İldırım Qurbanov: "Ölkədə maliyyə sabitliyi təmin edildi"
Azərbaycan Dövlət Neft Fondu (ARDNF) "Azəri-Çıraq-Günəşli" (AÇQ) yataqlar bloku və "Şahdəniz" qaz kondensat yatağından 2016-cı ilin noyabrın 1-nə əldə edilən gəlirlərini açıqlayıb. Bununla bağlı ARDNF-dən verilən məlumata görə, bu ilin 10 ayında AÇQ yataqları üzrə fond 4 milyard 21 milyon ABŞ dolları, "Şahdəniz" yatağı üzrə isə 64 milyon ABŞ dolları həcmində gəlir əldə edib.
Ümumiyyətlə, 2001-ci ildən etibarən 01.11.2016 tarixinə qədər AÇQ yataqlar bloku üzrə 121 milyard 30 milyon ABŞ dolları, "Şahdəniz" yatağı üzrə isə 2 milyrd 506 milyon ABŞ dolları həcmində gəlir əldə olunub. Dövlət Neft Fondunun bu iki layihə üzrə ümumi gəlirləri 123 milyard 536 milyon dollar olub ki, bunun da 4 milyard 85 milyon dolları 2016-cı ilin payına düşüb.
Bütövlükdə ötən bu illər ərzində əldə olunan gəlirləri Azərbaycan nə dərəcədə səmərəli istifadə edə bilib? Ekspertlərin bununla bağlı yanaşması nədən ibarətdir?
Sözügedən məsələni şərh edən iqtisadçı-ekspert İldırım Qurbanov buna bir neçə prizmadan yanaşdı: "Ümumi götürəndə əldə olunan neft gəlirləri hesabına bir sıra böyük işlər həyata keçirilib. Ölkədə maliyyə sabitliyi təmin edildi. Bir sıra iri infrastruktur və sosial layihələr həyata keçirildi. Yeni məktəblər, xəstəxanalar, inzibati binalar və digər bu kimi sosial obyektlər tikildi. O cümlədən, digərləri əsaslı şəkildə təmir edilərək yenidən quruldu. Müasir körpülər, piyadalar üçün keçidlər inşa olundu. Xeyli sayda qaçqın və məcburi köçkün yeni mənzillərlə təmin olundu. Onların sosial vəziyyəti yaxşılaşdırıldı və s. Ordu quruculuğuna böyük həcmdə vəsait sərf edildi və bu məqsədlə ən müasir silahlar alındı. Həmçinin, Azərbaycan gənclərinin xaricdə təhsil almasını özündə ehtiva edən proqram qəbul olundu və buna vəsait ayrıldı. Kənd təsərrüfatının inkişafı ilə bağlı bir sıra işlər görülüb. Neft gəlirlərinin istifadə olunduğu sahələrlə bağlı saatlarla danışmaq olar. Ümumi götürəndə hesab edirəm ki, ötən müddət ərzində əldə olunan neft gəlirlərindən istifadə qənaətbəxşdir".
Vidadi ORDAHALLI
