İldırım Qurbanov: "Çünki ölkədə faktiki inflyasiya 11 faizdir"
2017-ci il dövlət büdcəsinin gəlir və xərcləri açıqlanıb. Maliyyə Nazirliyindən verilən məlumata görə, dövlət büdcəsinin gəlirlərinin 15,955 mlrd. manat, xərclərinin isə 16,6 mlrd. manat məbləğində təsdiq edilməsi proqnozlaşdırılır. Gələn ilin dövlət büdcəsində 645 mln. manatlıq kəsir nəzərdə tutulub. 2017-ci ildə dövlət büdcəsi kəsirinin ÜDM-ə nisbəti 1% təşkil edəcək.
Dövlət büdcəsi kəsirinin maliyyələşdirilməsi özəlləşdirmədən, daxili və xarici borclanmadan daxilolmalar, xarici qrantlardan daxilolmalar və 2017-ci ilin 1 yanvar tarixinə dövlət büdcəsinin vahid xəzinə hesabının qalığı hesabına həyata keçiriləcək. 2017-ci ildə dövlət büdcəsi gəlirləri üzrə proqnozun 7210 mln. manatı Vergilər Nazirliyinin xətti ilə daxilolmaların, 6100 mln. manatı ARDNF-dən transfertlərin, 2200 mln. manatı Dövlət Gömrük Komitəsinin xətti ilə daxilolmaların, 445 mln. manatı isə digər gəlirlərin payına düşür. 2017-ci il dövlət büdcəsinin xərcləri ÜDM-in 26,6%-i səviyyəsində nəzərdə tutulur. Bu da 2016-cı illə müqayisədə 4,4 faiz-bənd azdır.
Məlumat üçün onu da qeyd edək ki, 2016-cı il üçün yaşayış minimumu ölkə üzrə 136, əmək qabiliyyətli əhali üçün 146, pensiyaçılar üçün 115, uşaqlar üçün isə 117 manat məbləğində müəyyən edilib. Məlumata görə, hazırda 2017-ci ilin yaşayış minimumu hazırlanır və oktyabr ayında ölkə Prezidenti tərəfindən təsdiq olunacaq. Maraqlıdır, gələn il üçün yaşayış minimumu nə qədər ola bilər? Ekspertlərin bununla bağlı proqnozları nədən ibarətdir? Məsələyə münasibət bildirən iqtisadçı-ekspert İldırım Qurbanovun sözlərinə görə, yaşayış minimumunun 10-15 faiz artırılacağı təxmin edilir: "Növbəti il üçün yaşayış minimumunu inflyasiyaya görə nəzərə almaq lazımdır. İnflyasiya varsa, məhsulların qiymətində artım müşahidə olunursa, yaşayış minimumu da buna uyğun olaraq qalxmalıdır. O üzdən, çox güman ki, inflyasiyaya uyğun olaraq artım olacaq. Çünki əvvəl bir nəfər 136 və yaxud da 146 manatla müəyyən tələbatını təmin edirdisə, indi vəziyyət bir qədər fərqlidir. Qiymətlər artıb və inflyasiyaya görə məcburdur ki, əlavə xərc çəksin. Bu da yaşayış minimumunun artırılması zərurətini yaradır. Hesab edirəm ki, gələnilki yaşayış minimumunun həcmi inflyasiya həddində uyğunlaşdırılmalıdır. Növbəti il üçün yaşayış minimumunun 10-15 faiz artırılacağı güman olunur. Çünki ölkədə faktiki inflyasiya 11 faizdir. O üzdən, təxminlərim bundan ibarətdir".
Vidadi ORDAHALLI
