Qeyri-neft sektorunun mühüm qollarından biri kimi Azərbaycanda turizmin inkişafı xüsusi diqqət mərkəzində yer alır. Atılan addımlar bu qənaətə gəlməyə əsas verir ki, qarşıdakı müddət ərzində həm ölkəyə daha çox turist gələcək, həm də turizmdən gələn gəlirlər artacaq.
Bunu şərtləndirən əsas amiilərdən biri də xaricdən Azərbaycana gəlişin həm asan, həm də ucuz olmasıdır. Yeri gəlmişkən qeyd edək ki, Rusiyanın "Aeroflot" Şirkətlər Qrupuna daxil olan "Pobeda" aviaşirkəti (loukoster) Rostov-Don şəhərindən yeni beynəlxalq reyslər üzrə-Bakı və Tiflisə biletlərin satışına başlayıb. Şirkət yeni marşrutlarla qış cədvəli üzrə biletlərin 30%-ni minimal tariflə, cəmi - 999 rubla, təxminən 26 manata təklif edilib. Bu məbləğə bütün rüsum və yığımlar daxildir.
Qeyd edilir ki, "Pobeda"nın təyyarələri Rostov hava limanından Bakıya oktyabrın 30-dan etibarən həftədə 4 dəfə, Tiflisə isə 1 noyabr tarixindən həftədə 3 dəfə uçuşlar həyata keçirəcək. Aviaşirkət payızda Həştərxan, Volqoqrad, Vladiqafqaz və Nalçikə də reyslərə başlayır, Sankt-Peterburqdan uçuşların sayını isə iki dəfə artırmağı planlaşdırır. Qeyd edək ki, bu, Azərbaycana uçuşlar yerinə yetirən artıq beşinci loukosterdir. Hazırda ölkəyə "flydubai", "WizzAir", "Pegasus" və "airBaltic" kimi aşağı büdcəli aviaşirkətlər uçuşlar həyata keçirir. Əcnəbilərə viza verilməsi prosesinin asanlaşması da Azərbaycana xarici turistlərin marağını artırır. Elə bunun nəticəsidir ki, təkcə ərəb ölkələrindən Azərbaycana gələn turistlərin sayı ötən illə müqayisədə 8 dəfə artıb. Lakin bu sayın daha da artırılması və başqa ölkələrdən də Azərbaycana gələnlərin sayının artırılması istiqamətində iş aparılır. Bu məqsədlə, mədəniyyət və turizm naziri Əbülfəs Qarayevin sözlərinə görə, eyni zamanda, turizmin inkişafı ilə bağlı yeni strategiya hazırlanır: "Bu strategiyanın artıq bəzi bəndlərini nazirlik həyata keçirməyə başlayıb. Viza rejiminin sadələşdirilməsi nəticəsində ölkəyə gələn turistlərin sayında xeyli artım olub. Bəzi ölkələrlə viza rejimi, demək olar ki, tamamilə ləğv edilib. Elə ölkələr var ki, onlardan gələn turistlərin sayı 20 faiz artıb. Rusiya, Qazaxıstan və İrandan gələn turistlərin də sayında artım var. Rusiyada nümayəndəliyimizin açılması artıma müsbət təsir göstərib. Bura gələn turistlərin xərclədiyi valyuta hesabına ölkənin büdcəsinə böyük məbləğdə vəsait daxil olur. Qeyri-neft sektorunun inkişafında turizmin rolu böyükdür. Bundan başqa, "Tax Free" sisteminin tətbiq edilməsi də turistlərin cəlbində böyük rol oynayır".
Hesab edilir ki, ölkədə xidmət qiymətlərinin azaldılması və keyfiyyətin daha da yüksəldilməsi vacibdir. Digər tərəfdən, Azərbaycana ərəb ölkələrindən gələnlərin sayının artması fonunda halal turizmin inkişafı da mühüm əhəmiyyət kəsb edir. Artıq bir çox ölkələr, məsələn Rusiya bundan geniş istifadə edir. Yeri gəlmişkən qeyd edək ki, Rusiyanın Sankt-Peterburq şəhərində müsəlmanlar üçün halal "3 Aylı" mehmanxana istifadəyə verilib. Bu cür mehmanxana Rusiyada artıq sayca 4-dür, Sankt-Peterburq şəhərində isə bir ilkdir. Oteldə namaz otaqları var. Mehmanxanada yerləşən restoranlarda isə yalnız halal yeməklər verilir. Mehmanxanada içki qadağan edilib. Ramazan ayında isə yemək yalnız imsak və iftar vaxtında verilir. Namaz otaqları, tibbi otaqlar, bərbər otağı, hovuz, sauna və digər bu kimi yerlər kişilər üçün ayrı, qadınlar üçün isə ayrı təşkil olunub. Otaqlarda dini kanallar nümayiş olunur. Otel qonaqları üçün islam tarixi ilə bağlı ekskursiyalar da təşkil olunur. Otel daxilində islama zidd şəkillər və sair bu kimi şeylər qadağan olunub. Otel 17 otaqlıdır. Burada, həmçinin, 10 market var ki, yalnız dini əşyalar satılır. Azərbaycanda da belə otellərin yaradılması vacib sayılır.
Bundan əlavə az ulduzlu otellərin inşası da zəruri hesab olunur. Əbülfəs Qarayev də bunu vacib sayır: "Artıq 3 ulduzlu otellərin tikilməsinə böyük ehtiyac yaranıb. Bu istiqamətdə digər qurumlarla birgə layihələr həyata keçirilir. Qış mövsümündə də daimi turizmin təmin edilməsi üçün layihələr həyata keçirilir. Ölkəyə gələn turistlərin rahatlığını təmin etmək üçün birgə işlər görüləcək".
Tahir TAĞIYEV
