Vüqar Bayramov: "İndiki halda rəsmi 11 faizlik inflyasiyanı kompensasiya etmək üçün əməkhaqları təxminən 15 faiz artırılmalıdır"
"2017-ci il dövlət büdcə layihəsi hazırlanarkən dünya iqtisadiyyatında baş verənlər nəzərə alınıb". Bunu maliyyə naziri Samir Şərifov deyib.
Onun sözlərinə görə, bütün bunlara baxmayaraq, gələn il pensiya və məvaciblər artırılacaq: "Şübhəsiz ki, büdcə layihəsi hazırlanarkən dünya iqtisadiyyatında baş verənlər nəzərə alınıb. Azərbaycan qlobal iqtisadiyyatın tərkib hissəsidir və baş verənlər bizə də təsirsiz ötüşmür. Qlobal iqtisadiyyatda qeyri-müəyyənliklər davam edir. Bunu nəzərə alaraq biz xarici şokların ölkə iqtisadiyyatına təsirini azaltmalıyıq və bu istiqamətdə bir sıra addımlar atılıb. Bilirsiniz ki, cari ildə dövlət sektorunda çalışanların əməkhaqları artırılıb. Gələn ildə də bu addımların davamlı olması üçün biz büdcədə maliyyə təminatı yaratmalıyıq. Digər tərəfdən cari ildə sosial müavinətlərin, pensiyaların, təqaüdlərin və digər sosial ödənişlərin artımı baş verib. Bu cür artımların gələn ildə də baş verməsi üçün maliyyə təminatı nəzərdə tutulub. Digər tərəfdən unutmamalıyıq ki, bizim gəlirlərimiz əhəmiyyətli dərəcədə azalıb. Biz çalışmalıyıq ki, xərclərimizlə gəlirlərimiz ayaqlaşsın. Bunun əksi baş verərsə, biz risqlərlə üz-üzə qalarıq. Gələn il xərclər siyasətimiz daha sərt olacaq. Bu o deməkdir ki, daha səmərəli xərclərə üstünlük veriləcək".
Bəziləri iddia edirdi ki, gələn il hökumətin maaş və pensiyaları artırmağa imkanı olmayacaq. Ancaq infrastruktur və investisiya xərclərinin azaldılması sözügedən sahələrdə artımlara getməyə imkan verir. Maraqlıdır, bəs iqtisadçıların məsələyə münasibəti necədir? Sözügedən məsələni dəyərləndirən iqtisadçı-ekspert Vüqar Bayramovun fikrincə, yaşayış minimumuna uyğun olaraq əməkhaqqı müəyyən edilməlidir: "İllik inflyasiya 11 faiz təsdiq olunacağı təqdirdə pensiyaların 11 faiz indeksasiyası həyata keçiriləcək. Yəni baza hissəsinin 11 faiz artımı baş tutacaq. Maliyyə Nazirliyinin açıqlamalarına görə, 2015-ci il səviyyəsində əməkhaqqı artımına gediləcək. Bu o deməkdir ki, mövcud səviyyə nəzərə alınmaqla 2016-cı ildə təxminən 10 faiz artıma gedilmişdi. İndiki halda rəsmi 11 faizlik inflyasiyanı kompensasiya etmək üçün əməkhaqları təxminən 15 faiz artırılmalıdır. Yaşayış minimumunun 2016-cı ilin yanvarında qüvvəyə minməsinə baxmayaraq, 2015-ci il oktyabrın sonunda təsdiq olunmuşdu. Nəticə etibarilə yaşayış minimumu təsdiq edilən zaman manatın ikinci devalvasiyası baş vermişdi. İnflyasiya isə həmin dövrün səviyyəsinə uyğun olaraq hesablanmışdı. Nəzərə alaq ki, büdcədə də o zaman manatın məzənnəsi 1 dollar = 1,05 olaraq nəzərdə tutulmuşdu. Büdcə zərfinə dəyişiklik isə bundan sonra baş verdi.
Bu baxımdan yaşayış minimumuna yenidən baxılması və dəyişdirilməsinə ehtiyac var. Nəzərinizə çatdırım ki, hazırda 2017-ci ilin yaşayış minimumu hazırlanır və oktyabr ayında ölkə Prezidenti tərəfindən növbəti ilin yaşayış minimumu təsdiq olunacaq".
Vidadi ORDAHALLI
