Oqtay Haqverdiyev: "Çay və tütünün əkin sahəsindən qısa zamanda yığılması üçün Belarus texnikası köməklik göstərə bilər"
Azərbaycan Belarusla birlikdə çay və tütün məmulatları istehsal müəssisəsi yarada bilər. İqtisadiyyat naziri Şahin Mustafayev Belarus Respublikasının Azərbaycandakı fövqəladə və səlahiyyətli səfiri Gennadi Axramoviçi qəbul edib.
İqtisadiyyat Nazirliyinin yaydığı məlumata əsasən, görüşdə tütün və tütün məmulatları, çay, şərab və digər malların ticarətinə maraq ifadə olunub, birgə çay və siqaret istehsalı müəssisələrinin, ticarət evlərinin yaradılması məsələləri müzakirə edilib.
Səfir Gennadi Axramoviç ölkələrimiz arasında iqtisadi əməkdaşlığın inkişafı üçün geniş potensialın olduğunu, səfirliyin iqtisadi əlaqələrin genişləndirilməsini təşviq etdiyini, bu sahədə işlərin bundan sonra da davam etdiriləcəyini diqqətə çatdırıb.
Azərbaycanın Belarusla birliklə çay və tütün məmulatları üçün istehsal müəssisələri yaratması məsələsinə münasibət bildirən iqtisadçı-ekspert Oqtay Haqverdiyev "Bakı-Xəbər"ə açıqlamasında qeyd etdi ki, bu sahənin inkişafı üçün qarşı ölkə Azərbaycana köməklik göstərə bilər: "Belarusun çox gözəl texnikası var. O ölkənin texniki avadanlıqları bizdə bu sahənin tez bir zamanda inkişafına təsir edə bilər. Çay və tütünün əkin sahəsindən qısa zamanda yığılması üçün Belarus texnikası köməklik göstərə bilər. Onların kombayn və traktorları xüsusi formada hazırlanıb. Çay yığımı ilə məşğul olan kombayn ayrı formada olur, tütün yığımında isə ayrı cür. Aqrar sahənin inkişafı üçün Belarus və Azərbaycanın işbirliyi baş tuta bilər. Gələcəkdə birgə istehsal müəssisələrinin yaradılması vacibdir".
İqtisadçının sözlərinə görə, birgə istehsal müəssisələrinin yaradılması ixrac potensialına da müsbət təsir göstərəcək: "Azərbaycan çayının şöhrəti artıq hər kəsə bəllidir. Adıçəkilən ölkə ilə işbirliyi inkişaf edərsə, çay və tütünümüz Belarusa göndərilə bilər. Təbii ki, bu hal ölkə iqtisadiyyatının inkişafına xidmət edər".
Günel CƏLİLOVA
