Sidiqi Quliyev: "Dövlətin bu sahəyə göstərdiyi qayğı və diqqətdən sonra fındıqçılıqda irəliləyiş əldə olunacaq"
Bu gün Azərbaycan iqtisadiyyatı islahatların keyfiyyətcə yeni mərhələsinə qədəm qoyub. Ölkənin dayanıqlı inkişafını təmin etmək üçün həyata keçirilən tədbirlərin, görülən işlərin başlıca qayəsi qeyri-neft sektorunun, xüsusilə aqrar sahənin inkişafı, ixracyönümlü məhsulların istehsalı, idxaldan asılılığın azaldılmasının, ölkəyə valyuta axınının çoxaldılmasının, özəl sektorda yeni müəssisələrin yaradılmasının sürətləndirilməsidir.
Qeyri-neft sektorunun hərtərəfli inkişafının təmin edilməsinin ən zəruri şərtlərindən biri kimi sahibkarlığın inkişaf etdirilməsi, ilk növbədə, kiçik va orta biznesin fəaliyyətinin səmərəliliyinin artırılması milli iqtisadiyyatımızın əsas hədəflərindən biri kimi qəbul olunub.
Prezident İlham Əliyevin noyabrın 16-da imzaladığı "İpəkçiliyin və fındıqçılığın inkişafına dövlət dəstəyinin gücləndirilməsi ilə bağlı əlavə tədbirlər haqqında" Sərəncam bunun bariz nümunəsidir. Sərəncama görə, ipəkçilik və fındıqçılığın inkişafına 1,463 milyon manat ayrılıb.
Sərəncama əsasən, ölkəmizdə kənd təsərrüfatının ənənəvi sahələrindən olan fındıqçılığın inkişafının sürətləndirilməsi, bu sahənin potensial imkanlarından səmərəli istifadə edilməsi və məhsul istehsalına əhalinin marağının artırılması üçün fındıq pöhrələrinin tədarük edilməsi və məhsul istehsalçılarına əvəzsiz verilməsi nəzərdə tutulur. "Kənd təsərrüfatının inkişafına dövlət dəstəyinin gücləndirilməsi ilə bağlı əlavə tədbirlər haqqında" Azərbaycan Respublikası Prezidentinin 2015-ci il 2 mart tarixli Sərəncamı ilə Kənd Təsərrüfatı Nazirliyinə ayrılmış vəsait hesabına fındıq pöhrələrinin alınmasına 700 min manat ödəniləcək. Kənd Təsərrüfatı Nazirliyinə tapşırılıb ki, fındıq pöhrələrinin, şəhər və rayonların tələbatı nəzərə alınmaqla, məhsul istehsalçılarına əvəzi ödənilmədən paylanmasını təmin etsin.
Fındıqçılığın inkişafına dövlət tərəfindən xüsusi qayğı göstərilməsi sahibkarlar tərəfindən xoş qarşılanır.
Fındıqçılıq sahəsi üzrə mütəxəssis, sahibkar Sidiqi Quliyev "Bakı-Xəbər"ə açıqlamasında qeyd etdi ki, hazırda fındıqçılığın inkişafı üçün bölgələrdə yararlı və yararsız torpaq sahələri seçilir: "Artıq Qəbələ rayonunda aqrotexniki işlər aparılır. Rayonun bəzi ərazilərində fındıq bağlarının salınması işlərinə start verilib.
Dövlətin bu sahəyə göstərdiyi qayğı və diqqətdən sonra fındıqçılıq sahəsində irəliləyiş əldə olunacaq".
Həmsöhbətimizin sözlərinə görə, hazırda Şəki, Qax, Zaqatala, Balakən və Qəbələ rayonunda fındığın əkilməsi üçün yararlı və yararsız torpaq sahələri müəyyən olunub, əkin işlərinə start verilib: "Yaxın illər ərzində ölkədə fındıq bağlarının hektarının artması gözlənir. Belə olan halda, məhsuldarlıq artacaq".
S.Quliyev bildirdi ki, fındıqçılıqla məşğul olan sahibkarlar bu sahənin inkişafında çox maraqlıdır: "Gün ərzində bir neçə sahibkar mənə müraciət edərək adıçəkilən sahədən çox gəlir etməyin yollarını soruşur. Sahibkarlar fındıqçılıq sahəsinə yatırım etməkdə maraqlıdır. Rayon sakinləri də artıq ağaclara necə qulluq etməyin yollarını öyrənir".
Günel CƏLİLOVA
