Fikrət Yusifov: "Aparılan islahatların başlıca məqsədi vətəndaşlarımızın həyat səviyyəsinin yüksəlməsini təmin etməkdən ibarətdir"
Xəbər verildiyi kimi, Azərbaycanın yeni məşğulluq strategiyası hazırlanır. Yüksək maaşlı yeni iş yerləri yaradılacaq və insanların iş problemi daha çevik həll olunacaq. Bu yeni hazırlanan məşğulluq strategiyası ilə mümkün olacaq.
Əmək və əhalinin sosial müdafiəsi naziri Səlim Müslümov yeni strategiyanın təfərrüatlarını media nümayəndələrinə açıqlayıb. O bildirib ki, yeni strategiyanın hazırlanmasında Beynəlxalq Əmək Təşkilatı, BMT-nin inkişaf proqramı və Dünya Bankının mütəxəssisləri də iştirak edir. Səlim Müslümov yeni strategiyanın istiqamətlərini açıqlayıb: "Strategiyada əsas hədəf işsizlik probleminin qarşısını tam almaqdır".
Demoqrafik göstəricilərin yaxşı olduğunu deyən nazir əsasən gənclərin məşğulluğunun təminatının prioritet olduğuna diqqət çəkib.
Gələn aydan beynəlxalq təşkilatların da müzakirəsinə qoşulacağı məşğulluq strategiyası müsbət rəy aldıqdan sonra Nazirlər Kabinetinə təqdim olunacaq.
Yeni məşğulluq strategiyası haqqında fikir bildirən Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Aydın Hüseynov "Bakı-Xəbər"ə açıqlamasında qeyd etdi ki, vətəndaşların məşğulluğunun təmin olunması ilk növbədə ölkə iqtisadiyyatına böyük bəhrə verəcək: "Ölkədə çoxlu sayda iş yeri açılacaq. Vətəndaşlar ya istehsal, ya da kənd təsərrüfatı ilə məşğul olacaq. İlk növbədə həmin müəssisələr dövlət büdcəsinə ödənişlər aparacaq və vətəndaşlar əməkhaqqı ilə təmin olunacaq. Nəticədə pul dövriyyəsi yaranır. Yaranan pul dövriyyəsi elə ölkə iqtisadiyyatına verilən böyük töhfədir".
Millət vəkilinin sözlərinə görə, ölkə başçısı İlham Əliyevin həyata keçirdiyi iqtisadi strategiyanın başlıca məqsədi ölkə vətəndaşlarının rifahının yüksəlməsidir. Məşğulluğun təmin olunması, iş yerlərinin açılması birbaşa həmin strategiyanın təntənəsi deməkdir: "Ümumilikdə isə ölkə və milli iqtisadiyyatın dinamik inkişafı deməkdir".
İqtisadçı-ekspert Fikrət Yusifov bizimlə söhbətində bildirdi ki, ölkəmizdə aparılan genişmiqyaslı iqtisadi və siyasi islahatlar fonunda sosial sahələrdə islahatların daha da dərinləşdirilməsi labüddür: "Son bir neçə il ərzində Əmək və Əhalinin Sosial Müdafiəsi Nazirliyi bu sahədə çox təqdirəlayiq işlər görə bilib. Bu proses bu gün də davam edir. Sosial sferada nazirlik tərəfindən aparılan bu islahatlar ölkə Prezidentinin müəyyən etdiyi sosial islahatlar kursuna tam uyğun olaraq həyata keçirilir. Aparılan islahatların başlıca məqsədi vətəndaşlarımızın həyat səviyyəsinin yüksəlməsini təmin etməkdən ibarətdir.
Bu sahədə əsas məsələlərdən biri də əmək bazarında olan vəziyyətin günün tələbləri səviyyəsində yenidən qurulmasıdır. Həmən vəzifənin reallaşdırılmasını qarşısına məqsəd qoymuş Əmək və Əhalinin Sosial Müdafiəsi Nazirliyi artıq yeni əmək strategiyasının hazırlanması işinə start verib. Bu günlərdə Beynəlxalq Əmək Təşkilatının rəhbərliyi də Azərbaycanda əmək bazarının tənzimlənməsi və yeni əmək strategiyasının hazırlanması sahəsində nazirliyə dəstək göstərəcəyini bəyan edib.
Yeni strategiyada əmək bazarında işaxtaranların iş yerləri ilə təminatı, işsizlərin sosial təminat sisteminin tənzimlənməsi, əmək yarmarkalarının daha səmərəli şəkildə təşkili və s. bu kimi məsələlərin həlli nəzərdə tutulur".
Günel CƏLİLOVA
