Vahid Əhmədov: "ABAD" mərkəzinin yaradılması sahibkarlığın və ailə təsərrüfatının inkişafı baxımından müsbət haldır"
Prezident İlham Əliyev Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində "ABAD" (Ailə Biznesinə Asan Dəstək) publik hüquqi şəxsin yaradılması haqqında Fərman imzalayıb.
Fərmanda qeyd olunur ki, Azərbaycan Respublikasının sosial-iqtisadi inkişafında vətəndaşların fəal iştirakını təmin etmək, ailə əməyinə əsaslanan təsərrüfatların fəaliyyətini dəstəkləmək, kiçik və orta sahibkarlığın inkişafını stimullaşdırmaq, əhalinin məşğulluğunun artırılması sahəsində əlavə imkanlar yaratmaq məqsədilə Azərbaycan Respublikasının sosial-iqtisadi inkişafında vətəndaşların fəal iştirakına, kiçik və orta sahibkarlığın inkişafına, əhalinin məşğulluq səviyyəsinin artırılmasına və rəqabət qabiliyyətli ailə təsərrüfatlarının formalaşdırılmasına dəstək vermək məqsədilə sosialyönümlü layihələr həyata keçirən "ABAD" (Ailə Biznesinə Asan Dəstək) mərkəzləri yaradılsın.
Ailə Biznesinə Dəstək Mərkəzinin yaradılması ailələrə, vətəndaşlara, o cümlədən ölkə iqtisadiyyatına nə vəd edir?
İqtisadçı-ekspert Vüqar Bayramovun fikrincə, "ABAD" mərkəzinin yaradılması sayəsində aztəminatlı insanlara ünvanlanan yardım proqramları yeni mərhələyə qədəm qoyacaq: "Fərdi sahibkarlığın inkişafı ilə bağlı proqram həyata keçirilməsinə ehtiyac var idi. "ABAD" bu kontekstdən fərdi sahibkarlara və ailə biznesinin inkişafına dəstək olacaq layihədir. Məsələn, bir vətəndaşın biznes ideyası var və fərdi sahibkarlıqla məşğul olmaq, ailə biznesi qurmaq istəyir. Yalnız ideyası var, pulu, biznes planı, investisiya layihəsi sənədi yoxdur, marketinq işini bilmir, bazarı öyrənməyib. Digər fondlar, o cümlədən Sahibkarlığa Kömək Milli Fondu vətəndaşa yalnız kredit təklif edirsə, "ABAD" məhz həmin ideyanı reallaşdırmaq üçün mühüm olan bütün vasitələri təqdim edir. "ABAD" vətəndaşın ideyası üzərində biznes planın hazırlanmasına yardım edəcək, həmin şəxsə marketinq, menecment və digər istiqamətlərdə təlimlər keçəcək. Eyni zamanda, layihənin maliyyələşdirilməsi işini də öz üzərinə götürür. Güzəştli kreditə çıxış imkanı olacaq. Digər tərəfdən, gələcəkdə qrant formasında da maliyyə ayrılması mümkün olacaq".
İqtisadçı bildirdi ki, bu xidmətlər ailə biznesi qurmaq istəyənlərin işini asanlaşdıracaq. İdeyası olan, sahibkar kimi fəaliyyət göstərmək, investisiya həyata keçirmək istəyən vətəndaş bunu reallaşdıra biləcək. Amma, eyni zamanda, məhsulun sertifikatlaşdırılması prosesinə, ixraca "ABAD" yardım edəcək. Bu o deməkdir ki, "ABAD" məhsulun istehsalından bazara çıxarılmasına qədər bir dəyər zənciri formalaşdıracaq. Bu, yerli istehsalın stimullaşdırılmasına imkan verəcək.
V.Bayramov onu da əlavə etdi ki, "ASAN"ın nəzdində olduğu üçün bu xidmətlər əlçatan olacaq: "Müstəqil ekspert kimi qiymətləndirməm ondan ibarətdir ki, vətəndaşların bu ideyalara, həm təlimə, kreditlərə, həm də yardıma əlçatanlığı olacaq. Ən azından ona görə ki, bu, "ASAN xidmət"in yanında yaradılmış bir layihə olacaq. Bu xüsusilə də korrupsiya ilə mübarizə, şəffaflıq baxımından çox əhəmiyyətli bir faktordur.
Millət vəkili Vahid Əhmədov yeni yaradılan mərkəzin "ASAN xidmət" qədər şəffaf və uğurlu fəaliyyət göstərəcəyinə ümid edir: "ASAN xidmət" mərkəzi Azərbaycanda fəaliyyətə başladığı gündən orada həyata keçirilən xidmətlərdə bürokratik əngəllər, süründürməçilik, korrupsiya halları faktiki olaraq tamamilə aradan qaldırılıb. Yəni şəffaf bir xidmət həyata keçirilir. Bu gün də "ASAN xidmət" mərkəzlərinin tərkibində "ABAD" mərkəzinin yaradılması sahibkarlığın və ailə təsərrüfatının inkişafı baxımından müsbət haldır. Yəqin ki, həmin mərkəzin nəzdində fond yaradılacaq, dövlətdən maliyyə ayrılacaq və insanlar oraya müraciət edərək banklar vasitəsilə deyil, bu xidmət vasitəsilə özləri üçün təsərrüfat quracaq. Kiçik və orta sahibkarlığa yardım üçün bunun əhəmiyyəti böyükdür".
Günel CƏLİLOVA
