Vahid Məhərrəmov: "Torpağın dərinliyində və üst qat hissəsində hansı maddələrin nə qədər olmasını müəyyən edən texnologiya var"
Azərbaycanda boş torpaq sahələrinin laboratoriya edilməsi ilə bağlı təklif irəli sürülüb. Parlamentin Aqrar siyasət komitəsinin sonuncu iclasında komitənin üzvü, millət vəkili Cavanşir Paşazadə deyib ki, hazırda təsərrüfat sahəsində məşğul olan insanlar üçün bütün şərait yaradılıb:
"Bunlar həm satış, həm də məhsulun aparılması ilə bağlı görülən işlərdir. Maraqlıdır ki, biz hər bir şeyi edirik. Amma kənd təsərrüfatı torpaqlarının laboratoriyasını həyata keçirmirik. Yəni torpaqların laboratoriya edilməsi məsələsi qanunda əksini tapsa, bu, torpağı əkib-becərən şəxs üçün yaxşı olar. Çünki əkən bilmir ki, hansı məhsulu əksə, onun məhsuldarlığı bol olacaq. Fermerlər subsidiyalar götürür. Ancaq laboratoriya olmadığına görə gələcəkdə ödəmələri ödəyə bilmirlər".
Ölkədə boş torpaq sahələrinin laboratoriya olunması ilə bağlı fikir bildirən aqrar sahə üzrə ekspert Vahid Məhərrəmov "Bakı-Xəbər"ə açıqlamasında qeyd etdi ki, bütün torpaq sahələri - həm boş, istifadə olunmayan, həm də istifadə olunanlar yoxlanılmalıdır. "Torpaqlar əkilməzdən öncə onun tərkibi müəyyən olunmalıdır. Laboratoriya nəticəsində həmin torpağın istifadəyə yararlı olub-olmaması müəyyən olunur. Həmin müayinə nəticəsində torpaq sahəsinin hansı məhsul üzrə bol və ya az bəhrə verəcəyi aydın olur. Ancaq təəssüflər olsun ki, Azərbaycanda torpaqların tərkibini müəyyən edən laboratoriya yoxdur. Bizdə olanı yalnız köhnə və primitivdir. Müasir dövrün tələbinə uyğun olaraq, torpağın dərinliyində və üst qat hissəsində hansı maddələrin nə qədər olmasını müəyyən edən texnologiya var. Bu texnologiya ilə torpağın tərkibi tam formada müəyyən olunur. Belə bir cihazın ölkəyə gətirilməsinə böyük ehtiyac var".
Həmsöhbətimizin sözlərinə görə, ölkədə torpaqla bağlı kadastr həyata keçirilir: "Kadastr həyata keçirilərkən torpağın ölçüsü ilə yanaşı, onun keyfiyyəti dəqiq müəyyən olunsun. Ancaq bu istiqamətdə hələ ki, müsbət addım atılmayıb".
Günel CƏLİLOVA
