Vüqar Bayramov: "Bəziləri bundan sui-istifadə edib möhtəkirlik hallarına yol verməyə çalışacaq"
Məlum olduğu kimi, Nazirlər Kabineti Azərbaycana xaricdən gətirilən bir sıra qida məhsullarına yüksək gömrük rüsumlarının tətbiqinə qərar verib. Yeni rüsumlar ev toyuqları, yumurta, soğan, xiyar, qoz-fındıq, üzüm, alma, armud, heyva, xurma, meyvə şirələri, spirtli içkilərə aid edilib.
Dəyişikliyə əsasən, Azərbaycana idxal edilən 1 kq ev toyuğunun əti üçün 1 dollar, 1000 ədəd toyuq yumurtası üçün 100 dollar, 1 kq soğan üçün 0,2 dollar, 1 kq xiyar üçün 0,2 dollar, 1 kq qoz-fındıq üçün 1,5 dollar, 1 kq üzüm üçün 0,4 dollar, 1 kq alma, heyva üçün 0,3 dollar, 1 kq xurma üçün 0,3 dollar gömrük idxal rüsumu müəyyənləşdirilib.
Azərbaycana idxal edilən toyuq və yumurta üçün yüksək gömrük idxal rüsumlarının müəyyənləşdirilməsi daxili istehsalın artmasına hesablanıb. Bunu mətbuata açıqlamasında Dövlət Gömrük Komitəsinin sədri Aydın Əliyev bildirib. Onun sözlərinə görə, bu gün hər bir istehlakçı kənd təsərrüfatı və yeyinti sayəsində Azərbaycanda istehsal olunan daha təzə məhsullara üstünlük verir: "Artıq Azərbaycana dempinq qiymətləri ilə gətirilən məhsullar ölkədə istehsal olunan məhsullarla rəqabətdə olacaq, həmçinin, Nazirlər Kabinetinin qəbul etdiyi qərarla Azərbaycanda istehsal olunan məhsulların inkişafına da daha böyük önəm verəcəyik".
O bildirib ki, idxal olunan bəzi mallar üzrə gömrük rüsumunun artırılması Azərbaycanda qeyri-neft sektorunun inkişafını sürətləndirəcək: "Bu gün ölkədə qeyri-neft istehsalına xüsusi yer verilir. Gömrük rüsumlarının artırılması ilə yerli istehsalın və ölkədə fəaliyyət göstərən istehsal müəssisələrinin daha da genişlənməsi və daha geniş çeşiddə məhsulların istehsal olunmasını görəcəyik".
Maraqlıdır, bəs ekspertlər məsələyə necə yanaşır?
Sözügedən məsələni dəyərləndirən iqtisadçı-ekspert Vüqar Bayramov buna bir neçə prizmadan yanaşır. Onun fikrincə, bu, daxili istehsalın artmasına stimul verəcək: "Yeni qaydalar yerli məhsulların satışının artmasına və daxili bazarın güclənməsinə səbəb olacaq. Bu da ümumilikdə yeni iş yerlərinin açılmasına müsbət təsir göstərəcək. Nazirlər Kabinetinin bu qərarı daxili istehsal üçün müsbət bir addım olsa da, yerli məhsulların satışına nəzarətin də gücləndirilməsi vacibdir. Çünki bəziləri bundan sui-istifadə edib möhtəkirlik hallarına yol verməyə çalışacaq. Bunlar baş verməsin deyə müəyyən qabaqlayıcı tədbirlər görülməlidir. Yeni qərar 30 gün sonra qüvvəyə minəcək və iki il qüvvədə qalacaq. Hazırda bu məhsullara gömrük dəyərinin 15 faizi həcmində standart gömrük idxal rüsumu tətbiq edilir. O üzdən bu müddət ərzində bəzi qabaqlayıcı tədbirlər görülməlidir".
Vidadi ORDAHALLI
