Vüqar Bayramov: "Bu o deməkdir ki, vətəndaşlar elektron portal vasitəsilə güzəştli mənzillər almağa çıxış imkanı əldə edəcək"
Məlum olduğu kimi, Prezident İlham Əliyev Mənzil İnşaatı Dövlət Agentliyinin fəaliyyəti ilə bağlı bəzi məsələlər haqqında Fərman imzalayıb.
Fərmana əsasən, "MİDA" Məhdud Məsuliyyətli Cəmiyyətinin sərəncamında olan mənzillərin güzəştlə əldə edilməsi məqsədilə "Elektron hökumət" portalında "Güzəştli mənzil" sistemi yaradılmalıdır. Portal 2017-ci il mayın 1-dən işə düşəcək.
"Güzəştli mənzil" sistemi aşağıdakıları təmin etməlidir:
4.1. Cəmiyyətin sərəncamında olan mənzillərin güzəştlə əldə edilməsi üçün tələb olunan sənədlərin siyahısının və şərtlər barədə məlumatın mövcudluğunu;
4.2. Cəmiyyətin sərəncamında olan mənzilləri güzəştlə əldə etmək istəyən şəxsin elektron müraciətinin real vaxt rejimində qeydiyyata alınaraq Cəmiyyətə göndərilməsini;
4.3. Cəmiyyətin sərəncamında olan mənzillərin güzəştlə əldə edilməsi üçün tələb olunan və bu Fərmanın 6.2.1-6.2.4-cü yarımbəndlərində nəzərdə tutulan məlumatların alınmasını;
4.4. Cəmiyyətin sərəncamında olan mənzilləri güzəştlə əldə etmək məqsədilə müraciət etmiş şəxslərin Cəmiyyət tərəfindən vahid və ictimaiyyət üçün açıq olan qeydiyyatının aparılmasını;
4.5. Cəmiyyətin sərəncamında olan mənzili güzəştlə əldə etmək məqsədilə müraciət etmiş şəxs üçün elektron kabinetin yaradılmasını.
5. "Güzəştli mənzil" sisteminin təşkilini Mənzil İnşaatı Dövlət Agentliyi, fəaliyyətinin təmin olunmasını isə "MİDA" Məhdud Məsuliyyətli Cəmiyyət həyata keçirir.
Fərmanın icrası ilə bağlı, Nazirlər Kabineti başda olmaqla, bir sıra qurumlara müvafiq tapşırıqlar verilib.
Maraqlıdır, ekspertlər bunu necə dəyərləndirir?
Sözügedən məsələyə aydınlıq gətirən iqtisadçı-ekspert Vüqar Bayramovun sözlərinə görə, bu fərman mənzil probleminin həllində yeni bir mərhələ kimi qiymətləndirilir: "Çünki sənəd artıq gələn ildən sosial mənzillərə əlçatanlığı təmin etməklə yanaşı, eyni zamanda elektron prosedurların tətbiqini nəzərdə tutur. Bütövlükdə, sözügedən sənəddə nələr nəzərdə tutulur və sosial evlər hansı şərtlərlə təklif ediləcək? Əvvəla fərman "Elektron hökumət" portalında "Güzəştli mənzil" sistemi yaradılmasını nəzərdə tutur. Bu o deməkdir ki, vətəndaşlar elektron portal vasitəsilə güzəştli mənzillərin alınmasına çıxış imkanı əldə edəcək. İkincisi, sistemə sosial mənzillərin güzəştlə əldə edilməsi üçün tələb olunan sənədlərin siyahısı və şərtlər daxil ediləcək. Bu isə o deməkdir ki, sosial mənzil almaq istəyən şəxs sistemə daxil olaraq hansı sənədələrin tələb edilməsi, şərtlər, o cümlədən, otaqların sayından asılı olaraq, mənzilin qiyməti və digər məlumatlarla tanış ola biləcək. Üçüncüsü, bu sistem mənzilləri güzəştlə əldə etmək istəyən şəxsin elektron müraciətini real vaxt rejimində qeydiyyata alaraq "MİDA" Məhdud Məsuliyyətli Cəmiyyətə göndərəcək. Bu zaman vətəndaş müraciət etdikdən sonra onun müraciəti güzəştli mənzil inşaatına məsul olan qurumla bölüşdürüləcək. Dördüncüsü, sosial mənzillərin güzəştlə əldə edilməsi üçün tələb olunan və müraciətçinin şəxsiyyətini təsdiq edən sənəd üzrə məlumatları və o cümlədən şəxsin nikah haqqında şəhadətnaməsi üzrə məlumatları qeydə alınacaq. Bu məlumatların vahid və ictimaiyyət üçün açıq olan qeydiyyatı aparılacaq və bu da şəffaflıq baxımından olduqca vacibdir. Cəmiyyətin sərəncamında olan mənzili güzəştlə əldə etmək məqsədilə müraciət etmiş şəxs üçün elektron kabinet yaradılacaq. Bu, müraciətçiyə imkan verəcək ki, öz müraciəti ilə bağlı prosesi birbaşa izləyə bilsin. Fərman güzəştli mənzillərin ipoteka və xüsusən də sosial ipoteka vasitəsilə əldə edilməsinə imkan verəcək. Güzəştli mənzilin üç il müddətində icarəyə və ya kirayəyə verilməsinə və həmin müddətdə özgəninkiləşdirilməsinə məhdudiyyət tətbiq ediləcək".
Vidadi ORDAHALLI
