Əli Əlirzayev: "Azərbaycanın kənd təsərrüfatı məhsullarının AB bazarlarına nəql edilməsi ölkə iqtisadiyyatına müsbət təsir edəcək"
Avropa Birliyi (AB) Azərbaycanın kənd təsərrüfatı məhsullarının tədarükünə yardım edəcək. Bunu AB-nin Azərbaycandakı nümayəndəliyinin rəhbəri Malena Mard deyib. O, noyabrın 16-da Bakıda keçirilən "Azərbaycanda infrastruktur, elektrik enerjisi və bərpa olunan enerji mənbələrinə investisiyalar" konfransında çıxış edib.
M.Mardın sözlərinə görə, Azərbaycanın idxal etdiyi məhsulların yarıdan çoxu Avropa ölkələrinin payına düşür: "Bu yaxınlarda Yevlaxda olmuşam. Kənd təsərrüfatının inkişafına necə diqqət verildiyini görmüşəm. Biz Azərbaycanın kənd təsərrüfatı məhsullarının Avropaya tədarükü məsələsini inkişaf etdirəcəyik. Bundan başqa, Aİ "ASAN xidmət"in iş təcrübəsini öyrənmək və iqtisadi sahələrin inkişafında Azərbaycanla təcrübə mübadiləsi aparmaq niyyətindədir".
M.Mard, həmçinin, Azərbaycanın iştirakçı olduğu beynəlxalq layihələrin əhəmiyyətini də qeyd edib: "Azərbaycan "Cənub Qaz Dəhlizi" layihəsinin realizəsi yolu ilə bizə enerji təhlükəsizliyini təmin etməyə imkan verir. Bu bizim üçün çox vacib layihədir. "Cənub Qaz Dəhlizi" layihəsi Azərbaycan qazının Avropaya nəqlini nəzərdə tutur".
Aydın məsələdir ki, ölkədə artıq istehsal olunan və valyuta gətirəcək məhsulların xarici bazarlara çıxarılması mərhələli şəkildə Azərbaycanda kənd təsərrüfatı məhsullarının istehsalının artmasına, eləcə də qeyri-neft sektorunun daha da inkişafına səbəb olacaq. Bu da, nəticə etibarilə, ölkə iqtisadiyyatının neftdən asılılığını aradan qaldıracaq və davamlı iqtisadi inkişafı təmin edəcək. Bu baxımdan Avropa bazarı daha cəlbedicidir.
Maraqlıdır, Azərbaycanın kənd təsərrüfatı məhsullarının Avropaya tədarükü necə təmin olunmalıdır? Sözügedən məsələni dəyərləndirən iqtisadçı-alim Əli Əlirzayevin fikrincə, bundan ötrü bir sıra kompleks işlər görülməlidir: "Məhsul istehsalı ilə bağlı aqrotexniki qaydalar təkmilləşdirilməlidir. AB ölkələrinin təcrübəsi öyrənilməli və tətbiqinə start verilməlidir. Çünki Azərbaycanın kənd təsərrüfatı və qida məhsullarının AB bazarlarına nəql edilməsi ölkə iqtisadiyyatına müsbət təsir edəcək. Azərbaycan kənd təsərrüfatı istehsalı ilə məşğul olan ölkədir. Kənd təsərrüfatı məhsullarının xarici bazara çıxarılması Azərbaycan iqtisadiyyatının inkişafının göstəricisidir. Bir ölkənin ki, xarici dövlətlərə ixracatı artır, o ölkənin bazar iqtisadiyyatı genişlənir. Bazarın genişlənməsi də ixracatçının gəlirinin daha da artmasına səbəb olur. Kənd təsərrüfatı məhsullarının xarici bazara çıxarılması vacib və lazımlı məsələdir. Ölkə üçün ən uğurlu inkişaf idxaldan ixraca keçməkdir. Aqrar məhsullar ənənəvi deyil, yeni bazarlara çıxarılmalıdır. Təbii ki, bu baxımdan Avropa Birliyi cəlbedicidir. AB 450 milyonluq istehlaka malik olmaqla, dünyanın ən böyük bazarlarındandır. Bu baxımdan Azərbaycanın kənd təsərrüfatı məhsullarının həmin bazara daxil olmasına ciddi ehtiyac var".
Vidadi ORDAHALLI
