunan günlərin daha da azaldılmasına ehtiyac var. Eyni zamanda, inşaat üçün verilən lisenziyanın müddətinin azaldılmasına ehtiyac var. Yəni daha qısa bir müddətdə inşaata başlamaq mümkün olsun. Həmçinin, elektrik enerjisinin daha qısa müddətdə verilməsinə ehtiyac var. Nəzərə alsaq ki, biznesin qeydiyyatı, vergi ödənişləri və digər istiqamətlərdə ölkənin vəziyyətinin yaxşılaşması müşahidə olunur, o üzdən bu yöndə təkmilləşdirmə işləri davam etdirilməlidir".
Vidadi ORDAHALLI
